Շինարարական մեքենաներ

Վիքիպեդիայից՝ ազատ հանրագիտարանից
Jump to navigation Jump to search

Շինարարական մեքենաներ, շինարարական աշխատանքների կատարման համար նախատեսված մեքենաներ։ Ըստ նշանակման տարբերում են նախապատրաստական, հողային, ճանապարհային, հորատման, ցից խփող, ամրանային, բետոնային, տանիքածածկման, հարդարման և այլ աշխատանքների շինարարական մեքենաներ։ Նախապատրաստական աշխատանքները (գրունտի փխրեցում, թփերից, ծառերից, քարերից տարածքի մաքրում) կատարում են փխրիչներով, թփահատներով, արմատահան մեքենաներով։ Հողային աշխատանքներում, կախված մշակվող գրունտի բնույթից և աշխատանքի տեսակից, օգտագործում են միա և բազմաշերեփ էքսկավատորներ, առվափորիչներ, միաշերեփ բեռնիչներ, հիդրոմեքենայացման միջոցներ։ Հողաթմբերի գրունտների և ճանապարհների հիմնատակերի ամրացման համար կիրառում են թրթռագլդոններ և ճանապարհային գլդոններ, տոփանող մեքենաներ։ Ճանապարհաշինական աշխատանքներում կիրառում են նախապատրաստական աշխատանքների մեքենաներ, հողափոր մեքենաներ, իսկ ճանապարհների և օդանավակայանների ծածկերի ու հիմնատակերի պատրաստման համար՝ մասնագիտացված ճանապարհային մեքենաներ, երկաթուղու շինարարությունում՝ ռելսակոճային վանդակների տեղադրման, բալաստի լցման և այլ աշխատանքների համար՝ ճանապարհաշինական մեքենաներ։ Հորատման աշխատանքները (ամուր գրունտների մշակում, ոչ հանքային շինանյութերի հանույթ, ցցերի տեղադրման համար հորանցքերի փորում, պայթուցիկ նյութերի լցում և այլն) կատարվում են հորատող մեքենաներով։ Ցցախփման աշխատանքները, հիմնատակերի սարքավորման և հիմքերի լցման ժամանակ, կատարվում են ցցախփիչ սարքավորումներով, այդ թվում՝ դիզել-մուրճերով, շոգեօդային մուրճերով, թրթռաընկղմիչներով։ Ցցի բարձրացումը և ցցախփիչ սարքավորման ուղղորդումը աշխատանքի ժամանակ իրականացվում է շինարարական ցցահարներով։ Բետոնային աշխատանքները կատարվում են հատուկ մեքենաների և ագրեգատների օգնությամբ։ Բետոնային խառնուրդների պատրաստման համար օգտագործում են դոզատորներ, բետոնախառնիչներ, իսկ խտացման համար՝ թրթռիչներ։ Տանիքածածկման աշխատանքներն իրականացվում են փաթթոցային նյութերը մաքրող, վերափաթաթող, դրանք գրտնակող և կպցնող տանիքածածկման մեքենաներով։ Դրվագման (հարդարման) աշխատանքներում կիրառում են սվաղման-հարթման, խճանկարապատման, մանրահատակահղկման մեքենաներ, մածիկի քսման սարքավորումներ, ներկատրորիչներ, ներկապուլտեր, ատրճանակ-ներկափողարարներ։ Շինարարական մեքենաներից բացի, շինարարության մեջ կիրառվում են մեքենայացման այնպիսի միջոցներ, ինչպիսիք են ամբարձիչ կռունկները, վերամբարձ-տրանսպորտային մեքենաները (գլխավորապես մոնտաժային աշխատանքների համար), բեռնիչները, բեռնաթափիչները, կոնվեյերները, բեռնատար ավտոմոբիլները, տրակտորները, քարշակները և այլն, ինչպես նաև ձեռքի գործիքները։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 8, էջ 501 CC-BY-SA-icon-80x15.png