Մարինոս Քարամյան
| Մարինոս Քարամյան | |
|---|---|
| Ծնվել է | 1894 |
| Ծննդավայր | Դվին Քուրդքենդ, Երևանի գավառ, Երևանի նահանգ, Ռուսական կայսրություն |
| Մահացել է | 1983 |
| Մահվան վայր | Արտաշատի շրջան, Հայկական ԽՍՀ, ԽՍՀՄ |
| Քաղաքացիություն |  ԽՍՀՄ |
| Պարգևներ և մրցանակներ |  և  |
Մարինոս Ասատուրի Քարամյան (Քյարամյան) (1894, Դվին Քուրդքենդ, Երևանի գավառ, Երևանի նահանգ, Ռուսական կայսրություն - 1983, Արտաշատի շրջան, Հայկական ԽՍՀ, ԽՍՀՄ), հայ խորհրդային խաղողագործ, գյուղատնտեսական արտադրության առաջավոր։ Սոցիալիստական աշխատանքի հերոս (1949)[1]։
Կենսագրություն
[խմբագրել | խմբագրել կոդը]Ծնվել է 1894 թվականին Ռուսական կայսրության Երևանի նահանգի Նորաշեն գյուղում (այժմ՝ ՀՀ Արարատի մարզի կազմում), աղքատ գյուղացու ընտանիքում[2]։
1910 թվականին ամուսնացել է Հայրապետ Սարգսի Քարամյանի հետ։ 1921 թվականին ամուսինները բոլշևիկների կողմից ակտիվ մասնակցություն են ունեցել փետրվարյան ապստամբությանը։ Մարինոս Քարամյանը եղել է Վեդիի մոտ գտնվող երրորդ գնդի ութերորդ պարտիզանական վաշտի չորրորդ դասակի կազմում։ Պարտիզան Քարամյանը մինչև ապստամբության ավարտը մշտապես գտնվել է ռազմաճակատում և զինվորներին ապահովել է զինամթերքով և սննդով[2]։
Հայաստանում խորհրդային իշխանության հաստատումից հետո Մարինոս Քարամյանը զբաղվել է հասարակական գործունեությամբ։ 1923 թվականին մասնակցել է Հայկական ԽՍՀ Սովետների III համագումարին[3]։ Գյուղատնտեսության կոլեկտիվացումից հետո՝ 1931 թվականից, Քարամյանն աշխատել է ՀԽՍՀ Արտաշատի շրջանի Գետազատի կոլտնտեսությունում (հետագայում կոչվել է Ստալինի անունով)։ Նշանակվել է կոլտնտեսության խաղողագործության օղակի օղակավար։ Հետևողականորեն իրականացնելով խաղողի մշակության ագրոտեխնիկական միջոցառումները՝ Քարամյանի ղեկավարությամբ օղակին հաջողվել է բարելավել հողագործության մշակույթը և հնարավորինս սեղմ ժամկետում ավարտել աշխատանքները։ Ամեն տարի Քարամյանի օղակը խաղողի բարձր բերքատվություն է ապահովել։ 1939 և 1940 թվականներին եղել է Համամիութենական գյուղատնտեսական ցուցահանդեսին մասնակցելու թեկնածու։ Մինչև 1948 թվականը օրգանական և հանքային պարարտանյութերի օգտագործման և բույսերի սնուցման արդյունավետ կազմակերպման շնորհիվ Քարամյանի ղեկավարությամբ օղակը ստացել է խաղողի ռեկորդային բերք՝ 160 ցենտներ մեկ հեկտարից, 7,5 հեկտար ընդհանուր մակերեսով այգիներից[4]։
ԽՍՀՄ Գերագույն խորհրդի նախագահության 1949 թվականի սեպտեմբերի 27-ի հրամանագրով խաղողի բարձր բերքատվություն ապահովելու, կոլտնտեսության կողմից բոլոր տեսակի գյուղատնտեսական մթերքների պարտադիր առաքումներն ու պայմանագրերը կատարելու, ՄՏԿ-ի աշխատանքների դիմաց բնամթերային վճարումները ժամանակին կատարելու համար 1948 թվականին Մարինոս Ասատուրի Քարամյանը[Նշում 1] արժանացել է Սոցիալիստական աշխատանքի հերոսի կոչման, նրան է հանձնվել Լենինի շքանշան և «Մուրճ ու մանգաղ» ոսկե մեդալ[5]։
1950 թվականին Մարինոս Քարամյանին հաջողվել էր խաղողի ավելի բարձր բերք ստանալ՝ 200,5 ցենտներ մեկ հեկտարից, 3,5 հա ընդհանուր մակերեսով այգիներից, ինչի համար նրան շնորհվել է Լենինի երկրորդ շքանշանը[6]։ 1951 թվականին Քարամյանը թոշակի է անցել[4]։
Մարինոս Ասատուրի Քարամյանը զբաղվել է նաև ակտիվ հասարակական գործունեությամբ։ Ընտրվել է ՀԽՍՀ Գերագույն խորհրդի 3-րդ գումարման պատգամավոր[7]։
Պարգևներ
[խմբագրել | խմբագրել կոդը]- Սոցիալիստական աշխատանքի հերոս (ԽՍՀՄ Գերագույն խորհրդի նախագահության 1949 թվականի սեպտեմբերի 27-ի հրամանագիր, Լենինի շքանշան և «Մուրճ ու մանգաղ» մեդալ) - խաղողի բարձր բերքատվություն ապահովելու, կոլտնտեսության կողմից բոլոր տեսակի գյուղատնտեսական մթերքների պարտադիր առաքումներն ու պայմանագրերը կատարելու, ՄՏԿ-ի աշխատանքների դիմաց բնամթերային վճարումները ժամանակին կատարելու համար[5],
- Լենինի շքանշան (21.07.1950)[5][6]։
Գրականություն
[խմբագրել | խմբագրել կոդը]- Саакян В. М., Геворкян В. А. Карамян Маринос Асатуровна // Герои Социалистического Труда Армении = Հայաստանի սոցիալիստական աշխատանքի հերոսները. — Ер.: Айпетрат, 1960. — С. 239—242. — 325 с.
- Виноделие и виноградарство СССР : орган Главного управления винодельческой промышленности Министерства пищевой промышленности СССР. — 1950. — Т. 10. — № 12. — С. 11.
Նշումներ
[խմբագրել | խմբագրել կոդը]- ↑ ԽՍՀՄ Գերագույն խորհրդի նախագահության հրամանագրում նշվում է «Քյարամյան» ազգանունը
Ծանոթագրություններ
[խմբագրել | խմբագրել կոդը]- ↑ Лица, удостоенные почётных званий СССР. Герои Социалистического Труда // Армянская советская энциклопедия / Виктор Амазаспович Амбарцумян. — Ер., 1987. — Т. 13. Советская Армения. — С. 666. — 688 с.
- 1 2 Герои Социалистического Труда Армении, 1960, էջ 240
- ↑ Герои Социалистического Труда Армении, 1960, էջ 240—241
- 1 2 Герои Социалистического Труда Армении, 1960, էջ 241
- 1 2 3 Մարինոս Քարամյան «Երկրի հերոսներ» կայքում
- 1 2 Виноделие и виноградарство СССР, 1950, էջ 11
- ↑ Герои Социалистического Труда Армении, 1960, էջ 241—242
Արտաքին հղումներ
[խմբագրել | խմբագրել կոդը]
|
