Հենրի Հեյս

Վիքիպեդիայից՝ ազատ հանրագիտարանից
Jump to navigation Jump to search
Հենրի Հեյս
Ծննդյան ամսաթիվնոյեմբերի 10, 1954(1954-11-10)
ԾննդավայրՄիսսուրի, ԱՄՆ
Մահվան ամսաթիվհունիսի 6, 1997(1997-06-06) (42 տարեկան)
Մահվան պատճառelectrocution?
Սպանություն

Հենրի Ֆրենսիս Հեյս (անգլ.՝ Henry Francis Hays, նոյեմբերի 10, 1954(1954-11-10), Միսսուրի, ԱՄՆ - հունիսի 6, 1997(1997-06-06)), ամերիկացի մարդասպան, Կու-կլուքս-կլանի անդամ, որը մահապատժի է ենթարկվել 1981 թվականին Մոբիլ քաղաքում իրականացված աֆրոամերիկացի Մայքլ Դոնալդի դաժան սպանության համար։ Հենրի Հեյսի հայտնի է դարձել այն բանի շնորհիվ, որ նա ԿԿԿ-ի միակ անդամն է, որը մահապատժի է ենթարկվել 20-րդ դարում[1]։

Կենսագրություն[խմբագրել | խմբագրել կոդը]

Հենրի Ֆրենսիս Հեյսը ծնվել է 1954 թվականի նոյեմբերի 11-ին Միսուրի նահանգում՝ Բեննիի և Օփալ Հեյսի ընտանիքում։ Նրա հայրը՝ Բեննի Ջեք Հեյսը, UKA կազմակերպության տարածաշրջանային առաջնորդն էր, որն ամենամեծն էր ԿԿԿ-ի կազմում[2]։ Հենրին մեծացել է Միսսուրիում և ստացել է կրոնական կրթություն, այցելել է կաթոլիկ եկեղեցու գանձատներից մեկը: Պատանեկության տարիներին նա տարվել է հիպիների փիլիսոփայությամբ և միացել այդ ենթամշակույթի ընկերություններից մեկին, ինչի պատճառով նրա և նրա հոր միջև կոնֆլիկտ է տեղի ունեցել։ Որոշ ժամանակ Հենրին աշխատում էր որպես ավտոմեքենաների կայանող։ Հետագայում նա որոշում է կայացրել վերադառնալ ընտանիք և կարգավորել հակամարտությունը, ինչի համար հայրը նրան որոշակի պայմաններ է դրել և ստիպել է անդամակցել ԿԿԿ-ին: Ընդհանուր առմամբ՝ Բեննի Հեյսը վիճել է իր որդու հետ մոտ 7 տարի[3]։

1981 թվականի մարտի 20-ի երեկոյան Մոբիլի փողոցներից մեկում Հենրի Հեյսը և Ջեյմս Նոուլզը (17 տարեկան) զենքի սպառնալիքով իրենց մեքենայի մեջ են գրավել աֆրոամերիկացի Մայքլ Դոնալդին (19 տարեկան): Առևանգողները տղային տեղափոխել են հարևան փողոց, որտեղ մարտի 21-ի վաղ առավոտյան դաժան ծեծի են ենթարկել և լինչել՝ ծառի վրա կախելով այն տան դիմաց, որտեղ ապրել է Բեննի Հեյսը: Ոստիկանությունը չի կարողացել երիտասարդի սպանությունը կապել ԿԿԿ-ի հետ։ Ոստիկանությունը ձերբակալել է երեք կասկածյալների, որոնք առնչություն չեն ունեցել սպանության հետ և շուտով ազատ է արձակել նրանց: 1981 թվականի հունիսին հետաքննությունը գրեթե դադարեցվել էր։ Սպանության հիմնական շարժառիթը հայտարարվել Է թմրանյութերի առևտրի մեջ Դոնալդի ներգրավումը, թեև հետագայում դրա վերաբերյալ ապացույցները չեն հայտնաբերվել[4]։

Այն հայտարարությունից հետո, որ Դոնալդի սպանության գործը փակման եզրին է, նրա հարազատները բողոքի երթ են կազմակերպել ոստիկանների կամայականությունների և կոռումպացված պաշտոնյաների դեմ: Պիկետին աջակցելու է եկել Ջեսսի Ջեքսոնը, ընդամենը քաղաքի փողոցներ են դուրս եկել շուրջ 8000 մարդ: Հասարակական նման արձագանքից հետո հետաքննությունը վերսկսվել է։ 1983 թվականին քննությանը հաջողվել է գտնել վկա, որը ցուցմունք է տվել Ջեյմս Նոուլզի դեմ՝ հայտարարելով, որ նա ներկայացել է 1981 թվականի մարտի 21-ի երեկույթին՝ արյունոտ վերնաշապիկով։ Երկրորդ վկան հայտարարել է, որ Հեյսը խոստովանել է իր սպանությունը։ 1983 թվականի հունիսին ձերբակալելով երկու կասկածյալներին՝ ոստիկանները խաչաձև հարցաքննություն են կազմակերպել, որի ժամանակ Նոուլզը չի դիմացել և գործարքի գնացել արդարադատության հետ։ Նոուլզը խոստովանել է Դոնալդի սպանությունը, պատմել է սպանության մանրամասները և ցուցմունք տվել Հենրի Հեյսի վրա[4]։

Սպանության շարժառիթը ռասայական ատելությունն ու վրեժխնդրությունն էր աֆրոամերիկացի Ջոզեֆ Անդերսոնի կողմից իրականացված ոստիկանի սպանության համար[5]։ Անդերսոնի դատը տեղի է ունեցել 1981 թվականի գարնանը Մոբիլում: Անդերսոնը մոտ էր հանցագործության արդարացմանը, և 1981 թվականի մարտի 20-ին Բեննի Հեյսը կարգադրել էր սպանել որևէ սևամորթ մարդու՝ ի պատասխան Անդերսոնի հնարավոր ազատ արձակման[6]։ Հենրի Հեյսը հերքել է իր մասնակցությունը սպանությանը և պնդել իր անմեղությունը։ Այնուամենայնիվ, Ջեյմս Նոուլզի ցուցմունքների հիման վրա[7] Հեյսը 1983 թվականի դեկտեմբերի 20-ին մեղավոր է ճանաչվել Մայքլ Դոնալդի սպանության մեջ և 1984 թվականի փետրվարի 2-ին դատապարտվել մահապատժի էլեկտրական աթոռի վրա[8]։ Ջեյմս Նոուլզը հետաքննության հետ համագործակցելու համար խուսափել է մահապատժից և ցմահ բանտարկություն ստացել[9]։

Կյանքի հետագա բոլոր տարիները Հեյսն անցկացրել է մահապարտների խցում՝ սպասելով մահապատժի «Holman Correctional Facility» բանտում։ 1988 թվականին նրա հորը նույնպես սպանության մեղադրանքներ են ներկայացվել, սակայն Բեննի Հեյսը մահացել է մինչև 1993 թվականի դատավճռի կայացումը[10]։ Անազատության մեջ գտնվելով՝ Հենրին մի քանի հարցազրույց են տվել։ Իր վերջին հարցազրույցում, որը նա տվել էր մահապատժից մի քանի ամիս առաջ, Հենրին պատմել է իր կենսագրության որոշ մանրամասներ և շարունակել պնդել, որ ինքը առնչություն չունի 1981 թվականի մարտին տեղի ունեցած սպանության հետ։ Նրա հանցակիցը՝ Ջեյմս Նոուլզը, 2008 թվականին՝ 25 տարի բանտում անցկացնելուց հետո, պայմանական վաղաժամկետ ազատման իրավունք է ստացել։ Նոուլզը միջնորդություն է ներկայացրել և 2010 թվականին ազատ է արձակվել՝ բանտարկության մեջ անցկացնելով մոտ 27 տարի[11]։

Հենրի Ֆրենսիս Հեյսը մահապատժի է ենթարկվել 1997 թվականի հունիսի 6-ին[12]։ Մահապատժից առաջ Հեյսը մեղքերը խոստովանել է քահանային։ Հեյսի մահից հետո քահանա Բոբ Սմիթը խախտել է խոստովանության գաղտնիքը՝ հայտարարելով, որ մահապատժի ենթարկվածը 40 րոպե տևողությամբ խոստովանության ժամանակ խոստովանել Է Մայքլ Դոնալդի առևանգումն ու սպանությունը[13]։

Ծանոթագրություններ[խմբագրել | խմբագրել կոդը]