Հայկազ Երանոսյանը ծնվել է 1923 թվականին, Ախուրյանի շրջանիՇիրակ գյուղում։ 1938 թվականից որպես սկսնակ դերասան աշխատել է Լենինականի թատրոնում։ 1941 թվականին ավարտել է Լենինականի № 51 դպրոցը, վեց ամիս սովորել է Թիֆլիսի հրետանային ուսումնարանում։ Մասնակցել է Երկրորդ համաշխարհային պատերազմին։ 1944-1949 թվականներին սովորել է Երևանի թատերական ինստիտուտի թատերագիտական բաժնում։ 1949-1951 թվականներին Հայաստանի արվեստի գործերի վարչությունում եղել է խաղացանկային բաժնի վարիչ, 1951-1953 թվականներին ղեկավարել է ժողովրդական ստեղծագործության հանրապետական տան աշխատանքները։ 1954-1970 թվականներին եղել է Երևանի Հովհաննես Թումանյանի անվան տիկնիկային, Երևանի պատանի հանդիսատեսի, Հակոբ Պարոնյանի անվան երաժշտական կոմեդիայի թատրոնների տնօրենը։ 1970-1980 թվականներին եղել է ՀՀ մշակույթի նախարարության «Կուլտուր-լուսավորական աշխատանք» ամսագրի գլխավոր խմբագիրը, 1980-1988 թվականներին՝ ՀԽՍՀ մշակույթի նախարարության գլխավոր խմբագիր։ 1988-2008 թվականներին եղել է Հայաստանի թատերական գործիչների միության Դերասանի տան տնօրենը, միաժամանակ՝ «Հայ թատրոնի պատմություն» է դասավանդել Երևանի թատրոնի և կինոյի պետական ինստիտուտում։ Հեղինակ է մենագրությունների, ավելի քան 100 թատերական հոդվածների, ուսումնասիրությունների, անվանի թատերական գործիչներին նվիրված գրքույկների[1][2][3]։