0,5-1,5 սմ տրամագծով, փռված, փոքր թմբիկով, սպիտակ գլխարկը շատ փոքր է։ Ոտիկին կպած թիթեղները նեղ են, սպիտակ։ Թելանման, կարճ ոտիկը աճում է սկլերոցիումի միջից։ Վառ գունավորված նարնջադեղնավուն սկլերոցիումները խոշոր են և առաջանում են թիթեղավոր սնկերի չորացած պտղամարմինների մնացորդների վրա։ Սպորափոշին սպիտակ է, իսկ սպորները՝ 4-5 × 2,5 մկմ և անգույն[1]։
Ընդհանուր արեալը ենդգրկում է Եվրոպան, Ասիան, Հյուսիսային Ամերիկան, Հարավային Կովկասը (Ադրբեջան, Հայաստան)։ Հայաստանում հայտնաբերված է Զանգեզուրի ֆլորիստիկական շրջանում՝ Գորիս-Շուրնուխ ճանապարհին, կաղնու-բոխու անտառներում, Pholiotina appendiculata սնկի սկլերոցիումների և պտղամարմինների վրա և Գորիսի շրջակայքի սոճուտներում Agaricales կարգի ներկայացուցիչների վրա[1]։
Արեալը նեղ է և սահմանափակ։ Հանդիպում են խմբերով թիթեղավոր սնկերի պտղամարմինների մնացորդների, փռոցաշերտի, հողի, գլխարկավոր սնկերի փտած կամ չորացած պտղամարմինների վրա, սեպտեմբեր ամսին։ Փռոցաշերտային, հումուսային սապրոտրոֆ կամ միկոֆիլ է[1]։
