Թխկի ասորական
| Թխկի ասորական | |
| Դասակարգում | |
| Թագավորություն | Բույսեր (Plantae) |
| Տիպ/Բաժին | Անոթավոր բույսեր (Tracheophyta) |
| Ենթատիպ | Սերմնավոր բույսեր (Spermatophytes) |
| Կարգ | Օճառածաղկավորներ (Sapindales) |
| Ընտանիք | Օճառազգիներ (Sapindaceae) |
| Ենթաընտանիք | Hippocastanoideae |
| Ցեղ | Թխկի (Acer) |
| Տեսակ | Թխկի ասորական (A. assyriacum) |
| Միջազգային անվանում | |
| Acer assyriacum | |
Թխկի ասորական (լատին․՝ Acer assyriacum), թխկազգիների ընտանիքի, թխկի ցեղի բույս։
Նկարագրություն[խմբագրել | խմբագրել կոդը]
Փոքր ծառ է, 8-10 մետր բարձրությամբ և 30-40 սմ բնի հաստությամբ։ Երիտասարդ ճյուղերի կեղևը բաց շագանակագույն է։ Տերևները կաշվեկերպ են, եռաբլթակ, 3-5 սմ երկարությամբ, 4-6 սմ լայնությամբ։ Ծաղիկներն անշուք են՝ դեղնականաչավուն։ Երկթևիկները լայն են, կլորավուն սերմերով։ Տարածված է Կովկասում, Փոքր Ասիայում, Իրանում։ Հայաստանի Հանրապետության սահմաններում հանդիպում է միայն Վայքում և Ջանգեզուրում։ Աճում է չոր, քարքարոտ թեքություններում, նոսրանտառներում, ծովվի մակարդակից մինչև 1600 մետր բարձրությունների վրա։ Տիպիկ չոր կլիմայի բույս է։ Աչքի է ընկնում բարձր երաշտադիմացկունությամբ։ Պահանջկոտ չէ հողի նկատմամբ։ Աճում է բոլոր տեսակի հողերում։ Բավականին ջերմասեր է, բայց դիմանում է մինչև -25 °C-ի սառնամանիքներին։ Չափազանց լուսասեր է։ Արժանի է ուշադրության, որպես հեռանկարային տեսակ՝ հատկապես հանրապետության ցածրադիր գոտու բնակավայրերի կանաչապատման և անտառապատման բնագավառում օգտագործելու համար։ Փայտանյութը շատ ամուր է և ծանր, պիտանի է ատաղձագործական իրեր պատրաստելու համար։ Բազմանում է սերմերով և բնային մացառներով։
Կիրառություն[խմբագրել | խմբագրել կոդը]
Էկոլոգիական խումբը՝ VIII: Մշակության հավանական շրջանները՝ 9, 17-18, 20ա, 22-28, 31 -32[1]։
Ծանոթագրություններ[խմբագրել | խմբագրել կոդը]
- ↑ Հարությունյան Լ․ Վ․, Հարությունյան Ս․ Լ․, Հայաստանի դենդրոֆլորան, հ. 2, Երևան, «Լույս հրատարակչություն», 1985, էջ 130։
|
