Դուբայ մոլ
 | |
| 🌐 | thedubaimall.com(անգլ.)(արաբ.) |
 | |
 | |
Դուբայ մոլ, ամենախոշոր ժամանցային կենտրոնն աշխարհում, գտնվում է Դուբայի դաունթաունում։ Կենտրոնի ընդհանուր մակերեսը 1․2 միլիոն մ² է, առևտրային տարածքը՝ 350 244 մ²։ 2009 թվականին Դոհայի փողոցի կողմից կառուցվել է համալիրի երկհարկանի մուտք։
Երկու անգամ հետաձգվելուց հետո Դուբայ մոլը բացվել է 2008 թվականի նոյեմբերի 4-ին՝ մոտ 1000 մանրավաճառով, որը պատմության մեջ երկրորդ ամենամեծ մանրածախ առևտրի կենտրոնն էր «West Edmonton Mall»-ից հետո։ Այնուամենայնիվ, այն չունի ամենամեծ վարձակալվող տարածքը։ Այդ կատեգորիայում այն զիջում է 19 առևտրի կենտրոնի, ներառյալ՝ «New South China Mall», որը մեծությամբ երկրորդն է աշխարհում, «Golden Resources Mall», «SM City North Edsa» և «SM Mall of Asia»։
Նկարագրություն[խմբագրել | խմբագրել կոդը]
Մոլի պաշտոնական բացումը կայացել է 2008 թվականի նոյեմբերի 4-ին։ Դուբայ մոլը «Emaar Properties» խմբի ստորաբաժանում «Emaar Malls Group» ընկերության առաջատար նախագիծն է։ Այն զբաղվում է նաև առևտրի կենտրոններով։ Այստեղ մեկ հարկի տակ 1200 խանութ կա, ինչպես նաև համաշխարհային մակարդակի մշակութային և զվարճանքի օբյեկտներ[1]։ Դուբայ մոլում գտնվող տեսարժան վայրերից և հաստատություններից են․
- SEGA Republic - տարածաշրջանի առաջին թեմատիկ այգին, որի տարածքը մոտ 7600 մ² է։
- Gold Souk - աշխարհի ամենամեծ «Ոսկյա շուկան»՝ 220 խանութով։
- «Նորաձևության կղզի»՝ 44 000 մ² մակերեսով, հատկացված է համաշխարհային բրենդների 70 խանութի, այդ թվում՝ Versace, Burberry, Roberto Cavalli, Galliano, Hermès, Givenchy, Missoni, Tom Ford և Ermenegildo Zegna[1]։
- Galeries Lafayette ընկերության՝ Մերձավոր Արևելքի առաջին հանրախանութը
- KidZania մանկական ժամանցի և կրթական կենտրոն՝ 8000 մ² մակերեսով
- Դուբայ մոլի ակվարիում՝ աշխարհի ամենամեծ ակվարիումներից մեկը
- Կինոթատրոնների համալիր՝ 22 էկրանով
- Օլիմպիական չափերի սահադաշտ
- Շարժվող տանիքով ծածկված փողոց՝ «The Grove»
Առևտրի կենտրոնն ունի փակ ավտոկայանատեղի՝ նախատեսված 14 000 մեքենայի համար։ Դուբայ մոլի հարևանությամբ գտնվում է «The Address» հինգաստղանի հյուրանոցը, որն ունի 250 սենյակ և 450 սպասարկվող բնակարան։ Դուբայ մոլը գտնվում է այսպես կոչված «աշխարհի ամենահեղինակավոր քառակուսի կիլոմետրի վրա»՝ Բուրջ Խալիֆայի դաունթաունում, որը կառուցված է աշխարհի ամենաբարձր շինության՝ Բուրջ Խալիֆայի շուրջը։ Օլիմպիական չափսերի սահադաշտը, որն օգտագործվում է ոչ միայն սիրողական նպատակներով, այլև տարբեր հանրային և մասնավոր միջոցառումների կազմակերպման համար, ունի փակ ծառուղի՝ շարժական տանիքով։
Դուբայ մոլի տանիքի տակ տեղակայված եզակի օբյեկտների թվում է աշխարհի ամենամեծ փակ ակվարիումը, որտեղ կարելի է տեսնել ավելի քան 33 000 ձուկ և ծովային կենդանիներ, այդ թվում՝ շնաձկներ և կատվաձկներ։ Ակվարիումի միջով, որը պարունակում է 10 միլիոն լիտր ջուր, անցնում է ապակյա ծածկով թունել, որպեսզի այցելուները կարողանան մոտ հեռավորությունից դիտել իրենց վերևում լողացող ակվարիումի բնակիչներին։ Ակվարիումի վերևում գտնվում է «Discovery Center»-ը, որտեղ կարելի է ավելին իմանալ ծովերի և օվկիանոսների կյանքի մասին։
Միջադեպեր[խմբագրել | խմբագրել կոդը]
- 2010 թվականի փետրվարի 25-ին ակվարիումից (որը պարունակում է շնաձկներ) արտահոսք է տեղի ունեցել, ինչի պատճառով շատ խանութներ ժամանակավորապես փակվել են և գնորդներին ստիպել անմիջապես հեռանալ առևտրի կենտրոնից։ Հաջորդ օրն այն վերաբացվել է[2]։
- 2015 թվականի մարտին հարյուրից ավելի օտարերկրյա աշխատողներ բողոքի ցույց են կազմակերպել Դուբայ մոլի առջև՝ արտաժամյա աշխատավարձերը չվճարելու պատճառով՝ խաթարելով երթևեկությունը տարածքում։ Ոստիկանությունը մեկ ժամվա ընթացքում իրավիճակը վերցրել է հսկողության տակ[3]։
- 2015 թվականի դեկտեմբերի 31-ին առևտրի կենտրոնը տարհանվել է «Address» հյուրանոցում բռնկված խոշոր հրդեհի պատճառով, որը գտնվում է կենտրոնի հարևանությամբ։
- 2016 թվականի դեկտեմբերին բրիտանացի հեռուստահաղորդավար Ռիչարդ Համոնդը իր տանկով մտել է Դուբայ մոլ՝ որպես Grand Tour-ի հնարք[4]։
- 2017 թվականի ապրիլի 24-ին տեղի է ունեցել հոսանքազրկում, ինչի հետևանքով առևտրի կենտրոնն անջատվել է 90 րոպեով։ Մոտակա այլ տարածքներ չեն տուժել։
- 2019 թվականի նոյեմբերին հեղեղվել են առևտրի կենտրոնի մեծ տարածքները[5][6]։
Ծանոթագրություններ[խմբագրել | խմբագրել կոդը]
- ↑ 1,0 1,1 The Dubai Mall Guide.// Everything you need. Dubai: — 2009.
- ↑ «Aquarium leak hits Dubai Mall». Gulfnews.com. 2010 թ․ փետրվարի 26. Վերցված է 2014 թ․ փետրվարի 25-ին.
- ↑ Dana Moukhallati. «Police resolve workers' protest in Downtown Dubai». thenational.ae. Վերցված է 2015 թ․ սեպտեմբերի 17-ին.
- ↑ «Jeremy Clarkson drives tank through Dubai mall». Newshub.
{{cite news}}: More than one of|website=and|newspaper=specified (օգնություն) - ↑ «DUBAI MALL FLOODED WITH RAIN WATER INSIDE #dubairain #dubaimall #dubaimallflood». www.youtube.com.
- ↑ Report, Web. «Emaar responds after water enters Dubai Mall during rain». Khaleej Times.
Արտաքին հղումներ[խմբագրել | խմբագրել կոդը]
- Dubai Mall thedubaimall.com
- The Dubai Mall Guide. Dubai: - 2009.
- The Dubai Mall․ Շոփագոլիկի երազանքը
 | Վիքիպահեստն ունի նյութեր, որոնք վերաբերում են «Դուբայ մոլ» հոդվածին։ |
| ||||||
