Ասպիրակ Վանհուտի (լատին․՝ Spiraea Vanhouttei), մինչև 2 մ բարձրությամբ, խիտ, աղեղնաձև ճյուղավորված, կլորավուն պ-սակով հիբրիդային (Ա.կանտոնյան x Ա.եռաբլթակ) թուփ է։
Տերևները ռոմբաձև են, մինչև 3,5 սմ երկարության, 3-5 բլթականի, թույլ ատամնաեզր, տերևաթիթեղի վերին մասը մուգ կանաչ է, ստորինը՝ կապտականաչավուն։ Ծաղիկները մանր են, սպիտակ, հավաքված տափակավուն հովանոցանման ծաղկաբույլերում։ Երևանում ծաղկում է շատ առատ, մայիսի առաջին տասնօրյակում՝ շուրջ 35 օր տևողությամբ։ Ծաղկման շրջանում ամբողջովին թուփը սպիտակ է, տպավորություն է ստեղծվում, թե պատված է ձյան փաթիլներով։
Վանհուտի ասպիրակն արագաճ է, ցրտադիմացկուն, լուսասեր, ջերմասեր, չորադիմացկուն, լավ է դիմակայում քաղաքային աղտոտվածությունը։ Հողի նկատմամբ պահանջկոտ չէ, հաջողությամբ բազմանում է ցողունային կտրոններով։ Խորհուրդ է տրվում օգտագործել մեր հանրապետության բոլոր գոտիների կանաչ տնկարկներում։
