Ապրես Գասպարյան
| Ապրես Գասպարյան | |
|---|---|
| Ծնվել է | 1918 |
| Ծննդավայր | Վարդենիս, Նոր Բայազետի գավառ |
| Մահացել է | 2000 |
| Մահվան վայր | Վարդենիս, Գեղարքունիքի մարզ, Հայաստան |
| Քաղաքացիություն |  ԽՍՀՄ |
| Մասնագիտություն | կոմբայնավար |
| Կուսակցություն | ԽՄԿԿ |
| Պարգևներ և մրցանակներ |  և  |
Ապրես Բեգլարի Գասպարյան (1918, Վարդենիս, Նոր Բայազետի գավառ - 2000, Վարդենիս, Գեղարքունիքի մարզ, Հայաստան), խորհրդային հայ կոմբայնավար, գյուղատնտեսական արտադրության առաջավոր։ Սոցիալիստական աշխատանքի հերոս (1952)[1][2]։
Կենսագրություն[խմբագրել | խմբագրել կոդը]
Ապրես Գասպարյանը ծնվել է 1918 թվականին Հայաստանի Առաջին Հանրապետության Բասարգեչար գյուղում (այժմ՝ ՀՀ Գեղարքունիքի մարզ, քաղաք Վարդենիս)։ 1926 թվականից Ապրես Գասպարյանը սովորել է ՀԽՍՀ Բասարգեչարի շրջանի Մեծ Մազրա գյուղի միջնակարգ դպրոցում, որն ավարտել է 1935 թվականին[3]։
1936 թվականից Ապրես Գասպարյանը ՀԽՍՀ Բասարգեչարի շրջանի Մեծ Մազրա գյուղի կոլտնտեսության կոլտնտեսական էր։ 1938 թվականին նշանակվել է կոլտնտեսության տրակտորային բրիգադի հաշվետար, իսկ որոշ ժամանակ անց, ստանալով մասնագիտական կրթություն, դառնում է մեխանիզատոր[3]։ 1941 թվականին Երկրորդ համաշխարհային պատերազմի սկսվելուց հետո Գասպարյանը զորակոչվել է Բանվորագյուղացիական կարմիր բանակ։ Ռազմաճակատում է եղել մինչև 1944 թվականը, որից հետո զորացրվել է բանակից[4]։
1944 թվականին Ապրես Գասպարյանը նշանակվում է ՀԽՍՀ Բասարգեչարի շրջանի Նորակերտի մեքենատրակտորային կայանի (ՄՏԿ) տրակտորային բրիգադի կոմբայնավար և բրիգադիր։ 1951 թվականին բրիգադը Գասպարյանի գլխավորությամբ սկսեց սպասարկել Բասարգեչարի շրջանի Փոքր Մազրա գյուղի կոլտնտեսությունը։ Ցորենի առատ բերքահավաքի ժամանակ Գասպարյանը գերազանց տեխնիկական խնամք է ապահովել աշխատող մեքենաներին՝ դրանց շահագործումը կազմակերպելով արդյունավետ աշխատանքային գրաֆիկով։ Արդյունքում բրիգադի մեքենավարներն ամեն օր գերակատարել են նախանշված աշխատանքային պլանները։ Բրիգադիր Գասպարյանը 24 աշխատանքային օրվա ընթացքում իր «Ստալինեց-6» կոմբայնով կալսել է 7934 ցենտներ հացահատիկ և 27 ցենտներ խոտի սերմ[5]։
ԽՍՀՄ Գերագույն խորհրդի նախագահության 1952 թվականի հունիսի 2-ի հրամանագրով, 1951 թվականին հացահատիկային կուլտուրաների և խոտի սերմերի բերքահավաքի և կալսման գործում բարձր արդյունքների հասնելու համար Ապրես Բեգլարի Գասպարյանին շնորհվել է Սոցիալիստական աշխատանքի հերոսի կոչում՝ նրան հանձնելով Լենինի շքանշան և «Մուրճ ու մանգաղ» ոսկե մեդալ[6]։
Հետագա տարիներին բրիգադիր Ապրես Գասպարյանը սիստեմատիկորեն գերակատարել է արտադրական պլանները։ 1954 թվականին մասնակցել է Համամիութենական գյուղատնտեսական ցուցահանդեսին։ Աշխատանքային ձեռքբերումների համար Գասպարյանը պարգևատրվել է ՀԽՍՀ Գերագույն խորհրդի պատվոգրով։ 1955 թվականին ընդունվել է ԽՄԿԿ շարքերը[5]։ Մեքենա-տրակտորային կայանների լուծարումից հետո 1959 թվականի մարտին Ապրես Գասպարյանը նշանակվել է Բասարգեչարի ավտոմոբիլային վարչության տնօրեն[7]։
Ապրես Գասպարյանը մահացել է 2000 թվականին ՀՀ Գեղարքունիքի մարզի Վարդենիս քաղաքում։
Պարգևներ[խմբագրել | խմբագրել կոդը]
- Սոցիալիստական աշխատանքի հերոս (ԽՍՀՄ Գերագույն խորհրդի նախագահության 1952 թվականի հունիսի 2-ի հրամանագիր, Լենինի շքանշան և «Մուրճ և մանգաղ» մեդալ)՝ 1951 թվականին հացահատիկային մշակաբույսերի և խոտի սերմերի բերքահավաքի և կալսման գործում բարձր արդյունքների հասնելու համար[6]
- ՀԽՍՀ Գերագույն խորհրդի պատվավոգիր[5]։
Ծանոթագրություններ[խմբագրել | խմբագրել կոդը]
- ↑ Лица, удостоенные почётных званий СССР. Герои Социалистического Труда // Армянская советская энциклопедия / Виктор Амазаспович Амбарцумян. — Ер., 1987. — Т. 13. Советская Армения. — С. 666. — 688 с.
- ↑ «Гаспарян Апрес Бегларович — Энциклопедия фонда «Хайазг»». ru.hayazg.info. Վերցված է 2023 թ․ օգոստոսի 11-ին.
- ↑ 3,0 3,1 Герои Социалистического Труда Армении, 1960, էջ 93
- ↑ Герои Социалистического Труда Армении, 1960, էջ 93—94
- ↑ 5,0 5,1 5,2 Герои Социалистического Труда Армении, 1960, էջ 94
- ↑ 6,0 6,1 Ապրես Գասպարյան «Երկրի հերոսներ» կայքում
- ↑ Герои Социалистического Труда Армении, 1960, էջ 95
Գրականություն[խմբագրել | խմբագրել կոդը]
- Саакян В. М., Геворкян В. А. Гаспарян Апрес Бегларович // Герои Социалистического Труда Армении = Հայաստանի սոցիալիստական աշխատանքի հերոսները. — Ер.: Айпетрат, 1960. — С. 93—95. — 325 с.
Արտաքին հղումներ[խմբագրել | խմբագրել կոդը]
|
