Սիլվերսան Փիքապս

Վիքիպեդիայից՝ ազատ հանրագիտարանից
Սիլվերսան Փիքապս

Silversun Pickups-ը 2012-ին (ձախից-աջ) Քրիսթոֆեր Գուանլաո, Նիկկի Մոնինգեր, Բրայան Աուբերտ և Ջո Լեսթեր
Հիմնական տվյալներ
Երկիր Լոս Անջելես, Միացյալ Նահանգներ
Ժանրեր Ալտերնատիվ ռոք, ինդի ռոք, դրիմ փոփ, շուգեյզ
Գործունեություն 2002–ներկա
Լեյբլ Dangerbird
Կայք silversunpickups.com
Անդամներ
Բրայան Աուբերտ
Նիկկի Մոննինգեր
Քրիսթոֆեր Գուանլաո
Ջո Լեսթեր
Նախկին անդամներ
Էլվիրա Գոնզալեզ
Ջեք Քեննեդի

Silversun Pickups (Սիլվերսան Փիքապս), ալտերնատիվ ռոք, ինդի ռոք, շուգեյզ նվագող ամերիկյան խումբ Լոս Անջելես քաղաքում։ Կազմավորվել է 2002 թվականին։ Ներկայում բաղկացած է չորս հիմնական անդամներից՝ Բրայան Աուբերտ (Brian Aubert)` կիթառ, վոկալ, Նիկկի Մոննինգեր (Nikki Monninger)` բաս կիթառ, վոկալ, Քրիսթոֆեր Գուանլաո (Christopher Guanlao)` հարվածայիններ, Ջո Լեսթեր (Joe Lester)` դաշնամուր։

Խմբի դեբյուտային մինի ալբոմը՝ Pikul-ը, թողարկվել է 2005 թվականին, առաջին ամբողջական ալբոմը՝ Carnavas-ը՝ 2006-ի հուլիսի 26-ին։ Երկրորդ ստուդիական ալբոմը՝ Swoon-ը, թողարկել են 2009-ի ապրիլի 14-ին։ Խմբի թվով երրորդ ալբոմը` Neck Of The Woods-ը, թողարկվել է 2012-ի մայիսի 8-ին։

Կազմավորումը և պատմությունը[խմբագրել]

Pikul EP (2002-2005)[խմբագրել]

Խմբի անդամներն ընկերներ են, ովքեր նախկինում միասին նվագել են իրենց ընդհանուր ընկերներից մեկի խմբում։ Կարիերան սկսել են Լոս Անջելեսի ակումբներում նվագելով, ամենից հաճախ Սիլվեր Լեյքի Silverlake անունով լաունջում կամ հարևանությամբ գտնվող Spaceland-ում։ Խմբի ծագման վայրը համարվում է Սիլվեր Լեյքը։ Ի սկզբանե խումբը կրում էր A Couple of Couples անվանումը, քանի որ խմբի հին կազմի անդամները զույգերով ռոմանտիկ կապի մեջ էին։ Իսկ խմբի ներկա անվանումը վերցված է Silverlake լաունջի դիմաց գտնվող ալկոհոլային խմիչքի խանութից։

Pikul-ի երգերից մեկը՝ "Kissing Families"-ը նվագելու համար խումբը հրավիրել էր Սիլվեր Լեյքի երաժիշտներից Տանյա Հադենին։[1]

Carnavas (2006-2007)[խմբագրել]

2006 թվականի սեպտեմբերի 26-ին խումբը թողարկում է առաջին ստուդիական ալբոմը՝ Carnavas-ը[2]։ Ալբոմի չորս սինգլներից երկուսը՝ "Lazy Eye"-ը և "Well Thought Out Twinkles"-ը, տեղ են գտնում 2007 թվականի Billboard-ի ժամանակակից ռոք երգերի չարթում։ "Lazy Eye"-ը ընդգրկվել է հայտնի վիդեո խաղերի՝ Rock Band 2-ի և Guitar Hero World Tour-ի երգերի ցուցակում։[3] 2006-ի դեկտեմբերի 9-ին խումբն ավարտում է երեքշաբաթյա շրջագայությունը Wolfmother խմբի հետ որպես տաքացնող խումբ։ Դրանից հետո շրջագայել են OK Go-ի, Snow Patrol-ի հետ Միացյալ Նահանգներում իրենց գարնանային շրջագայության շրջանակում, որն էլ ավարտվեց 2007-ի ապրիլի 10-ին։ Շրջագայությունից հետո համերգային ելույթներով հանդես են եկել մի շարք փառատոններում, այդ թվում՝ Կալիֆորնիա նահանգում անցկացվող Coachella երաժշտական փառատոնին 2007-ի ապրիլի 27-ին։ 2007 թվականի մայիսի 27-ին Carnavas-ը թողարկվեց Եվրոպայում։ Հենց այդ ժամանակ խումբը նվագեց Մեծ Բրիտանիայում և Իռլանդիայում։ Նույն ընթացքում նրանք հանդես եկան որպես տաքացնող խումբ Foo Fighters-ի համերգներին Էդինբուրգ և Դուբլին քաղաքներում։ Silversun Pickups-ը նաև նվագել է Kaiser Chiefs-ի հետ նրանց եվրոպական շրջագայության ժամանակ։ Carnavas-ը Billboard 200 ալբոմների ցուցակում 80-րդ տեղում էր և թողարկման պահից վաճառվել է 435 հազար օրինակով։

Swoon (2008-2010)[խմբագրել]

Երկրորդ ալբոմը՝ Swoon-ը[4], թողարկվել է 2009-ի ապրիլի 14-ին և հիմնականում դրական գնահատականների է արժանացել։ Այն իր թողարկման առաջին շաբաթում վաճառվել է 43 հազար, իսկ ընդհանուր առմամբ՝ 285 հազար օրինակով։ Խմբի վոկալիստը՝ Բրայան Աուբերտը, որոշ երգեր որակել է որպես բավական հանգիստ և նուրբ, մինչդեռ մյուսները՝ աղմկոտ։[5] Առաջին սինգլը՝ "Panic Switch"-ը, թողարկվել է 2009 մարտի 17-ին։ Երգի տեսահոլովակն առաջին անգամ ցուցադրվել է VH1 և MTV երաժշտական ալիքների եթերում։ 2009-ին խումբը MTV Unplugged-ի ժամանակ ակուստիկ կատարումներով ներկայացրել է "Catch and Release"-ը, "Panic Switch"-ը, "Lazy Eye"-ը, "Well Thought Out Twinkles"-ը, "Growing Old is Getting Old"-ը և "Kissing Families"-ը։ 2009-ին Silversun Pickups-ը Գրեմմիի 52-րդ մրցանակաբաշխության ժամանակ նոմինացվել է Լավագույն նոր արտիստ անվանակարգում, ինչը խոսակցությունների առիթ տվեց, քանի որ մինչ 2008-2009 թվականները խումբն արդեն բավական հայտնի էր[6]։ 2009-ի ձմռանը նրանք շրջագայել են Placebo-ի, ինչպես նաև Manchester Orchestra-ի հետ` որպես հիմնական աջակցող խումբ։ 2010-ին խումբը շրջագայել է Muse[7], Against Me!, The Henry Clay People, Birds Of Tokyo խմբերի հետ։ Swoon ալբոմի աջակցությանն ուղղված 18-ամսյա տևած շրջագայությունը խումբն ավարտեց Օստինում համերգով։

Neck of the Woods (2011-ից մինչ այժմ)[խմբագրել]

2011 թվականից Silversun Pickups-ն աշխատում էր թվով երրորդ ստուդիական ալբոմի վրա, որի ընթացքի վերաբերյալ նկարներ և այլ նյութեր ժամանակ առ ժամանակ հրապարակվում էին խմբի սոցիալական էջերում։ Աշնանը խմբի լեյբլը՝ Dangerbird Records-ը, պաշտոնական հայտարարություն արեց այն մասին, որ նոր ալբոմը խումբը պատրաստվում է թողարկել 2012-ի գարնանը[8]։ 2011-ի նոյեմբերի 25-ին խումբը Record Store Day-ի Black Friday-ի շրջանակում թողարկում է Seasick EP-ն 10 դյույմանոց վինիլների վրա։ EP-ն բաղկացած էր խմբի՝ Swoon ալբոմի ձայնագրությունների ժամանակից մնացած 3 երգերից, որոնք մինչ այդ չէին թողարկվել[9]։ Խումբը հատուկ քավեր է արել Բոբ Դիլանի "Not Dark Yet" երգը, որն ընդգրկվել է Chimes of Freedom: Songs of Bob Dylan Honoring 50 Years of Amnesty International ալբոմում։[10] 2012-ի փետրվարի 7-ին հայտարարվեց, որ խումբը կնվագի Sasquatch! Music Festival 2012-ի հիմնական բեմում։ 2012-ի մարտի 7-ին Աուբերտը թվիթերով հայտարարեց նոր ալբոմի` Neck Of The Woods-ի թողարկման օրը՝ 2012-ի մայիսի 8: Ալբոմից առաջին սինգլը "Bloody Mary (Nerve Endings)"-ն է, որը թողարկվել է 2012-ի մարտի 25-ին։[11]

Երաժշտական ոճն ու ազդեցությունը[խմբագրել]

Խմբի հնչողությունը, որը հարուստ է կիթառի խզված ձայնով, շատ հաճախ են նմանեցնում The Smashing Pumpkins խմբի հնչողությանը։

Հղումներ աղբյուրներին[խմբագրել]