Եկատերինա II-ի հուշարձան (Կրասնոդար)
Եկատերինա II-ի հուշարձան | |
---|---|
Եկատերինա II-ի հուշարձանը | |
Տեսակ | հուշարձան |
Բարձրություն | 13,8 մետր |
Երկիր | Ռուսաստան |
Բնակավայր | Կրասնոդար |
Շինության ձև | Հուշակոթող |
Նյութ | բրոնզ, Թուջ, ալյումին և նրբաթերթ ոսկի |
Ներկա վիճակ | Կանգուն |
Catherine II Monument (Krasnodar) Վիքիպահեստում |
Եկատերինա II-ի հուշարձան (ռուս.՝ Памятник Екатерине II), հուշակոթող Կրասնոդարում ի պատիվ Ռուսաստանի կայսրուհի Եկատերինա II-ի։ Բացվել է 1907 թվականին, ավերվել է բոլշևիկների կողմից 1920 թվականին, վերականգնվել 2006 թվականին[1]։
Նկարագրություն[խմբագրել | խմբագրել կոդը]
Կայսրուհու մի ձեռքին գայիսոն է, մյուսին` աշխարհագունդ[1], իսկ ինքը պատկերված է իմաստուն և վեհապանծ` թագավորական ծիրանիով։ Պատվանդանի կենտրոնական մասը զբաղեցնում է 1792 թվականի հուլիսի 1 (12)-ի շնորհագրի տեքստը[1][2]։ Ձախից մարտական դրոշների և ռազմական նշանների ֆոնին պատկերված է իշխան Գրիգորի Պոտյոմկինը։ Աջից կանգնած են Սևծովյան կազակական զորքերի առաջին երեք կոշային ատամաններ Անտոն Գոլովատին, Սիդոր Բելին և Զախարի Չեպեգան։ Հուշարձանի հետնամասում պատկերված են ուղեկցող շան հետ կույր կոբզարը, ինչպես նաև Կուբանի կազակների մասնակցությամբ Ռուսաստանի տարած հաղթանակների ցուցակը[3][4]։
Հուշարձանի պատմություն[խմբագրել | խմբագրել կոդը]
Հուշարձանի նախագիծը մշակել է հայտնի նկարիչ և քանդակագործ Միխայիլ Միկեշինը 1895 թվականին Կուբանի կազակական զորքի 200-ամյա հոբելյանի առթիվ[3]։ Վաղաժամ մահը Միկեշինին թույլ չի տվել ավարտել աշխատանքը, այն շարունակել է քանդակագործ Բորիս Էդուարդսը` հատուկ ռազմական շինարարական հանձնաժողովի անմիջական հսկողության ներքո։ Հուշարձանը հանդիսավորությամբ հիմնադրվել է 1896 թվականի աշնանը, իսկ բացումը տեղի է ունեցել միայն 1907 թվականի մայիսի 6-ին[4][5]։
1920 թվականին հուշարձանն ավերվել է բոլշևիկների կողմից։ Այն վերականգնվել է 2006 թվականին[4][5]։
Նոր հուշարձանը ստեղծել է կուբանցի հայտնի քանդակագործ, Ռուսաստանի նկարիչների միության անդամ Ալեքսանդր Ապոլոնովը[3], որն իր աշխատանքում օգտագործել է հուշարձանի բրոնզե մոդելի լուսանկարները, արխիվային փաստաթղթեր և նկարներ։ Հուշակոթողը ձուլվել է Ռոստովի պետական համալսարանի գեղարվեստական ձուլման արվեստանոցում, ճարտարապետական-քանդակագործական ատրիբուտները պատրաստել է Կրասնոդարի կոմպրեսորների գործարանը[4]։
2011 թվականին Սոչիում նույնպես բացվել է Եկատերինա II-ի հուշարձանը, որը կրասնոդարյանի փոքրացված պատճենն է[1]։
Տեխնիկական տվյալներ[խմբագրել | խմբագրել կոդը]
Հուշարձանի բարձրությունը 13,81 մետր է, ողջ համալիրի լայնությունը` 16 մետր։ Եկատերինայի քանդակի բարձրությունը 4 մետր է, կշռում է 3 տոննա։ Ընդամենը քանդակագործական կոմպոզիցիան պատրաստելու համար օգտագործվել է 25 տոննա բրոնզ, 12 տոննա թուջ, 250 կգ ալյումին և 80 գրամ նրբաթերթային ոսկի։
Գտնվելու վայր[խմբագրել | խմբագրել կոդը]
Հուշարձանը գտնվում է քաղաքի գլխավոր առանցքում` Կրասնայա փողոցում, Եկատերինյան պուրակում։ Հուշարձանի դիմաց Կրասնոդարի երկրամասի օրենսդիր ժողովի շենքն է։ Աջից զորական տաճարն է, որն անվանվել է ի պատիվ իշխան Ալեքսանդր Նևսկու։ Տաճարը հիմնադրված է զորքերի միջոցներով 1853 թվականին և վերականգնվել է, ինչպես և Եկատերինայի հուշարձանը, 2006 թվականին[5]։
Պատկերասրահ[խմբագրել | խմբագրել կոդը]
-
Կազակական ատամանների քանդակները
Ծանոթագրություններ[խմբագրել | խմբագրել կոդը]
- ↑ 1,0 1,1 1,2 1,3 «Памятник Екатерине II». Արխիվացված է օրիգինալից 2016 թ․ դեկտեմբերի 21-ին. Վերցված է 2018 թ․ մարտի 14-ին.
- ↑ «17.058.—Июля 1. Жалованная грамота войску Черноморскому.— О вспоможенiи козакамъ переселяющимся на новопожалованныя сему войску земли». 1.7.1792 года
- ↑ 3,0 3,1 3,2 «Памятник Екатерине II».
- ↑ 4,0 4,1 4,2 4,3 «Памятник Екатерине II (Краснодар)».
- ↑ 5,0 5,1 5,2 «ПАМЯТНИК ЕКАТЕРИНЕ II В ЕКАТЕРИНИНСКОМ СКВЕРЕ». Արխիվացված է օրիգինալից 2018 թ․ մարտի 15-ին. Վերցված է 2018 թ․ մարտի 14-ին.