Բագրատ Խաչատրյան
| Բագրատ Խաչատրյան | |
|---|---|
| Ծնվել է | 1918 |
| Ծննդավայր | Մելիքգյուղ, Հայաստան |
| Մահացել է | անհայտ |
| Քաղաքացիություն |  ԽՍՀՄ |
| Կրթություն | Հայկական պետական մանկավարժական համալսարան |
| Մասնագիտություն | մանկավարժ |
| Կուսակցություն | ԽՄԿԿ |
| Պարգևներ և մրցանակներ |  |
Բագրատ Անուշավանի Խաչատրյան (1918, Մելիքգյուղ, Հայաստան - անհայտ), հայ մանկավարժ, Երկրորդ համաշխարհային պատերազմի Արևելյան ռազմաճակատի («Հայրենական մեծ պատերազմ», 1941-1945) գործողությունների մասնակից։ ԽՄԿԿ անդամ (1943):
Կենսագրություն[խմբագրել | խմբագրել կոդը]
Բագրատ Խաչատրյանը ծնվել է 1918 թվականին, Ապարանի շրջանի Մելիքգյուղում։ Ավարտել է Ապարանի շրջկենտրոնի միջնակարգ դպրոցը, աշխատանքի է նշանակվել Ձորագլխի դպրոցում։ Ընդամենը երկու տարի աշխատելուց հետո 1941 թվականի հունիսի վերջին զորակոչվել է բանակ[1]։
1942 թվականի հունվար-մարտ ամիսներին Ղրիմում կռվել է 390-րդ հայկական դիվիզիայում, Կերչի մատույցներում։ Մարտերից մեկում վիրավորվել է և տեղափոխվել Սոչի։ Բուժվելուց հետո նորից մեկնել է ռազմաճակատ։ Ծառայել է 242-րդ լեռնահրաձգային դիվիզիայի 18-րդ բանակի կազմում։ Մասնակցել է Կերչ, Սիմֆերոպոլ, Սևաստոպոլ քաղաքների պաշտպանության կռիվներին։ Նովոռոսիյսկ քաղաքի մատույցներում տեղի ունեցող մարտերի ժամանակ Բագրատը հաջողությամբ կատարել է հրամանատարության առաջադրանքները, որի համար պարգևատրվել է Կարմիր աստղի շքանշանով։ 1943 թվականի հոկտեմբերին Կերչի մոտ գտնվող քարանձավներից մեկում Խաչատրյանը ընդունվել է կոմունիստական կուսակցության շարքերը։ 1-ին Մերձբալթյան ռազմաճակատում Լիտվական Սկոպեչկա քաղաքի մատույցներում տեղի ունեցող մարտերի ժամանակ Խաչատրյանը աջ ուսից վիրավորվել է, տեղափոխվել Բրյանսկ՝ հոսպիտալ։ Հոսպիտալում էլ լսել է մեծ հաղթանակի լուրը[1]։
Ռազմադաշտից վերադառնալով Խաչատրյանը ընդունվել և ավարտել է Երևանի հեռակա մանկավարժական ինստիտուտը։ Ապարանի շրջանի տարբեր դպրոցներում եղել է պատմության ուսուցիչ, դպրոցի տնօրեն։ Այնուհետև հայրենի գյուղի դպրոցում դասավանդել է պատմություն։ Լավագույն աշխատանքի համար պարգևատրվել է «Աշխատանքային գերազանցության համար» մեդալով[1]։
Պարգևներ[խմբագրել | խմբագրել կոդը]
- Կարմիր աստղի շքանշան
- «Աշխատանքային գերազանցության համար» մեդալ