Զարմայր Մսերյան

Մսերյան Զարմայր Մսերի [10․1836, ավան Հնչեշտ (այժմ՝ Կոտովսկ, Մոլդավական ԽՍՀ-ում)—12․5․1889, Մոսկվա], հրապարակախոս, խմբագիր։ Մսեր Մսերյանի որդին։ 1855 թվականին ավարտել է Լազարյան ճեմարանը, նշանակվել վերակացու և թուրքերենի ուսուցիչ։1860-ական թթ․ վարել է պետական պաշտոններ։ 1858— 62-ին հոր հետ խմբագրել է «Ճռաքաղ»-ը, 1861 — 1864-ին՝ «Համբավաբեր Ռուսիո» հանդեսը։ 1872—76-ին հրատարակել է «Փարոս»-ը (վերջինիս Կոստանդնուպոլսի թղթակիցն է եղել Հակոբ Պարոնյանը)։ Առանձին գրքով լույս է ընծայել «Նոր այբբենարան հայերեն լեզվի ռուս, թարգմանությամբ» (1856)։ Կատարել է թարգմանություններ ռուսերենից ու ֆրանսերենից։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։