Մարիա Դիլլոն

Մարիա Դիլլոն ռուս.՝ Мари́я Диллон
Ծնվել է	հոկտեմբերի 27 (նոյեմբերի 8), 1858
Ծննդավայր	Պանևեժիս, Կովնոյի նահանգ, Ռուսական կայսրություն
Մահացել է	հոկտեմբերի 14, 1932(1932-10-14) (73 տարեկան)
Վախճանի վայրը	Լենինգրադ, ՌԽՖՍՀ, ԽՍՀՄ
Քաղաքացիություն	Ռուսական կայսրություն և  ԽՍՀՄ
Կրթություն	Սանկտ Պետերբուրգի գեղարվեստի ակադեմիա (1888)
Մասնագիտություն	քանդակագործ և նկարչուհի
Ամուսին	Ֆեոդոր Բուխհոլց
Maria Lvovna Dillon Վիքիպահեստում

Մարիա Դիլլոն (ռուս.՝ Мари́я (Ми́на) Льво́вна Диллон, հոկտեմբերի 27 (նոյեմբերի 8), 1858, Պանևեժիս, Կովնոյի նահանգ, Ռուսական կայսրություն - հոկտեմբերի 14, 1932(1932-10-14), Լենինգրադ, ՌԽՖՍՀ, ԽՍՀՄ), առաջին պրոֆեսիոնալ կին քանդակագործը Ռուսաստանում։

Կենսագրություն

Մարիա Դիլլոնը ծնվել է Կովնոյի նահանգում, հրեա վարձակալի ընտանիքում։ Վաղ տարիքում նա տեղափոխվել է Սանկտ-Պետերբուրգ, որտեղ Մարկ Անտոկոլսկու առաջին հաջողությունների տպավորության ներքո հարազատներն ուշադրություն են դարձրել Մարիայի քանդակելու ձիրքին։

1879 թվականին Դիլլոնն ընդունվել է Գեղարվեստի ակադեմիա, որը 1888 թվականին ավարտել է դասական նկարչի կոչումով։ Այդ ժամանակից ի վեր նա առանց ընդհատումների մասնակցել է Սանկտ Պետերբուրգի ամենամյա ակադեմիական ցուցահանդեսներին, երբեմն հանդես եկել նաև արտերկրում։ Մարիա Դիլլոնի ակադեմիական աշխատանքներից առանձնանում են «Մարաթոնյան հաղթանակի ավետաբերը» փոքրիկ ֆիգուրը և «Անդրոմեդայի» արձանիկը։ Ունենալով զարգացած տեխնիկան և ծանրակշիռ անատոմիա՝ Դիլլոնը մասնագիտացել է հիմնականում մերկ կանանց ֆիգուրներ ստեղծելու («Ստրկուհին», «Հաճույք», «Կակաչ», «Լուսնոտ» և այլն), մասամբ գեղեցիկ կանանց և երեխաների գլուխների քանդակման գործում։ Նրա ստեղծագործությունների գագաթնակետը 1899 թվականին Պետերբուրգում Կելխի տան քանդակային դեկորացիան էր՝ բաղկացած աստիճանների վրա տեղադրված երեք մարմարե ֆիգուրներից և հյուրասենյակում գտնվող մոնումենտալ դեկորատիվ բուխարուց («Գարնան զարթոնք»)։ Նրան մեծ հռչակ է բերել նաև «Լիլիա» աշխատանքը։ Լավագույն գործերից են «Տատյանա», «Օֆելյա», «Էստերալդա», «Քմահաճը», «Ընթերցանություն» և այլն։ Առավել հայտնի գործերից են Նիկոլայ Լոբաչևսկու հուշարձանը Կազանում, Ալեքսանդր II կայսեր հուշարձանը Չերնիգովում, Հեռահաղորդակցության նախարար Գյուբբենտի, պրոֆեսոր Պրեմացցիի, պրոֆեսոր դե լա Ֆոսսի, գրող Դանիլևսկու և կոմպոզիտոր Արենսկու տապանաքար-հուշարձանները։

Մրցանակներ

Դիլլոնը «Հեռավոր Արևելքում» գտնվող հուշարձանի համար, որտեղ քանդակված է, թե ինչպես է բուժքույրը վիրավոր զինվորի համար հայրենիքից ստացված նամակը կարդում, 1905 թվականին արժանացել է Առաջին հոբելյանական՝ Արվեստի խրախուսման համար կայսերական ընկերության մրցույթի 2000 ռուբլի մրցանակին։ Դիլլոնը ևս մեկ մրցանակի է արժանացել Պետերբուրգի 200-ամյա հիշատակի երկու մեդալների մոդելները պատրաստելու համար։

Ընտանիք

Ամուսին՝ Ֆեոդոր Ֆեոդորովիչ Բուխհոլց (1857-1942), նկարիչ

Մահ

Մահացել է 1932 թվականին Լենինգրադում։ Թաղված է Սմոլենսկոե լյութերական գերեզմանոցում։

Արտաքին հղումներ

• Диллон, Мария Львовна // Еврейская энциклопедия Брокгауза и Ефрона. - СПб., 1908-1913.
• Диллон, Мария Львовна // Энциклопедический словарь Брокгауза и Ефрона : в 86 т. (82 т. и 4 доп.). - СПб, 1890-1907.

Վիքիպահեստն ունի նյութեր, որոնք վերաբերում են «Մարիա Դիլլոն» հոդվածին։