Կոկկեդալ (դան․՝ Kokkedal), քաղաք Դանիայում՝ Հյորսհոլմ կոմունայում՝ Մայրաքաղաքային տարածաշրջանի կազմում։ Քաղաքը գտնվում է Հյուսիսային Զելանդիայի և Դանիայի ափին՝ երկու քաղաքների՝ Նիվայի և Հյորսհոլմի միջև՝ Կոպենհագենից 30 կիլոմետր դեպի հյուսիս։ Ըստ 2011 թվականի վիճակագրության՝ քաղաքում ապրում է 9585 մարդ[1]։ Քաղաքի բնակչության 56 %-ը թուրքական և արաբական ծագում ունեցող ներգաղթյալներ են՝ իրենց երկրորդ ու երրորդ սերնդի երեխաներով։ Բնակչության 44 %-ը կազմում են բնիկները[2]։
Քաղաքում է գտնվում Կոկկեդալի ամրոցը, որը կառուցվել է 1540 թվականին ռիկսորդի անդամ, Դանիայի թագավորի զարմիկ Էրիկ Բանների կողմից։ Այսօր ամրոցում կա հյուրանոց, կոնֆերանսի դահլիճ և գինու մառան[3]։
2012 թվականի նոյեմբերին քաղաքի տեղական վարչակազմի որոշմամբ, որը մեծամասամբ բաղկացած էր մուսուլմաններից, որոշվել է Սուրբ ծննդի օրը քաղաքի կենտրոնում տոնածառ չդնել (հին ավանդույթ, որը պահպանվում է Դանիայի բոլոր քաղաքներում) այն պատրվակով, որ դրա ձեռքբերման ծախսերը կկազմեն յոթ հազար կրոն։ Միաժամանակ, նույն թվականին վարչակազմը 60 հազար կրոն է ծախսել մուսուլմանական Կուրբան Բայրամ տոնի կազմակերպման համար[4]։ Դա բողոքի ալիք է առաջացրել քաղաքի բնիկների մոտ, որոնք կազմում են քաղաքի բնակչության մոտ 40 %-ը։ Դանիացի գործարար Յոնաս Քրիստենսենն առաջարկել է անձամբ վճարել տոնածառի և սուրբծննդյան տոնի կազմակերպման համար, սակայն վարչակազմը մերժել է այդ առաջարկը։ Նրա ներկայացուցիչներից մեկը՝ Էգեդալսվենգեի բնակարանային խորհրդի անդամ Իսմայիլ Մեստազին, նշել է, որ դա «սկզբունքի հարց է, ոչ թե փողի», և, լինելով մուսուլման, մտադիր չէ քրիստոնեական տոներ կազմակերպել մի քաղաքում, որտեղ քրիստոնյաները փոքրամասնություն են կազմում[5]։ Այն բանից հետո, երբ այդ լուրը լայնորեն տարածվել է ԶԼՄ-ներում, քաղաք են ժամանել հեռուստալրագրողներ, որոնք որոշել են հեռուստառեպորտաժ նկարահանել, սակայն նրանց վրա հարձակվել են դիմակավորված մի խումբ անհայտ անձինք՝ նրանց մեղադրելով նեոնացիզմի մեջ։ Բռնկված սկանդալից հետո շրջանի վարչակազմը լուծարվել է, իսկ տոնածառը դրվել է հրապարակում։ Վարչակազմի նախկին անդամ Կարին Լեգարդ Հանսենը, որը մեծ դեր էր խաղացել սուրբծննդյան տոնածառի տեղադրման իրավունքի համար մղված պայքարում, ստիպված է եղել հեռանալ քաղաքից անհայտ անձանց կողմից ստացած բազմաթիվ սպառնալիքների պատճառով[6]։
Դանիա
