Կարապետ Հակոբյան

Վիքիպեդիայում կան հոդվածներ Հակոբյան ազգանունով այլ մարդկանց մասին։

Կարապետ Հակոբի Հակոբյան
Ծնվել է	1849 հուլիսի 30
Ծննդավայր	Մարզվան
Մահացել է	հունիսի 3, 1926(1926-06-03) (տարիքը 76)
Մահվան վայր	Միացյալ Թագավորություն
Քաղաքացիություն	Միացյալ Թագավորություն
Ազգություն	Հայ
Կրոն	Հայ Առաքելական եկեղեցի
Մասնագիտություն	հրապարակախոս և հասարակական գործիչ

Կարապետ Հակոբի Հակոբյան (1849, հուլիսի 30, Մարզվան (Սեբաստիայի նահանգ) -  1926, հունիսի 3, Անգլիա), հասարակական-քաղաքական գործիչ, հրապարակախոս։

Կենսագրություն

Սովորել է Մարզվանի ազգային և միսիոներական վարժարաններում, Կ.Պոլսի Բերայի անգլիական վարժարանում (որտեղ եղել է նաև ուսուցիչ)։ 1874 թվականից անցել է Լոնդոն։ Մեծ աշխատանք է կատարել հայերին և Հայկական հարցն անգլիական կառավարությանն ու լայն հասարակայնությանը ծանոթացնելու ուղղությամբ։ Բազմիցս հարցապնդումներ է ուղղել, հիշատակագիր ներկայացրել անգլիացի բարձրաստիճան պաշտոնյաներին (Գլադստոն, Սոլսբերի), մասնակցել հայերի շահերը պաշտպանող կազմակերպությունների ստեղծմանը (Անգլո-հայկական ընկերությունը, որի փոխնախագահն էր Հակոբյանը)։ Բեռլինի դաշնագիրն (1878) ստորագրած պետությունների առաջ Հայկական հարց բարձրացնելու նպատակով՝ 1885 թվականի դեկտեմբերի 23-ին Լոնդոնում Հակոբյանի ղեկավարությամբ ստեղծվել է «Հայրենասիրաց ընկերություն Հայոց Եվրոպա»-ի հանձնաժողովը։ Մասնակցել է «Հայաստան» (Լոնդոն) թերթի հրատարակությանը (երիտասարդ խմբագիրների հետ տարաձայնությունների հետևանքով հեռացել է թերթից)։

Առաջին համաշխարհային պատերազմի նախօրեին, Հայկական հարցի վերաբացման շրջանում, խնդրագրերով դիմել է անգլիական կառավարությանը, արդյունքում ստեղծվել է Բրիտանա-հայկական հանձնաժողովը։

Քննադատել է Պողոս Նուբարի գլխավորած ազգ. պատվիրակության չափավոր քաղաքականությունը։

Առաջին համաշխարհային պատերազմի տարիներին թարգմանիչ էր անգլիական զինվորական նախարարությունում։

Ծանոթագրություններ

Այս հոդվածի նախնական տարբերակը կամ նրա մասը վերցված է Հայկական համառոտ հանրագիտարանից, որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։