Արտաշես Սարգսյան
Արտաշես Սարգսյան | |
---|---|
![]() | |
Ծննդյան թիվ՝ | հունիսի 1, 1974 (50 տարեկան) |
Ծննդավայր՝ | Երևան, Հայկական ԽՍՀ, ԽՍՀՄ |
Քաղաքացիություն՝ | ![]() ![]() ![]() |
Մասնագիտություն՝ | դերասան, պրոդյուսեր, հաղորդավար, խմբագիր, ռեստորատոր, հեռուստատեսային պրոդյուսեր, հեռուստահաղորդավար, ռադիոհաղորդավար և ՈՒՀԱ-ի խաղացող |
IMDb։ | ID 6600784 |
Արտաշես Գագիկի Սարգսյան (ռուս.՝ Арташес Гагикович Саркисян, հունիսի 1, 1974, Երևան, Հայկական ԽՍՀ, ԽՍՀՄ), հայկական ծագմամբ ռուս պրոդյուսեր, դերասան, հեռուստահաղորդավար, ռադիոհաղորդավար։ «Քոմեդի քլաբի» հիմնադիրներից մեկը, «Total Football» ամսագրի նախկին գլխավոր խմբագիր, «Նոր հայեր» թիմի անդամ։ Բեմական կեղծանունն է Տաշ։ 2015 թվականից մինչև 2017 թվականի հունվարը եղել է «Матч ТВ» ալիքի սպորտային հեռարձակումների գլխավոր խմբագիր։
Կենսագրություն
[խմբագրել | խմբագրել կոդը]Ավարտել է Երևանի գյուղատնտեսական ակադեմիայի գինեգործության ֆակուլտետը։ Խաղացել է «Ուրախների և հնարամիտների ակումբի»՝ «Նոր հայեր» թիմում։ 1994 և 1995 թվականներին իր կազմով հանդես է եկել ՈւՀԱ-ի առաջին լիգայում։
1996 թվականին Սարգսյանն իր թիմի հետ միասին հանդես է եկել ՈւՀԱ-ի գլխավոր լիգայում, և առաջին իսկ մրցաշրջանից հասել է մինչև կիսաեզրափակիչ, որտեղ նրանք իրենց տեղը զիջել են ապագա չեմպիոններ` «Մախաչկալայի թափառականներին»։ Նույն թվականին Յուրմալայի երաժշտական փառատոնում առաջին անգամ հանդես եկող «Նոր հայերը» անմիջապես արժանացել են երկրորդ մրցանակին՝ «Լուսավոր ՈւՀԱ»-ին։ Նույն մրցանակն Արտաշես Սարգսյանն ու իր թիմը ստացել են նաև հաջորդ փառատոնի ընթացքում։
1997 թվականի մրցաշրջանում նրանք դարձել են բարձրագույն լիգայի չեմպիոն, սակայն այս տիտղոսը կիսել են «Զապորոժիե-Կրիվոյ Ռոգ-Տրանզիտ» թիմի հետ։ 1998 թվականին «Նոր հայերը», որպես չեմպիոններ, բաց են թողել մրցաշրջանը, և կենտրոնացել են հյուրախաղերի վրա։ Այդ թվականին հայկական թիմը նվաճել է ՈւՀԱ-ի Սուպեր գավաթը, ինչպես նաև մասնակցել է ՈւՀԱ-ի երաժշտական փառատոնին, որտեղ մրցանակ չի կարողացել նվաճել։
1999 թվականին Սարգսյանն իր թիմի հետ միասին, լինելով ֆավորիտ, մասնակցել է բարձր լիգայի խաղերին, որտեղ հասել է եզրափակիչ, սակայն իր տեղը զիջել է Բելառուսի պետական համալսարանի երիտասարդ խմբին։ Բացի այդ, «Նոր հայեր» խումբը հանդես է եկել Յուրմալայի և ՈւՀԱ-ի ամառային գավաթի փառատոններում, որտեղ դարձյալ մնացել է առանց պարգևի։ 1999 թվականից հետո մասնակցել է 2000 թվականի երգիծական փառատոնին, որտեղ դարձել է «Նախագահական ՈւՀԱ»-ի մրցանակակիր։ Մասնակցել է նաև 2001 թվականի ամառային գավաթի խաղերին։ Դրանից հետո «Նոր հայեր» թիմը կենտրոնացավ հյուրախաղային գործունեության վրա՝ ելույթներ ունենալով ԱՊՀ-ի տարբեր երկրներում, Եվրոպայում, ինչպես նաև Իսրայելում և ԱՄՆ-ում։
2007 թվականին բացել է իր «TM Cafe» ռեստորանը, որը դարձել է մի քանի մրցանակների դափնեկիր։ 2010 թվականի դեկտեմբերին Արտաշես Սարգսյանը բացել է «Cafe „54“» սրճարանը, մասնակցել է «Tribeca» նախագծի ստեղծմանը[1]։
Ծանոթագրություններ
[խմբագրել | խմբագրել կոդը]- ↑ «Cafe 54 — официальное открытие» (ռուսերեն). allcomedyclub.ru. Արխիվացված օրիգինալից 2012 թ․ ապրիլի 10-ին. Վերցված է 2011 թ․ փետրվարի 28-ին.
Արտաքին հղումներ
[խմբագրել | խմբագրել կոդը]- «Неофициальный сайт Арташеса «Таша» Саркисяна» (ռուսերեն). Արխիվացված օրիգինալից 2012 թ․ ապրիլի 10-ին. Վերցված է 2009 թ․ նոյեմբերի 20-ին.
- [1] Ֆեյսբուքում
|