Կոմունիստ (հանդես)

Անվան այլ կիրառումների համար տե՛ս՝ Կոմունիստ (այլ կիրառումներ)

Կոմունիստ «Koмунист» գերմ.՝ Kommunist
Տեսակ	պարբերական
Լեզու	ռուսերեն
Հիմնադրվել է	1924
Երկիր	ԽՍՀՄ
Bolshevik (journal) Վիքիպահեստում

Կոմունիստ (ռուս.՝ «Koмунист»), տեսական-քաղաքական հանդես, ԽՄԿԿ Կենտկոմի օրգան։

Լույս էր տեսնում 1924 թվականից Մոսկվայում, տարեկան 18 համար (սկզբում՝ միամսյա)։ Զարգացնում և պրոպագանդում էր մարքսիզմ-լենինիզմը, պայքարում կուսակցության գլխավոր գծի կենսագործման, ԽՍՀՄ-ում կոմունիստական հասարակարգի կառուցման համար, մասնակցում համաշխարհային հեղափոխական պրոցեսի հրատապ խնդիրների մշակմանը։

«Կոմունիստը» կոմունիստական կուսակցության, սովետական ժողովրդի խաղաղ աշխատանքի և պատերազմական փորձությունների տարեգրությունն էր։ Անհաշտ պայքար էր մղում հակագիտական, բուրժուական և ռեֆորմիստական գաղափարախոսությունների, օպորտունիզմի և ռևիզիոնիզմի դեմ։ Լուսաբանում էր ԽՄԿԿ տնտեսական քաղաքականությունը, կուսակցության պայքարը արտադրության արդյունավետության բարձրացման գործում։

Լուրջ ավանդ ուներ զարգացած սոցիալիստական հասարակության խնդիրների մշակման, նրա պատմական տեղի և չափանիշների ճշտման գործում։ Արտացոլում է ԽՄԿԿ արտաքին քաղաքականությունը, միջազգային հարաբերությունները, ինտերնացիոնալիզմի և ազգայինի տեսական և քաղաքական դրույթները։ «Կոմունիստ»-ում են տպագրվել Վ. Ի. Լենինի շուրջ 100 չհրապարակված կամ նախկինում քիչ հայտնի աշխատություններ, նամակներ, փաստաթղթեր են, ինչպես նաև Կարլ Մարքսի և Ֆրիդրիխ Էնգելսի՝ առաջին անգամ ռուսերեն թարգմանված գործեր։

Հանդեսին թղթակցում էին ԽՄԿԿ և խորհրդային պետության, միջազգային կոմունիստական և բանվորական շարժման նշանավոր գործիչներ։ Մինչև 1952 թվականը լույս է տեսել «Բոլշևիկ» անվամբ։ Պարգևատրվել է Լենինի շքանշանով (1974)։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։