Սուրբ Աստվածածին եկեղեցի (Շիրակավան)

Սուրբ Աստվածածին եկեղեցի;
Հիմնական տվյալներ
Տեսակ	եկեղեցի
Երկիր	Հայաստան
Տեղագրություն	Շիրակավան
Դավանանք	Հայ Առաքելական Եկեղեցի
Թեմ	Շիրակի թեմ
Հիմնական ամսաթվերը	հունիսի 4, 2016
Հիմնադրված	հունիսի 4, 2016

Սուրբ Աստվածածին եկեղեցի, հայ առաքելական եկեղեցի Շիրակի մարզի Շիրակավան գյուղում^[1]։ Եկեղեցու հիմնարկեքը կատարվել է 2015 թվականի հունիսին, իսկ կառուցումն ավարտին է հասել 2016 թվականի հունիսի 4-ին^[2]։

Պատմություն

1820 թվականից գյուղը ունեցել է եկեղեցի, որը սակայն Ախուրյանի ջրամբարի կառուցման հետևանքով մնացել է ջրի տակ։ Տեղացիների պատմելով երկար տարիներ ջրի տակից վառ լույս էր արձակվում, հենց նույն տեղից, որտեղ եկեղեցու խորանն էր^[3]։ Տարիների ընթացքում 17-րդ դարի եկեղեցու քարերը դուրս են բերվել ջրից՝ նոր եկեղեցի կառուցելու նպատակով, սակայն երկար տարիներ չի հաջողվել այն կառուցել։ Այդ քարերի մասն օգտագործվել է նոր եկեղեցու շինարարության ժամանակ։ Եկեղեցու շինարարությունը հովանավորել են ծնունդով շիրակավանցի մոսկվաբնակ Թավրիզյան եղբայրները^[1]^[4]։

Կառույց

Եկեղեցին միանավ բազիլիկ կառույց է՝ արևմտյան մուտքի մոտ կից զանգակատնով։ Զանգակատունը կառուցված է կարմիր տուֆով, իսկ բուն եկեղեցին՝ սև և կարմիր տուֆերով, հիմքում օգտագործվել են Ախուրյանի ջրամբարի տակ մնացած 17-րդ դարի եկեղեցու քարերը։ Խորանի աբսիդը կիսաշրջանաձև է, երկու կողմերում ունի ավանդատներ։ Եկեղեցու արևմտյան մուտքի երկու կողմերին ունի մեկական լուսամուտ, հարավային և հյուսիսային պատերին՝ երեքական լուսամուտներ։

Եկեղեցին հարուստ է որմնանկարներով։ Խորանում բեմաքարի մոտ երկու հրեշտակների որմնանկարներ են, իսկ նրանցից վերև պատկերված է Հիսուս Քրիստոսը։ Արևմտյան մուտքի երկու կողմերում պատկերված են քրիստոնեությունը Հայաստան բերած երկու առաքյալները՝ Բարդուղիմեոսը ու Թադևոսը։

Սուրբ Աստվածածին եկեղեցու որմնանկարների ցանկ

Ստորև ներկայացվում է Շիրակավանի Սուրբ աստվածածին եկեղեցու որմնանկերի ցանկը։

#	Անուն	Լրացուցիչ տվյալներ
1	Սուրբ Բարդուղիմեոս	Պատկերված է արևմտյան մուտքից հարավ։
2	Սուրբ Թադեոս	Պատկերված է արևմտյան մուտքից հյուսիս։
3	Քարոզ	Պատկերված է հյուսիսային պատին։
4	Մկրտություն	Պատկերված է հյուսիսային պատին։
5	Մարիամ Աստվածածինը մանուկ Հիսուս Քրիստոսը գրկին	Պատկերված է հարավային պատին։
6	Հիսուս Քրիստոս	Պատկերված է խորանի կիսաշրջանաձև աբսիդի ճակատին։
7	Հրեշտակներ	Պատկերված է խորանի կիսաշրջանաձև աբսիդին։
8	Զարդանախշ	Պատկերված է արևելյան պատին՝ խորանից հյուսիս։
9	Զարդանախշ	Պատկերված է արևելյան պատին՝ խորանից հարավ։

Պատկերասրահ

Զանգակատան գմբեթը
Պատկեր եկեղեցու ներսից

Ծանոթագրություններ

[mtad-1] 1,0 ^1,1 «Շիրակավան համայնքում բացվեց «Սուրբ Աստվածածին» եկեղեցին».

[2] «Շիրակավան գյուղում օծվել է նորակառույց Ս. Աստվածածին եկեղեցին».

[3] «Լույս արձակող եկեղեցին».

[4] «Սահմանամերձ Շիրակավանն արդեն եկեղեցի ունի».

[1]

[2]

[3]

[4]