Սերգեյ Սմբատյան

Վիքիպեդիայից՝ ազատ հանրագիտարանից
Jump to navigation Jump to search
Սերգեյ Սմբատյան
SYOA.jpg
Հիմնական տվյալներ
Ի ծնե անունՍերգեյ Արմենի Սմբատյան
Ծնվել էսեպտեմբերի 23, 1987(1987-09-23) (32 տարեկան)
Երևան, Հայկական ԽՍՀ, ԽՍՀՄ
ԵրկիրFlag of Armenia.svg Հայաստան
Flag of the Soviet Union.svg ԽՍՀՄ
ՄասնագիտությունԴիրիժոր
ջութակահար
Գործիքներջութակ
ԿրթությունԵրևանի Կոմիտասի անվան պետական կոնսերվատորիա և Մոսկվայի Չայկովսկու անվան պետական կոնսերվատորիա
ՊարգևներՀայաստանի Հանրապետության վաստակավոր արտիստ և Արվեստի և գրականության շքանշան

Սերգեյ Արմենի Սմբատյան (1987, սեպտեմբերի 23, Երևան), հայ դիրիժոր, ջութակահար։ Հայաստանի պետական երիտասարդական նվագախմբի հիմնադիր-ղեկավար։

Կոմպոզիտոր Արմեն Սմբատյանի որդին է։

Կենսագրություն[խմբագրել | խմբագրել կոդը]

Սերգեյ Սմբատյանը ծնվել է Երևանում, երաժիշտների ընտանիքում։ 4 տարեկան հասակից սովորել է ջութակ նվագել իր տատիկի՝ Տ. Հայրապետյանի մոտ, այնուհետև սովորել է Երևանի Չայկովսկու անվան երաժշտական դպրոցի ջութակի դասարանում։ 13 տարեկանում Իտալիայի «Rovere d'Oro» միջազգային մրցույթում արժանացել է Գրան Պրի մրցանակի։ Իբրև մենակատար՝ ելույթ է ունեցել Իսրայելի ֆիլհարմոնիկ նվագախմբի, Մոսկվայի պետական ակադեմիական սիմֆոնիկ նվագախմբի և այլ կոլեկտիվների հետ։

Սովորել է Երևանի Կոմիտասի անվան պետական կոնսերվատորիայում (սիմֆոնիկ դիրիժորություն, պրոֆեսոր՝ Յուրի Դավթյանի դասարան)։ Զուգահեռաբար սովորել է Մոսկվայի Չայկովսկու անվան պետական կոնսերվատորիայում: 2009 թվականին ավարտել է Երևանի և Մոսկվայի կոնսերվատորիաները[1]:

2009 թվականին Սմբատյանն ստացել է Հայաստանի գիտությունների ազգային ակադեմիայի արվեստի ինստիտուտի արվեստագիտության թեկնածուի կոչում։ 2012 թվականի մայիսին ավարտել է Լոնդոնի թագավորական երաժշտական ակադեմիան։

Վարպետության դասընթացներ է անցել Զախար Բրոնի, Գրիգորի Ժիսլինի, Ռուջերիո Ռիչչիի և այլ աշխարհահռչակ ջութակահարների մոտ։ 2008 թվականին Լոնդոնի ֆիլհարմոնիկ նվագախմբի կողմից հրավիրվել է վարպետության դասընթացի մաեստրո Ռիկարդո Մուտիի մոտ։

2005 թվականին հիմնել և ղեկավարում է Հայաստանի պետական երիտասարդական նվագախումբը, որը ելույթներ է ունեցել Փարիզի, Բեռլինի, Մոսկվայի, Աբու Դաբիի և այլ քաղաքների հայտնի համերգասրահներում։ Համագործակցում է համաշխարհային բեմի կարկառուն ներկայացուցիչների հետ՝ Վլադիմիր Սպիվակով, Արթուր Փափազյան, Դենիս Մացուև, Ֆրանկ Ֆերնանդես, Ժոաո Դոնատո, Վադիմ Ռեպին, Միշել Լեգրան և բազում այլ հռչակավոր երաժիշտներ[2]:

Սմբատյանը հանդիսանում է Հայ կոմպոզիտորական արվեստի փառատոնի համահիմնադիրը։ Նա նաև ակտիվ մասնակցություն է ցուցաբերում Հայաստանում իրականացվող բարեգործական ծրագրերում՝ ելույթներ ունենալով ծերանոցներում, մանկատներում և համալսարաններում[3][4]:

Կոչումներ[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]

Արտաքին հղումներ[խմբագրել | խմբագրել կոդը]