Ռոդոթիպուս կերիանման
| Ռոդոթիպուս կերիանման | ||||||||||
|---|---|---|---|---|---|---|---|---|---|---|
| Գիտական դասակարգում | ||||||||||
|
||||||||||
| Լատիներեն անվանում | ||||||||||
| Rhodotypus kerrioides Sieb. et Zucc
|
Ռոդոթիպուս կերիանման (լատին․՝ Rhodotypus kerrioides Sieb. et Zucc), վարդազգիների ընտանիքի, ռոդոթիպուս ցեղի բույս։
Նկարագրություն[խմբագրել | խմբագրել կոդը]
Տերևաթափ թուփ է 2 — 5 մ բարձրությամբ, ուղիղ ճյուղերով և հակադիր տերևադասավորությամբ։ Տերևները ձվաձև են կամ երկարավուն ձվաձև, սրածայր, 4 — 8 սմ երկարությամբ, կրկնակի, սուր, սղոցաեզր, վերևի կողմից մերկ, մուգ կանաչ, ներքևի կողմից նոր բացված ժամանակ մետաքսամազմզուկապատ, բաց կանաչ, 3 — 5 մմ երկարությամբ կոթունով։ Ծաղիկները միայնակ են, գագաթնային, մաքուր սպիտակ, 3 — 5 սմ տրամագծով։ Բաժակը տափակ է, ունի 4 ձվաձև բաժակաթերթիկ, պսակաթերթիկները 4-ն են, կլորավուն, առէջները բազմաթիվ են, պսակաթերթիկներից կրկնակի անգամ կարճ, Փոշանոթները սև են, սերմնարանները մեծ մասամբ 4-ն են։ Պտուղը կազմված է սև դարչնագույն, Փայլուն կորիզներից, որոնք ունեն ալրանման պտղամիս, 7,5 մմ երկարությամբ և 5,5 մմ տրամագծով։ Ծաղկում է մայիս-հունիս ամիսներին, պտուղները հասունանում են հոկտեմբերին։ Ցրտահարվում է —20—22 °C-ի սառնամանիքների դեպքում։ Վատ է դիմանում խոտաբույսերի կոնկուրենցիային, ուստի և պահանջում է մշտապես պայքար մոլախոտային բուսականության դեմ։ Բազմանում է սերմերով, ցանքը նպատակահարմար է կատարել աշնանը։ Լավ է բազմանում նաև փայտացած և կանաչ կտրոններով։
Տարածվածություն[խմբագրել | խմբագրել կոդը]
Տարածված է ճապոնիայում և կենտրոնական Չինաստանում։ Հայաստանում մշակվում է 60-ական թվականներից (Երևան, Բյուրական, Իջևան, Գյուլագարակ)։
Կիրառություն[խմբագրել | խմբագրել կոդը]
խորհուրդ է տրվում օգտագործել որպես դեկորատիվ բույս մեր հանրապետության ցածրադիր շրջաններում, ծովի մակերևույթից մինչև 1200 — 1400 մ բարձրությունների վրա[1]։
Ծանոթագրություններ[խմբագրել | խմբագրել կոդը]
- ↑ Հարությունյան Լ․ Վ․, Հարությունյան Ս․ Լ․, Հայաստանի դենդրոֆլորան, հ. 1, Երևան, «Լույս հրատարակչություն», 1985, էջ 383։