Պանգերմանիզմ, համագերմանականություն (գերմ.՝ Pangermanismus, Alldeutsche Bewegung), գերմանական պաննացիոնալիստական քաղաքական ուսմունք։
Առաջացել է 1880-ական թվականների սկզբին, վերջնականապես ձևավորվել 19-րդ դարի վերջին։ Գաղափարների արտահայտիչը եղավ Պանգերմանական միությունը։ Պանգերմանիզմի կողմնակիցները ոգեշնչում էին լեհական, ուկրաինական, բելառուսական, բալթյան հողերը նվաճելու, գերմանական համաշխարհային տիրապետությունը հաստատելու քաղաքականությունը, ակտիվորեն մասնակցում էին երկրի ռազմականացմանը։ Աչքի է ընկել մոլի ազգայնականությամբ, ռասայականությամբ, անհանդուրժողականությամբ սոցիալիզմի գաղափարների նկատմամբ՝ ի վերջո հանդիսանալով գերմանական ֆաշիզմի նախակարապետը։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 9, էջ 118)։
