Խոշոր, բավականին հզոր, տերևաթափ թուփ է, որի ճյուղերը հասնում են մինչև 3-4 մ երկարության։ Տարեկան ընձյուղները սողացող են, թույլ աղեղնաձև, արևի տակ կարմրող, մերկ, բութ հնգանկյուն։ Փշերը սակավաթիվ են, ուղիղ, կողքերից սեղմված, դեղին, հիմքում՝ լայնացած, պտղատու ճյուղերի վրա խիստ դեպի ցած թեքված։ Տերևները հնգամասն կամ եռամասն են, վերևի կողմից մերկ, ներքևից մահուդամազմզուկապատ, անհավասար սղոցաեզր։ Գագաթնային տերևիկը, ինչպես և կողմնայինները, կոթունավոր է (5-6 սմ երկարությամբ), էլիպսաձև, լայն հակառակ ձվաձև, կլորավուն, 6-9 (երբեմն՝ 12) սմ Երկարությամբ և 5-7 (երբեմն՝ 10) սմ լայնությամբ, բութ կամ թույլ փոսիկավոր գագաթով։ Ծաղկաբույլերը խոշոր են, մինչև 50 սմ երկարությամբ։ Բաժակաթերթիկները թաղիքամազմզուկապատ են։ Պսակաթերթիկները սպիտակ են կամ բաց վարդագույն, առէջաթելերը սպիտակ են։ Պտուղները երկարավուն ձվաձև են, գնդաձև, սև, խոշոր 1,5-2 սմ երկարությամբ, 2-3 հատ հավաքված ծայրային ճյուղերի վրա։
