Հզոր բույսեր են, որոնց աղեղնաձև ընձյուղները կարող են հասնել մինչև 4 մ բարձրության, հնգանկյուն են, կարմրամանուշակագույն։ Փշապատ են։ Փշերը խոշոր են, տափակ կոնաձև, ներքևի մասում խիստ լայնացած, կարմիր, դեղին ծայրերով։ Տերևները միամյա շիվերի վրա հնգամասն են, կարմրող, մուգ կարմիր բծերով, վերևի կողմից մերկ, ներքևի կողմից թավշանման, սպիտակավուն կամ մոխրագույն մազմզուկապատ, անհավասար ատամնաեզր, ծայրային տերևիկը հակառակ ձվաձև է, կլորավուն կամ ձվաձև, գագաթին սուր հավելվածքով, հիմքում կլորավուն կամ թույլ սրտանման 9 (12) սմ երկարությամբ և 5-6 սմ լայնությամբ։ Կողմնայինները շեղանկյունաձև են, էլիպսաձև, ձվաձև, կարճ սրածայր։ Ծաղկաբույլերը խոշոր են, մինչև 15—20 սմ երկարությամբ, խիտ, բաժակաթերթիկները՝ մոխրաթաղիքանման։ Պսակաթերթիկներն էլիպսաձև են, պտուղները՝ գնդաձև։
