Հայկ Միրզաբեկյան

Հայկ Միրզաբեկյան
Ծնվել է	հունվարի 16, 1893(1893-01-16) Շուշի, Ելիզավետպոլի նահանգ, Ռուսական կայսրություն
Մահացել է	փետրվարի 24, 1971(1971-02-24) (78 տարեկան) Երևան, Հայկական ԽՍՀ, ԽՍՀՄ
Մասնագիտություն	հիգիենիստ և բժիշկ
Ալմա մատեր	Շևչենկոյի անվան համալսարան (1916)
Գիտական աստիճան	բժշկական գիտությունների դոկտոր (1941) և պրոֆեսոր (1942)
Պարգևներ	և Հայկական ԽՍՀ գիտության վաստակավոր գործիչ
Ամուսին(ներ)	Անահիտ Միրզաբեկյան
Երեխա(ներ)	Էմիլ Միրզաբեկյան

Միրզաբեկյան Հայկ Հովհաննեսի (հունվարի 16, 1893(1893-01-16), Շուշի, Ելիզավետպոլի նահանգ, Ռուսական կայսրություն - փետրվարի 24, 1971(1971-02-24), Երևան, Հայկական ԽՍՀ, ԽՍՀՄ), հայ խորհրդային հիգիենիստ։ Բժշկական գիտությունների դոկտոր (1941), պրոֆեսոր (1942), ՀԽՍՀ գիտությունների վաստակավոր գործիչ։

Կենսագրություն

1916 թ.-ին ավարտել է Կիևի համալսարանի բժշկական ֆակուլտետը։ 1923-1939 թթ.-ին աշխատել է Հայաստանի ժողկոմիսարիատում, 1939 թ.-ից Երևանի սանիտարաբակտերոլոգիական Գիտահետազոտական Ինստիտուտի աշխատանքի հիգիենայի լաբորատորիայի վարիչ։

Այդ լաբորատորիայի բազայի վրա, Միրզաբեկյանի նախաձեռնությամբ, 1959 թ.-ին հիմնադրվել է աշխատանքի հիգիենայի և պրոֆեսիոնալ հիվանդությունների Գիտահետազոտական ինստիտուտը (1971 թ.-ից ընդհանուր հիգիենայի և պրոֆեսիոնալ հիվանդությունների ԳՀԻ)։ 1942 թ.-ին կազմակերպել է բժշկական ինստիտուտի աշխատանքի հիգիենայի ամբիոնը և վարել այն մինչև 1970 թ.-ը։ 1942-1945 թթ.-ին եղել է Երևանի զինվորական հոսպիտալի բժշկական ծառայության պետ։

Միրզաբեկյանի գիտական աշխատանքները վերաբերում են ՀԽՍՀ լեռնարդյունաբերության, տեքստիլ և քիմիական (սինթետիկ կաուչուկ, պոլիվինիլացետատ, ալյումին և այլն) արտադրական ձեռնարկությունների աշխատանքի հիգիենայի, պրոֆեսիոնալ հիվանդությունների, արդյունաբերական թունաբանության հարցերի ուսումնասիրությանը և բանվորների աշխատանքային պայմանների բարելավման գործնական մեթոդների ու հիգիենային նորմաների մշակմանը։ Միրզաբեկյանը աշխատանքներ է տարել նաև ՀԽՍՀ արդյունաբերական ձեռնարկությունների նախագծերի սանիտարական փորձաքննության, հիգիենային թերությունների կանխարգելման ուղղությամբ։ Պարգևատրվել է Աշխատանքային կարմիր դրոշի շքանշանով։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 7, էջ 617)։