Կոմիտաս Հակոբյան
- Վիքիպեդիայում կան հոդվածներ Հակոբյան ազգանունով այլ մարդկանց մասին։
| Կոմիտաս Հակոբյան | |
|---|---|
| 22 տարի | |
| Ծննդավայր | Լեռնային Ղարաբաղի Ինքնավար Մարզ, Մարտունու շրջան (Արցախ), գյուղ Քերթ |
| Մահվան վայր | Լեռնային Ղարաբաղի Հանրապետություն Մարտակերտի շրջան, գյուղ Կարմիրավան |
| Քաղաքացիություն | Արցախի Հանրապետություն |
| Զորատեսակ | Արցախի Հանրապետության Պաշտպանության բանակ |
| Ծառայության տարիներ | 1992-1994 թվականներ |
| Կոչում | ԼՂՀ Պաշտպանության բանակի ավագ լեյտենանտ |
| Մարտեր/ պատերազմներ | Արցախյան ազատամարտ |
| Պարգևներ | ԼՂՀ «Արիության համար» մեդալ |
Կոմիտաս Արսենի Հակոբյան (հունիսի 1, 1972, Քերթ, ԼՂԻՄ, Մարտունու շրջան, ԽՍՀՄ - մայիսի 5, 1994, Կարմիրավան, Մարտակերտի շրջան, Արցախ), բանաստեղծ, ազատամարտիկ, Արցախի գրողների միության անդամ, ԼՂՀ Պաշտպանության բանակի ավագ լեյտենանտ։
Կենսագրություն[խմբագրել | խմբագրել կոդը]
Կոմիտաս Հակոբյանը ծնվել է 1972 թվականի հունիսի 1-ին Լեռնային Ղարաբաղի ինքնավար մարզի Մարտունու շրջանի Քերթ գյուղում մտավորականի ընտանիքում։ 1989 թվականին տեղի միջնակարգ դպրոցն ավարտելուց հետո ուսանել է Կիրովականի (այժմ՝ Վանաձոր) Մանկավարժական ինստիտուտի Ստեփանակերտի բաժանմունքի Բանասիրական ֆակուլտետում։ Մինչև կանոնավոր բանակի կազմակերպումը Կ. Հակոբյանը կամավոր մասնակցել է պաշտպանական և ազատագրական մի շարք մարտերի, մասնավորապես Դիվանալար և Ղաջար գյուղերի ազատագրման օպերացիային, Մարզիլլուի, Ամիրանլարի, Գևորգավան ռազմական հենակետերի վերացմանը։ 1992-1994 թվականներին ԼՂՀ Պաշտպանության բանակի ստորաբաժանումների կազմում որպես գումարտակի հրամանատարի տեղակալ մասնակցել է ԼՂՀ Մարտակերտի շրջանի ազատագրական մարտերին։ Հերոսաբար զոհվել է 1994 թվականի մայիսի 5-ին ԼՂՀ Մարտակերտի շրջանի Կարմիրավան գյուղի պաշտպանության ժամանակ 22 տարեկան հասակում։ Հեղինակ է Արցախյան ազատամարտին նվիրված «Գոյության պատրանք» (Երևան, 1993) և «Նվիրում» (Երևան, 1997) բանաստեղծական ժողովածուների։ Ստեղծագործության հիմնական թեման սերն է, հայրենիքը, մարտնչող զինվորի հոգու հզորությունը։ Կոմիտաս Հակոբյանի մարմինն ամփոփված է հայրենի Քերթ գյուղում։
Պարգևներ[խմբագրել | խմբագրել կոդը]
- 2003 թվականին Կոմիտաս Հակոբյանը հետմահու պարգևատրվել է «Արիության համար» մեդալով։
Երկեր[խմբագրել | խմբագրել կոդը]
- Գոյության պատրանք (բանաստեղծություններ), Երևան, 1993, 46 էջ։
- Նվիրում (բանաստեղծություններ, օրագրային գրառումներ), Երևան, 1997, 74 էջ։
- Գոյության պատրանք, Երևան, 2018։
Գրականություն[խմբագրել | խմբագրել կոդը]
- Ղարաբաղյան ազատագրական պատերազմ (1988-1994 թթ.) հանրագիտարան, Երևան, 2004, էջ 403։