Լավրենտի Միրզոյան

Վիքիպեդիայում կան հոդվածներ Միրզոյան ազգանունով այլ մարդկանց մասին։

Լավրենտի Միրզոյան
Ծնվել է	մայիսի 22, 1950(1950-05-22)
Մահացել է	փետրվարի 15, 2024(2024-02-15) (73 տարեկան)
Քաղաքացիություն	ԽՍՀՄ և  Հայաստան
Գիտական աստիճան	գիտությունների թեկնածու
Մասնագիտություն	լեզվաբան
Պարգևներ և մրցանակներ	«Մովսես Խորենացի» մեդալ, ՀՀ ԿԳՆ «Ոսկե», ՀՀ մշակույթի և երիտասարդության հարցերի նախարարության «Ոսկե», ՀՀ ՊԿ ակադեմիայի «Ոսկե», «Ֆրիտյոֆ Նանսեն» միջազգային հիմնադրամի «Ոսկե» հուշամեդալներ, Արցախի «Երախտագիտություն» պետական, ՀՀ ՊՆ «Գարեգին Նժդեհ», ՀՀ ազգային գրադարանի «Հակոբ Մեղապարտ» մեդալներ

Լավրենտի Աշոտի Միրզոյան (մայիսի 22, 1950(1950-05-22) - փետրվարի 15, 2024(2024-02-15)), հայ լեզվաբան, մանկավարժական գիտությունների թեկնածու, պրոֆեսոր, ՀՀ ՄԳԱ ակադեմիկոս, Լրագրողների միության անդամ (1975 թվականից), ՀՀ ԿԳՆ լեզվի տեսչության նախկին պետ (2004 մայիս-2010 փետրվար)։ Դասախոսել է ՀՀ պետական կառավարման ակադեմիայում, Երևանի Խ. Աբովյանի անվան պետական մանկավարժական համալսարանում և Ճարտարապետության և շինարարարության Հայաստանի ազգային համալսարանում։

Հեղինակ է «Առձեռն մայրենի», «Ուղղագրական, հոմանիշների, դարձվածաբանական բառագիրք», «Իմացաբանական շտեմարան», «Սխալ և ճիշտ», «Գրպանի ուղղագրական բառարան», «Արդի հայերենի բառարան», «Խոսում են հերոսները», «Նորացման շնչով», «Երևան» (համահեղինակ) գրքերի, բազմաթիվ գիտամանկավարժական, հրապարակախոսական հոդվածների։ Խմբագրել է շուրջ 60-ից ավելի գիտատեսական գրքեր, ուսումնական ձեռնարկներ։ Թարգմանվել է 8 լեզվով։

Կենսագրություն

Լավրենտի Միրզոյանը ծնվել է 1950 թվականի մայիսի 22-ին Հայկական ԽՍՀ Շամշադինի շրջանի (այժմ մտնում է ՀՀ Տավուշի մարզ կազմի մեջ) Չորաթան գյուղում։ 1967-ին գերազանցությամբ ավարտել է Ներքին Կարմիրաղբյուրի միջնակարգ դպրոցը, ապա՝ ԵՊՀ ժուռնալիստիկայի ֆակուլտետը, Մոսկվայի կոմերիտական բարձրագույն դպրոցը, 2000-ին Մեծ Բրիտանիայի զարգացման գործակալության քաղաքացիական ծառայողների դասընթացները։ Աշխատել է հանրապետական մամուլում և հեռուստատեսությունում, հիմնադրել և խմբագրել է «Հայ աշխարհ»,«Համայնք», «Էրեբունի», «Քաղաքացիական ծառայություն» թերթերը, «Հանրային կառավարում» հանդեսը, խմբագրել է «Հայոց լեզուն և գրականությունը դպրոցում» հանդեսը, Տերմինաբանական ուղղագրական տեղեկատուն, եղել հայագիտական «Պայքար» ամսագրի խմբագիր-տնօրենը։ Հիմնադրել է «Պետական ծառայություն» հրատարակչությունը։

• 1975 թվականից, Հայաստանի լրագրողների միության անդամ
• 1990-1993, Հեռուստառադիոպետկոմի ինֆորմացիայի գլխավոր խմբագրության գլխավոր խմբագրի տեղակալ
• 1999-2004, ՀՀ մշակույթի և երիտասարդության հարցերի նախարարության Հրատարակչական գործի գործակալության պետի տեղակալ։
• 2004-2010, ՀՀ ԿԳՆ լեզվի տեսչության պետ
• 2010-2011, Խ. Աբովյանի անվան Հայկական պետական մանկավարժական համալսարանի պրոռեկտոր, 2011-2012 թվականներին՝ Հայաստանի պետական տնտեսագիտական համալսարանի աշխատակազմի ղեկավար
• Հրապարակել է «Տավուշ», «Տավշո արմատներ», «Չորաթան», «Գանձեր» և այլ գրքերը։
• Խմբագրել է ՀՀ Ազգային ատլասը (2 հատոր), ԼՂՀ ատլասը, Երևանի վարչատերիտորիալ բաժանման ատլասը
• 1990 թվականին ընտրվել է Երևանի քաղաքային խորհրդի պատգամավոր, եղել մշակույթի, լրատվության, լեզվի հանձնաժողովի նախագահ
• 1996 թվականին ընտրվել է Երևանի Էրեբունու համայնքի ավագանու անդամ
• 2019 թվականից, «Տավուշ» հայրենակցական միության նախագահ

Պարգևատրվել է ՀՀ կրթության և գիտության նախարարության «Ոսկե», ՀՀ մշակույթի և երիտասարդության հարցերի նախարարության «Ոսկե», ՀՀ պետական կառավարման ակադեմիայի «Ոսկե», «Արվեստագետ» կրթամշակութային միության «Ոսկե», «Ֆրիտյոֆ Նանսեն» միջազգային հիմնադրամի «Ոսկե» հուշամեդալներով, Արցախի «Երախտագիտություն» պետական, ՀՀ պաշտպանության նախարարության «Գարեգին Նժդեհ», ՀՀ ազգային գրադարանի «Հակոբ Մեղապարտ» մեդալներով։

2023 թվականին ՀՀ Նախագահի հրամանագրով արժանացել է «Մովսես Խորենացի» մեդալի։

Արտաքին հղումներ

• Լավրենտի Միրզոյանը humor.am կայքում(չաշխատող հղում)