Արցախյան ազատամարտի հուշարձան (Մարտունի, Գեղարքունիքի մարզ)

Արցախյան ազատամարտի հուշարձան (Մարտունի, Գեղարքունիքի մարզ);
Տեսակ	հուշարձան
Ստեղծում	2012
Երկիր	Հայաստան
Բնակավայր	Մարտունի
Ներկա վիճակ	կանգուն
	Artsakh War Memorial (Martuni, Armenia) Վիքիպահեստում

Արցախյան ազատամարտի հուշարձան, Արցախյան ազատամարտի մարտունեցի զոհերին նվիրված հուշարձան Գեղարքունիքի մարզի Մարտունի քաղաքում՝ քաղաքապետարանի դիմաց, Հայրենական պատերազմի զոհերին նվիրված հուշարձանի հարևանությամբ^[1]։ Բացվել է 2012 թվականի նոյեմբերի 11-ին^[2]։

Պատմություն

Հուշարձանը բացվել է 2012 թվականի նոյեմբերի 11-ին։ Այն օծել է Հայ առաքելական եկեղեցու Գեղարքունիքի թեմի առաջնորդ Մարկոս եպիսկոպոս Հովհաննիսյանը։ Արցախյան ազատամարտում Հայաստանի Մարտունու վարչական շրջանը տվել է ավելի քան 100 զոհ, 150 վիրավոր, այդ թվում` 10 զոհ, 2 անհայտ կորած և 30 վիրավոր՝ Մարտունի քաղաքից^[2]։

Մարտունի քաղաքում Արցախյան գոյամարտում զոհված մարտունեցիների հիշատակը և գոյամարտի խորհուրդը հավերժացնող հուշարձանի նախաձեռնողը Մարտունի քաղաքի բնակիչ, Հայաստանի նկարիչների միության անդամ Արամայիս Խլղաթյանն է, ում նախաձեռնությամբ Մարտունի քաղաքում կազմակերպվել է քանդակագործության սիմպոզիում^[3], որի շրջանակներում ձեռնարկվել է Արցախյան ազատամարտում զոհված մարտունեցիների հուշարձանի ստեղծումը։ Սիմպոզիումը փակվել է սեպտեմբերի սկզբին, սակայն քանդակագործներ Արտիկ Քոչարյանը, Արամայիս Խլղաթյանը և Ռաֆիկ Սարգսյանը շարունակել են հուշարձանի ստեղծման աշխատանքներն՝ այն ավարտելով նոյեմբերի սկզբներին^[2]։

Հուշարձանի բացման արարողությանը մասնակցել են Հայաստանի պաշտպանության նախարարության, Գեղարքունիքի մարզպետարանի, Երկրապահ կամավորականների միության ներկայացուցիչներ, Մարտունի քաղաքի և տարածաշրջանի համայնքների ներկայացուցիչներ, քանդակագործության սիմպոզիումը նախաձեռնող խմբի անդամներ, բարեգործներ և հովանավորներ։ Հուշարձանը բացել են զոհված ազատամարտիկ Արամ Խլոյանի մայր Տատյանա Խլոյանը և զոհված ազատամարտիկ Գեիմ Գուլեյանի հայր Ռաֆիկ Գուլեյանը։

Նկարագրություն

Հուշարձանը շուրջ 4 մետր բարձրությամբ քանդակ է, որի վրա պատկերված են կենաց ծառը և զոհված ազատամարտիկը, ով երկինք է համբարձվում Հազարան Բլբուլի թևերի վրա։

Ես ոչ մի վայրկյան մարտում զոհված իմ ընկերներին չեմ պատկերացնում մեռած, այլ՝ ապրող ու Հազարան Բլբուլի թևերի վրա անմահության հեռաստաններ գնացող^[2]։

- քանդակագործ Արտիկ Քոչարյան

Հեղինակներ

Հուշարձանը հեղինակել է Հայաստանի նկարիչների միության անդամ, Արցախյան ազատամարտի մասնակից Արտիկ Քոչարյանը։ Հուշարձանի համահեղինակներն են Արամայիս Խլղաթյանը և Ռաֆիկ Սարգսյանը^[2]։

Հուշարձանը ստեղծվել է Մարտունի քաղաքի բնակիչ Իշխան Գրիգորյանի բարերարությամբ^[2]։ Ստեղծման գործում իրենց աջակցությունն են ունեցել Ռաֆիկ Գրիգորյանը, բարերարներ Սևակ Շահինյանը, Ավետիք Նազարյանը, Դավիթ Երանոսյանը։ Հուշարձանի պատվանդանի կառուցման և այլ ընթացիկ աշխատանքներն իրականացրել է Մարտունու քաղաքապետարանը։

Պատկերասրահ

Մարտունու քաղաքապետարանի շենքը: Աջ կողմում՝ Արցախյան ազատամարտի հուշարձան
Հուշարձանի տեսքը
«Ուժն է ծնում իրավունք» մակագրություն հուշարձանի վրա
«Արցախյան գոյամարտի զոհերի հիշատակին» մակագրություն հուշարձանի վրա

Ծանոթագրություններ

[1] «Արցախյան գոյամարտի զոհերի հիշատակը հավերժացնող հուշակոթող».

[:0-2] 2,0 ^2,1 ^2,2 ^2,3 ^2,4 ^2,5 Մարտունիում Արցախյան հերոսամարտի մարտունեցի զոհերին նվիրված հուշարձան կանգնեցվեց

[3] «Քանդակագործության սիմպոզիում Մարտունի քաղաքում».

[1]

[2]

[3]