Անդրեյ Բունին

Անդրեյ Բունին
Ծնվել է	մարտի 15 (28), 1905
Ծննդավայր	Վորոնեժ, Ռուսական կայսրություն
Մահացել է	1977
Վախճանի վայր	Մոսկվա, ԽՍՀՄ
Պարգևներ	և

Անդրեյ Վլադիմիրովիչ Բունին (ռուս.՝ Андрей Владимирович Бунин, մարտի 15 (28), 1905, Վորոնեժ, Ռուսական կայսրություն - 1977, Մոսկվա, ԽՍՀՄ), խորհրդային ճարտարապետ և ճարտարապետության պատմաբան, արվեստագիտության դոկտոր (1958)։ Ճարտարապետության ակադեմիայի թղթակից անդամ (1941)։

Կենսագրություն

Անդրեյ Բունինը ծնվել է Վորոնեժում, 1905 թվականի մարտի 15-ին (մարտի 28, նոր տոմարով)։ Նրա հորեղբայրը՝ Նարկիզ Բունինը, եղել է նկարիչ։ 1915 թվականից նա ապրում էր Նովի Օսկոլում։ Մանկուց հրապուրվել է նկարչությամբ, ինչին նպաստել է հորեղբայրը։ 12 տարեկան հասակում մասնակցել է գեղարվեստական ինքնագործունեության գավառային ցուցահանդեսին, որտեղ նրան նկատել են վարչական շրջանի գործադիր կոմիտեի ներկայացուցիչները և որոշել են օգնել երիտասարդ նկարչին շարունակելու իր գեղարվեստական կրթությունը։ Կուրսկի գավառի ժողովրդական կրթության բաժնի միջնորդությամբ կրթության ժողովրդական կոմիսար Անատոլի Լունաչարսկին թույլատրել է Բունինին ուսումը անվճար շարունակել Մոսկվայում։ 1925 թվականից Բունինը սովորել է Բարձրագույն գեղարվեստա-տեխնիկական արվեստանոցների դասընթացների ճարտարապետական ֆակուլտետում, որն ավարտել է 1929 թվականին (սովորել է Նիկոլայ Լադովսկու մոտ)։ 1928 թվականից եղել է նոր ճարտարապետների ասոցիացիայի (ASNOVA) անդամ։

1929 թվականից Բունինն աշխատել է Մոսկվայի կոմունալ տնտեսության հողաշինության բաժնում։ Եղել է ԽՍՀՄ կենտրոնական գործադիր կոմիտեի նախագահությանը կից Խորհուրդների պալատի կառուցման խորհրդի անդամ։ 1935 թվականից աշխատել է ճարտարապետության ակադեմիայի պատմության և ճարտարապետության տեսության գրասենյակում։ 1942 թվականից եղել է Մոսկվայի ճարտարապետության ինստիտուտի պրոֆեսոր, որտեղ դասավանդել է համաշխարհային քաղաքաշինության և արվեստի պատմություն։ Բացի իր մասնագիտական աշխատանքից, Բունինը զբաղվել է նաև հասարակական գործունեությամբ. ղեկավարել է Պատմության և մշակույթի հուշարձանների պաշտպանության համառուսական ընկերության Ձերժինսկու խորհրդի նախագահությունը, եղել է ՅՈՒՆԵՍԿՕ-ի մշակութային հուշարձանների և պատմական վայրերի պաշտպանության կոմիտեի անդամ։

Գրել է մի շարք աշխատություններ`

• 1931 թվականին «Խորհրդային ճարտարապետություն» ամսագրի 3-րդ համարում լույս է տեսել «Քաղաքի ճարտարապետական ձևավորումը» հոդվածը,
• 1935 թվականին, Մ. Գ. Կրուգլովի հետ համահեղինակությամբ, գրել է «Քաղաքային ճարտարապետկան համալիրներ։ Վերածնունդ» գիրքը,
• 1940 թվականին լույս է տեսել նրա «Քաղաքների ճարտարապետական կոմպոզիցիան» գիրքը,
• 1945 թվականին գրել է «Քաղաքաշինություն» գիրքը,
• 1979 թվականին լույս է տեսել նրա «Քաղաքաշինական արվեստի պատմություն» երկհատորյակը։

1955 թվականից բնակվել է Մոսկվայում՝ Մարշալ Բիրյուզովի փողոցի թիվ 7 շենքում։ Մահացել է 1977 թվականին Մոսկվայում։ Թաղված է Վագանկովյան գերեզմանատանը (3-րդ տեղամաս)։

Պարգևներ

• ՌՍՖՍՀ գիտության վաստակավոր գործիչ,
• ԽՍՀՄ պետական մրցանակի դափնեկիր (1976)։