Ռուզան Գասպարյան
Ռուզան Գասպարյան | |
---|---|
Ծնվել է | նոյեմբերի 7, 1961 (62 տարեկան) |
Ծննդավայր | Դոլանլար (Արևշատ), նոյեմբերի 7, 1961 (62 տարեկան) |
Քաղաքացիություն | ԽՍՀՄ Արցախի Հանրապետություն |
Ազգություն | հայ |
Մասնագիտություն | դերասանուհի |
Ռուզան (Ռոզա) Էդուարդի Գասպարյան (նոյեմբերի 7, 1961, Արևշատ, ԼՂԻՄ, ԽՍՀՄ), հայ դերասանուհի:
Կենսագրություն
Ծնվել է 1961 թվականի նոյեմբերի 7-ին, Հադրութի շրջանի Դոլանլար (այժմ՝ Արևշատ) գյուղում։ 1979 թ. ավարտել է տեղի միջնակարգ դպրոցը, 1983 թ.՝ Ստեփանակերտի հայկական դրամատիկական թատրոնին կից գործող դրամատիկ դերասանի ստուդիան, 2013 թ.՝ Ստեփանակերտի «Գրիգոր Նարեկացի» համալսարանի բանասիրական ֆակուլտետը։
Ստուդիայում սովորելու տարիներին (1981-1983 թթ.) միաժամանակ խաղացել է թատրոնի բեմադրություններում՝ Զովիկ (Ա.Պապայան՝ «Աշխարհն, այո, շուռ է եկել»), Աղջիկ (Օ. Ուայլդ՝ «Երջանիկ արքայազնը»)։
Աշխատանքային կենսագրությունն սկսել է 1983-ին՝ Ղարմետաքսկոմբինատում՝ որպես բանվորուհի։ Աշխատանքին զուգընթաց մասնակցել է Ղարմետաքսկոմբինատի ժողովրդական թատրոնի բեմադրություններին՝ Մարիա Շուլց (Ա.Արաքսմանյան՝ «Անտառները շարժվում են»), Գոհար (Ա.Պապայան՝ «Մեծ հարսանիք») և այլն։ Բեմադրությունները ներկայացվել են Ղարմետաքսկոմբինատի թատերասերների, ինչպես նաև՝ երկրամասի գյուղական բնակավայրերի հանդիսատեսի դատին։
Ստեփանակերտի պետական դրամատիկական թատրոնում աշխատանքային գործունեությունը սկսել է 2007 թվականից՝ որպես դերասանուհի [1]։ Նրա լավագույն դերակատարումներից են՝ Խազնադար (Գ.Տեր-Գրիգորյան՝ «Զգուշացեք, նա դեռ կա»), Զարա (Ս. Խալաթյան՝«Սերը պահարան չի հարցնում»), Դացա (Բ.Նուշիչ՝ «Տիկին մինիստրուհի»), Մեծ մամ (Վ.Օվյան՝ «Ակամա մեղավորներ»), Նան, Տատ, Կիրակոսի կին (Վ.Օվյան՝ «Աշխարհը Լոռվա ձորերում»), Պարուհի (Մուրացան՝ «Ռուզան») և այլն։
Արտասանություններով ակտիվորեն մասնակցում է թատրոնի, ինչպես նաև համաքաղաքային գրական-երաժշտական և հումորային ծրագրերին։
2007 թվականից առ այսօր աշխատում է Ստեփանակերտի պետական դրամատիկական թատրոնում՝ որպես երկրորդ կարգի դերասանուհի:
Դերերը՝ թատերական ներկայացումներում
Ներկայացում | Դեր |
---|---|
Աշխարհն, այո, շուռ է եկել | Զովիկ |
Երջանիկ արքայազնը | Աղջիկ |
Անտառները շարժվում են | Մարիա Շուլց |
Մեծ հարսանիք | Գոհար |
Զգուշացեք, նա դեռ կա | Խազնադար |
Սերը պահարան չի հարցնում | Զարա |
Տիկին մինիստրուհի[2] | Դացա |
Ակամա մեղավորներ | Մեծ մամ |
Աշխարհը Լոռվա ձորերում | Նան, Տատ, Կիրակոսի կին |
Ռուզան | Պարուհի |
Վեղետ մատաղ, իմ Արցախ[3] | Սաթենիկ |
Մասնակցությունը՝ կինոնկարներում
Ֆիլմ | Ռեժիսոր |
---|---|
Եթե բոլորը... | Նատալյա Բելյաուսկենե |
Ընդհատված մանկություն | Ջիվան Ավետիսյան |
Միստիկ երկիր Առան [4] | Հրանտ Մովսիսյան |
Ծանոթագրություններ
- ↑ Ստեփանակերտի Վ.Փափազյանի անվան պետական դրամատիկական թատրոնի դերասանական անձնակազմ
- ↑ Ազգականների տեսարանը («Տիկին մինիստրուհի» ներկայացումից)
- ↑ «Վեղետ մատաղ, իմ Արցախ» ներկայացման տեսագրությունը
- ↑ Վավերագրական-խաղարկային ֆիլմ, նվիրվում է ՀԱԵ Արցախի թեմի վերաբացման 30-ամյակին։