Վորոնցովի պալատ (Սանկտ Պետերբուրգ)

Վիքիպեդիայից՝ ազատ հանրագիտարանից
Վորոնցովի պալատ

Վորոնցովի պալատ (ռուս.՝ Воронцовский дворец), շինություն Ռուսաստանի Դաշնության Սանկտ Պետերբուրգ քաղաքում՝ կենտրոնական Սադովայա փողոցում՝ Գոստինի դվորի դեմ դիմաց։ Պալատի հեղինակն է ճարտարապետ Բարտոլոմեո Ռաստրելլին, ում գլխավորությամբ պալատը կառուցվել է 1749—1757 թվականներին։ Այն կառուցվել է կանցլեր Միխայիլ Վորոնցովի համար։ Պալատը աչքի է ընկնում հարուստ, զարդանախշված դիմային պատով, ինտերյերային հարուստ լուծումներով։ Այնտեղ հաշվվում են ավելի քան 50 հանդիսասրահներ և դահլիճներ։ Պալատը կառուցվել է բարոկկո ոճով։

Սադովայա փողոցի կողմից Վորոնցովի պալատի դիմաց հանդիսավոր բակն է և թուջե ցանկապատը։ Գլխավոր կորպուսի ետևի մասում այգի էր, որը ձգվում էր մինչև Ֆոնտանկա։

Վորոնցովի պալատ

Պալատի շինարարությունը այնքան մեծ ներդրում է պահանջել, որ 1763 թվականին կոմս Վորոնցովը պարտք է վերցնում ռուսական պետական գանձարանից։ Պավել I–ի գահ բարձրանալուց հետո՝ 1790–ական թվականների վերջին, պալատը հանձնվել է Մալթայի միաբանությանը, ինչպես նաև այստեղ է տեղավորվում ռուսական միաբանությունների ղեկավար մարմինը։

1798—1800 թվականներին ճարտարապետ Ջակոմո Կվարենգիի նախագծով պալատում կառուցվում է սուրբ Հովհաննես Մկրտչի ծննդյան եկեղեցին, իսկ այգու կողմից իր իսկ նախագծով կառուցվում է Մալթայի կապելլան։

1810–1918 թվականներին պալատում հաստատվում է Պաժերի կորպուսը։ Հոկտեմբերյան հեղափոխության հաղթանակից հետո այստեղ է հաստատվում Պետրոգրադի առաջին հետևակային դպրոցը։ 1937 թվականին այդ դպրոցի հիման վրա ձևավորվում է Սերգեյ Կիրովի անվան Լենինգրադի առաջին հետևակային ուսումնարանը. 1955 թվականին նույն պալատը սկսում է ծառայել որպես Սանկտ Պետերբուրգի Սուվորովի ռազմական ուսումնարան։

Գրականություն[խմբագրել]

Commons-logo.svg
  • Витязева В.А., Кириков Б.М.։ Ленинград։ Путеводитель,1988
Պալատի տեսքը ձմռանը