Վարդան Ասլանյան Քահանա
- Վիքիպեդիայում կան հոդվածներ Ասլանյան ազգանունով այլ մարդկանց մասին։
Ծնվել է | 1863 |
---|---|
Ծննդավայր | Սեբաստիայի նահանգ, Սեբաստիայի գավառ, Ակն գավառակ, Բինկյան ավան |
Մահացել է | 1915 |
Մահվան վայր | Խարբերդ |
Ազգություն | հայ |
Մասնագիտություն | բժիշկ մշակութային գործիչ |
Աշխատավայր | Խարբերդի սբ. Կարապետ թաղի քարոզիչ քահանա |
Վարդան Ասլանյան Քահանա(1863, Սեբաստիայի նահանգ, Սեբաստիայի գավառ, Ակն գավառակ, Բինկյան ավան - 1915, Խարբերդ), հայ բժիշկ, մշակութային գործիչ։
Կենսագրություն[խմբագրել | խմբագրել կոդը]
Վարդան Ասլանյան Քահանան ծնվել է 1863 թվականին, Սեբաստիայի նահանգի Սեբաստիայի գավառի Ակն գավառակի Բինկյան ավանում։ Նախնական կրթությունն ստացել է ծննդավայրում։ Այնուհետև Կ. Պոլսում 3 տարի դեղագործություն է ուսանել։ 1884 թվականին Կ. Պոլսում գրատուն է հիմնել։ 1889 թվականին շրջագայել է Եվրոպայում և Փարիզի արվեստահանդեսը այցելել։ Կ. Պոլսում հիմնադրել է հյուսվածքեղենի գործարան, որի համար պատվոնշան է ստացել։ 1892-1897 թվականներին Բինկյանում ուսուցչությամբ է զբաղվել։ 1897 թվականին քահանա է ձեռնադրվել։ 1897-1909 թվականներին պաշտոնավարել է Սեբաստիայի գավառի Տիվրիկի գավառակի Զմառա ավանում։ Այնուհետև պաշտոնավարել է Խարբերդի սբ. Կարապետ թաղի քարոզիչ քահանա։ Միաժամանակ, աշխարհագրություն և կրոն է դասավանդել Թլկատինցու դպրոցում և աղջկանց Սմբատյան ճեմարանում։ Պատմաբանասիրական, կրոնա-բարոյական և այլ բնույթի հոդվածներով աշխատակցել է «Հայրենիք», «Արեւելք», «Բիւզանդիոն» (Կ. Պոլիս) և «Արեւելեան մամուլ» (Զմյուռնիա [Իզմիր]) օրաթերթերին։ Հրատարակել է Հին և Նոր Ուխտի դասագրքեր, պատմական անտիպ երկեր։
1915 թվականի սարսափի օրերին իբրև հեղափոխական դեմք, բանտարկվել է Խարբերդի բանտում, եղել Թլկատենցու խցակիցը և երկու գործ գրել։ 1915 թվականին Խարբերդի բանտում նահատակվել է ուրիշ հայ մտավորականների և հոգևորականների հետ միասին՝ շենքի հրկիզումով՝ 52 տարեկանում։
Գրականություն[խմբագրել | խմբագրել կոդը]
- Ստեփանյան Գառնիկ, Կենսագրական բառարան, հ. Ա., Երևան, 1973։
- Թէոդիկ, Յուշարձան նահատակ մտաւորականութեան, Բ. տպագրութիւն, Երեւան, ապրիլ 24, 1985։
Աղբյուրներ[խմբագրել | խմբագրել կոդը]
- Հարություն Մինասյան, Օսմանյան կայսրությունում և Թուրքիայի Հանրապետությունում բռնաճնշումների և ցեղասպանության ենթարկված հայ բժիշկներ, Երևան, «Լուսաբաց», 2014 — 520 էջ։