Վահան Հովսեփյան
| Վահան Հովսեփյան | |
|---|---|
| Ծնվել է | 1880[1] |
| Ծննդավայր | Գանձակ, Կովկասի փոխարքայություն, Ռուսական կայսրություն[1] |
| Մահացել է | 1937[1] |
| Մասնագիտություն | կուսակցական աշխատող |
| Կուսակցություն | ԽՄԿԿ[1] |
Վահան Վարդազարի Հովսեփյան (1880[1], Գանձակ, Կովկասի փոխարքայություն, Ռուսական կայսրություն[1] - 1937[1]), խորհրդային կուսակցական գործիչ, ԽՄԿԿ անդամ (1905)։
Հեղափոխական գործունեությունն սկսել է 1904 թվականից՝ ծննդավայրում կազմակերպելով մարքսիստական գաղտնի խմբակ։ 1905-1908 թվականներին անլեգալ քարոզչական գործունեություն է ծավալել քաղաքի բանվորների և կայազորի զինվորների շրջանում։ 1908 թվականին արտաքսվել է Գանձակից։ Հեղափոխական գործունեությունը շարունակել է Թիֆլիսում և Հայաստանի շրջաններում։ 1910 թվականին ձերբակալվել և ութ ամիս Մետեխի բանտում մնալուց հետո աքսորվել է Պերմի նահանգ, որտեղից 1915 թվականին զորակոչվել է բանակ։ 1917 թվականի Փետրվարյան հեղափոխությունից հետո ընտրվել է զինվորական կոմիտեի անդամ։ Թիֆլիսի բոլշևիկյան կոմիտեի հանձնարարությամբ Ասքանազ Մռավյանի և Սուրեն Հովսեփյանի հետ մեկնել է Գանձակ, ապա՝ Օրենբուրգ։ 1920 թվականին աշխատանքի է նշանակվել Վրաստանում՝ Խորհրդային Ռուսաստանի ներկայացուցչությունում։ 1922 թվականին գործուղվել է Հայաստան և ընտրվել կուսակցության Երևանի քաղաքային կոմիտեի ագիտացիայի բաժնի վարիչ։ 1923 թվականին եղել է ՀԿ(բ) կ ԿՎՀ անդամ և կուսակցական հանձնաժողովի նախագահ, 1924 թվականից մինչև 1927 թվականը՝ Բանվորական գյուղտեսչության նախագահ, 1927 թվականից՝ ՀԽՍՀ Կենտրոնական վիճակագրական վարչության կառավարիչ։ Եղել է Անդրֆեդերացիայի գործադիր կոմիտեի, ինչպես նաև Անդրերկրկոմի վերահսկիչ հանձնաժողովի կազմում։
Ծանոթագրություններ[խմբագրել | խմբագրել կոդը]
- ↑ 1,0 1,1 1,2 1,3 1,4 1,5 1,6 1,7 1,8 Հայկական սովետական հանրագիտարան (հայ.) / Վ. Համբարձումյան, Կ. Խուդավերդյան — Հայկական հանրագիտարան հրատարակչություն, 1974.
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 6, էջ 582)։ 
|