Ուղիղ բարձրացող ցողուններով, 30-60 սմ բարձրությամբ բազմամյա խոտաբույս է։ Հանգույցներում փնջաձև դասավորված են նեղ գծային տերևները։ Տերևների վերին մակերեսը մուգ կանաչ է, փայլուն, ստորինը՝ թավոտ։ Բազմածաղիկ կիսահովանոցներում հավաքված մանր, հաճելի մեղրահոտով ծաղիկները կազմում են հուրանաձև ծաղկաբույլեր։ Բաժակը բացակայում է, չորս պսակաթերթիկները վառ դեղին են, բութ բլթակներով։ Հարթ պտուղը բաժանվում է երկու կեսի[1]։
Բուժական նպատակներով օգտագործում են վերգետնյա մասը ծաղկման շրջանում և կոճղարմատները։ Կումարինի հաճելի հոտ ունեցող բույսը, որը պարունակում է դաբաղանյութեր, սապոնիններ, օրգանական թթուներ, միկրոտարրեր, ունի արյունահոսությունը դադարեցնող, լուծողական, ցավազրկող, լեղամուղ և միզամուղ ազդեցություն[1]։