Հարմիկ (Հարություն) Դավթյան
- Վիքիպեդիայում կան հոդվածներ Դավթյան ազգանունով այլ մարդկանց մասին։
 | |
|---|---|
| Ծնվել է | փետրվարի 21, 1924[1] |
| Ծննդավայր | Թեհրան, Իրան |
| Մահացել է | նոյեմբերի 12, 2009 (85 տարեկան) |
| Կրթություն | Հայկազյան դպրոց և Թեհրանի համալսարան |
| Մասնագիտություն | բժիշկ և հոգեբույժ |
| Գիտական աստիճան | բժշկական գիտությունների դոկտոր և պրոֆեսոր |
Հարմիկ (Հարություն) Դավթյան (Դավիդյան, փետրվարի 21, 1924[1], Թեհրան, Իրան - նոյեմբերի 12, 2009), իրանահայ բժիշկ, գիտնական, հոգեբույժ, բժշկագիտության դոկտոր (1950), պրոֆեսոր, Իրանի ԲԳԱ անդամ, Իրանի ԳԱ պատվավոր անդամ (1998)։
Կենսագրություն[խմբագրել | խմբագրել կոդը]
Հարություն (Հարմիկ) Դավթյանը ծնվել է 1924 թվականին Թեհրանում։ 1936 թվականին ավարտել է Թեհրանի «Հայկազեան» երկսեռ դպրոցը, 1942 թվականին՝ Թեհրանի ամերիկյան քոլեջը։ 1948 թվականին ավարտել է Թեհրանի համալսարանի բժշկական ֆակուլտետը, 1950 թվականին ստացել բժշկության դոկտորի աստիճան։ 1950-1987 թվականներին աշխատել է Թեհրանի համալսարանի բժշկական ֆակուլտետի հոգեբուժության բաժնում, որպես ասիստենտ, պոլիկլինիկայի վարիչ, պրոֆեսորի օգնական, պրոֆեսոր, բաժնի վարիչ։ Թեհրանի համալսարանի և Լոնդոնի հոգեբուժության ինստիտուտի կողմից ստացել է «մասնագետ հոգեբույժի» տիտղոս։ 1967-1972 թվականներին Թեհրանի համալսարանի առողջապահական ֆակուլտետում դասավանդել է մտային առողջապահություն, 1970-1974 թվականներին՝ նույն համալսարան բժշկական ֆակուլտետի վարչական խորհրդի անդամ, 1971-1975 թվականներին՝ գիտահետազոտական կոմիտեի անդամ։ 1979-1983 թվականներին աշխատել է Թեհրանի «Ռուզբեհ» հոգեբուժական հիվանդանոցի տնօրեն, 1959-1973 թվականներին՝ Իրանի հոգեբուժական միության հիմնադիր-ատենադպիր, 1996 թվականից՝ Իրանի հոգեբուժական միության նախագահ։ 1988 թվականից եղել է Իրանի առողջապահության նախարարությանն առընթեր «Երկրի հոգեբուժական հոգեբանական կոմիտեի» նախագահ, 1970-1991 թվականներին՝ Առողջապահության համաշխարհային կազմակերպության Հոգեկան առողջության բաժնի փորձագետ[2]։ Դավթյանը եղել է Իրանի հայկական դպրոցների հոգաբարձության, Կենտրոնական հոգաբարձության (1970-1974), Թեհրանի Հայոց թեմի, Թեմական խորհրդի (1986-1988), Պատգամավորական ժողովի անդամ զբաղեցրել է նաև ատենապետի պաշտոնը (1984 թվականից)։ Հոգեբուժության բնագավառում մատուցած ծառայությունների և Ռուզբեհ հիվանդանոցի տնօրենի պաշտոնում կատարած անգնահատելի աշխատանքի համար նույն հիվանդանոցի գրադարանը կոչվել է Հարմիկ Դավթյանի անունով։
Աշխատություններ[խմբագրել | խմբագրել կոդը]
Գիտական աշխատանքները վերաբերում են հոգեկան հիվանդությունների կլինիկական տարատեսակների ուսումնասիրությանը, հոգեբուժության և բժշկական այլ մասնագիտությունների միջև եղած կապին, Իրանի հոգեբուժության պատմության հարցերին։ Հեղինակ է ավելի քան 100 գիտական հոդվածների և մենագրությունների։
- «Ընկճվածության ճանաչումը և բուժումը պարսկական մշակույթում» (Թեհրան, 2007 թվական)
- «Իրանի հոգեբուժության պատմությունը» (Թեհրան, 2008 թվական)
Անդամակցություն[խմբագրել | խմբագրել կոդը]
- 1993 թվականին ընտրվել է Իրանի Բժշկական գիտությունների ակադեմիայի անդամ
- 1971-1983 թվականներին եղել է Հոգեբույժների համաշխարհային ընկերության կոմիտեի անդամ
- 1977-1985 թվականներին՝ էթիկայի հանձնաժողովի անդամ
- 1989 թվականից՝ ռազմական հոգեբուժության բաժնի անդամ
- 1970 թվականից եղել է Անգլիայի Թագավորական ընկերության բժշկական բաժնի անդամ
- Անգլիայի Հոգեբույժների թագավորական քոլեջի 100 հիմնադիր անդամներից մեկը ընտրվելու առթիվ արժանացել է «Հոգեբույժների թագավորական քոլեջի գիտական ընկերության հիմնադիր անդամի» տիտղոսին
Պարգևներ[խմբագրել | խմբագրել կոդը]
- Մխիթար Հերացու շքանշան, 2006
- Հայաստանի նախագահի պատվոգիր
- Իրանի նախագահի պատվոգիր, 2002
- Համբուրգում կայացած Հոգեբույժների միջազգային 11-րդ համագումարում Համաշխարհային հոգեբուժական ընկերության կողմից արժանացել է «Հոգեբուժության առաջնորդ» տիտղոսի, 1999
Մահ[խմբագրել | խմբագրել կոդը]
Մահացել է 2009 թվականի նոյեմբերի 12-ին՝ 86 տարեկան հասակում։
Հիշատակ[խմբագրել | խմբագրել կոդը]
2012 թվականի հունիսի 29-ին Թեհրանի հայոց թեմի առաջնորդ Տ. Սեպուհ Արքեպիսկոպոս Սարգսյանի հովանավորությամբ Թեհրանի սուրբ Աստվածածին եկեղեցու տարածքում բացվել է Հարմիկ Դավթյանի կիսանդրին (քանդակագործ՝ Գագիկ Ստեփանյան)[3][4]։
Գրականություն[խմբագրել | խմբագրել կոդը]
- Իրանահայոց հանրագիտարան։ Կազմող՝ Ժանետ Տ. Լազարյան։ Երևան, «ՎՄՎ-Պրինտ, 2012
Ծանոթագրություններ[խմբագրել | խմբագրել կոդը]
- ↑ 1,0 1,1 http://am.hayazg.info/index.php?curid=1706
- ↑ «Հարություն Դավթյան». www.med-practic.com. Վերցված է 2017 թ․ դեկտեմբերի 5-ին.
- ↑ Radio, IRIB Armenian. «Թեհրանում տեղի է ունեցել Դկտ. Հարմիկ Դավթյանի կիսանդրու բացման արարողությունը». Վերցված է 2017 թ․ դեկտեմբերի 5-ին.(չաշխատող հղում)
- ↑ «Հարմիկ (Հարություն) Դավթյանի կիսանդրին». ImYerevan.com. Վերցված է 2017 թ․ դեկտեմբերի 5-ին.(չաշխատող հղում)
|
