Գևորգ Եղիյան

Վիքիպեդիայում կան հոդվածներ Եղիյան ազգանունով այլ մարդկանց մասին։

Գևորգ Եղիյան
Ծնվել է	1914
Մահացել է	1986
Մահվան վայր	Երևան, Հայկական ԽՍՀ, ԽՍՀՄ
Կրթություն	Սոֆիայի համալսարան
Մասնագիտություն	վիրաբույժ
Գիտական աստիճան	բժշկական գիտությունների դոկտոր և պրոֆեսոր
Աշխատավայր	Երևանի Մխիթար Հերացու անվան Պետական Բժշկական Համալսարան և ՀՀ ԱՆ

Գևորգ Մարուքի Եղիյան (1914, Չոռլու, Թուրքիա- 1986, Երևան), հայ բժիշկ, դիմածնոտային վիրաբույժ։ Բժշկական գիտությունների դոկտոր (1963), պրոֆեսոր (1964)։

Կենսագրություն

Գևորգ Եղիյանը ծնվել է Թուրքիայի Չոռլու քաղաքում։ 1938 թվականին ավարտել է Սոֆիայի համալսարանի բժշկական ֆակուլտետը։ 1939 թվականին եղել է նույն համալսարանի բժշկական ֆակուլտետի վիրաբուժության ամբիոնի ասիստենտ։

Երկրորդ համաշխարհային պատերազմի ավարտից հետո հայրենադարձել է։ 1946 թվականից եղել է Հայրենական պատերազմի հաշմանդամների բուժման համար Երևանում ստեղծված հոսպիտալի վիրաբուժական բաժանմունքի վարիչը։

1947-1956 թվականներին եղել է Երևանի վնասվածքաբանության և օրթոպեդիայի գիտահետազոտական ինստիտուտի դիմածնոտային վիրաբուժության բաժանմունքի վարիչը։ Ուսումնասիրել է վերին շրթունքի բնածին արատների կլինիկան և բուժման եղանակները։ 1953 թվականին պաշտպանել է «Վերին շրթունքի բնածին ճեղքվածքների կլինիկան և բուժումը» թեմայով թեկնածուական ատենախոսությունը։

1956-1963 թվականներին աշխատել է Երևանի բժշկական ինստիտուտում, եղել է դիմածնոտային վիրաբուժության գծով հոսպիտալային վիրաբուժության ամբիոնի դոցենտ։ Հոսպիտալային վիրաբուժության ամբիոնում աշխատելու տարիներին լայն գործունեություն է ծավալել քթի դեֆորմացիաների և արատների ուսումնասիրության ուղղությամբ՝ որոնելով վիրահատական բուժման նոր և արդյունավետ եղանակներ։

1963 թվականին պաշտպանել է «Քթի դեֆորմացիաները և դեֆեկտները ու նրանց վիրահատական բուժման եղանակները» թեմայով դոկտորական ատենախոսությունը։

1963 թվականին Բժշկական ինստիտուտի կազմում հիմնադրել և ղեկավարել է ստոմատոլոգիայի ամբիոնը, 1968-1982 թվականներին եղել է վիրաբուժական ստոմատոլոգիայի ամբիոնի վարիչ։ 1965 թվականին հրատարակել է ստոմատոլոգիայի հայերեն առաջին դասագիրքը, հեղինակ է «Վիրաբուժական ստոմատոլոգիա» ուսումնական ձեռնարկի (1967)։

Եղել է ՀՀ առողջապահության նախարարության գլխավոր ստոմատոլոգ, հանրապետության ստոմատոլոգների գիտական ընկերության նախագահ, համամիութենական ընկերության վարչության անդամ, «Ստոմատոլոգիա» հանդեսի խմբագրական կոլեգիայի անդամ։

Երկեր

• Ատամները և բերանի խոռոչն առողջ պահելու մասին, Երևան, 1963 թ.:
• «Վիրաբուժական ստոմատոլոգիա», Երևան, 1967 թ.:

Արտաքին հղումներ

• Գևորգ Եղիյանի կայքը Արխիվացված 2016-03-06 Wayback Machine