Բենջամին Հոլթ
| Բենջամին Հոլթ | |
|---|---|
 | |
| Ծնվել է | հունվարի 1, 1849[1][2] |
| Ծննդավայր | Կոնկորդ, ԱՄՆ |
| Մահացել է | դեկտեմբերի 5, 1920[1][2] (71 տարեկան) |
| Մահվան վայր | Սթոքթոն, Կալիֆոռնիա, ԱՄՆ |
| Գերեզման | Stockton Rural Cemetery |
| Քաղաքացիություն | .svg){kind=small} ԱՄՆ |
| Մասնագիտություն | գյուտարար և գործարար |
| Պարգևներ և մրցանակներ | |
 Benjamin Holt Վիքիպահեստում | |
Բենջամին Հոլթ (անգլ.՝ Benjamin Leroy Holt, հունվարի 1, 1849[1][2], Կոնկորդ, ԱՄՆ - դեկտեմբերի 5, 1920[1][2], Սթոքթոն, Կալիֆոռնիա, ԱՄՆ), ամերիկացի ինժեներ, ձեռնարկատեր, առաջին թրթուրավոր շարժասարքի գյուտարարը (1904)։ Իր եղբայրների հետ հիմնել է Holt Manufacturing Company ընկերությունը[4]։
Կենսագրություն[խմբագրել | խմբագրել կոդը]
Ծնվել է 1849 թվականի հունվարի 1-ին Նյու Հեմփշիր նահանգի Կոնկորդ քաղաքում։ Նա ընտանիքի 11 երեխաներից կրտսեր եղբայրն էր։ Հայրը ձեռնարկատեր էր, ուներ սղոցամեքենա։
1864 թվականին Բենջամինի եղբայրը՝ Չարլզը, մեկնել է Կալիֆոռնիա նահանգի Սան Ֆրանցիսկո քաղաք, որտեղ հիմնել է «C. H. Holt and Co» ընկերությունը։ Այն սկսել է սայլակների համար փայտե անիվներ թողարկել, իսկ ավելի ուշ՝ պողպատե տրամվայի անիվներ։ Մյուս երկու եղբայրները՝ Ուիլյամն ու Էյմսը, 1871 թվականին նույնպես մեկնել են Սան Ֆրանցիսկո և միացել Չարլզին։ Եղբայրներն իրենց արտադրանքի համար նախատեսված գերանները Նյու Հեմփշիրից նավով ուղարկում էին Սան Ֆրանցիսիկո։ 1869 թվականին Բենջամինը սկսել է աշխատել հոր փայտասղոցարանում՝ պատասխանատու լինելով եղբայրներին Սան Ֆրանցիսկո ծառ մատակարարելու համար։ 23 տարեկանում նա բաժնեմաս է ստացել բիզնեսում և շարունակել սղոցանյութերը Նյու Գեփշիրից Կալիֆորնիա հասցնել։ 1875 թվականին մահացել է նրա մայրը, իսկ ութ տարի անց՝ հայրը։ Ծնողների մահից հետո եղբայրներից կրտսերը լքել է հայրական տունը և մեկնել Կալիֆոռնիա։
Բենջամին Հոլթը 1883 թվականին ժամանել է Կալիֆոռնիա։ Նրա եղբայրները Սթոքտոն քաղաքում հիմնել են «Stockton Wheel Company» ընկերությունը՝ գործի մեջ դնելով լրացուցիչ 65000 դոլար։ Ադ տարի ընկերությանը պատկանող եռահարկ աղյուսե և մեկհարկանի կարկասե շենքերում աշխատում էր 25 վարձու աշխատող։ Բենջամինը տիրապետում էր տեխնիկական հմտություններին և նորարարությաններին։ Այդ ժամանակ շրջակա դաշտերի մեծ մասը, որտեղ աճեցվում էր գյուղատնտեսական արտադրանքը, գտնվում էր Սան Խոակին գետահովտում։ Այստեղ առավելապես զբաղվում էին ցորենի մշակմամբ։ Բենջամինն իր արտադրությունը հեշտացնելու համար հորինել է իր առաջին ձիաքարշ կոմբայնը՝ «Link-Belt Combined Harvester»-ը։ Այս մեքենան հզորությունը շարժիչից անիվներին փոխանցելու համար օգտագործում էր ճկուն շղթայական տեղափոխում, այլ ոչ թե փոխանցումատուփ, ինչպես նախկինում էր արվում։ Այնուհետև ձիաքարշ ուժի փոխարեն նա սկսել է օգտագործել լոկոմոբիլ։
1890 թվականին Հոլթը կառուցել է իր առաջին փորձառու շարժիչը շոգեուժի համար՝ այն անվանելով «Old Betsy»։ Որպես վառելիք դրանում կարելի էր օգտագործել փայտ, ածուխ կամ նավթ։ Այն կշռում էր 22000 կգ և շարժվում էր մեծ մետաղական անիվներով։ Հոլթի ադ մեքենաները սկսել են կիրառվել ցորենի մաքրման և անտառամշակման գերանների տեղափոխման ժամանակ՝ ձիաքարշ կոմբայնների փոխարեն։ 1892 թվականին Հոլթն անտառային աշխատանքների համար արտադրել է շոգետրակտորներ, որոնք կարող էին 45 տոննա բեռ քաշել 1 ժամում 3 մղոն արագությամբ (4,8 կմ/ժ)։ Դա բեկում էր կենդանի ուժից անցում կատարելու մեջ։ Բենջամինը դարձել է նոր ստեղծված «Holt Manufacturing Company» ընկերության նախագահը, որն արտադրում էր այդ մեքենաները։ Նրա հաջորդ գյուտը գյուղատնտեսական կոմբայնն էր, որը կարող էր աշխատել մինչև 30 աստիճան թեքությամբ սարալանջին։
1889 թվականի հոկտեմբերի 7-ին մահացել է նրա եղբայր Էյմսը։ Հաջորդ հինգ տարիների ընթացքում մահացել են մնացած երկու եղբայրները։ Բենջամինը մենակ է մնացել իրենց բիզնեսի ղեկավարման մեջ։ Հետագայում նա հեղինակել է թրթուրավոր շարժասարքի ավելի քան 100 արտոնագիր։ 20-րդ դարի սկզբին նորարարությունների կենտրոնը Անգլիան էր, և 1903 թվականին Հոլթը գնացել է այնտեղ՝ իմանալու տեխնիկայի զարգացման ընթացիկ միտումների մասին։ Վերադառնալով Սթոքտոն՝ նա առաջինն է մշակել և օգտագործել անընդհատ թրթուրօղակները (թրթուր)՝ թրթուրավոր շարժասարքի տեղաշարժման համար։ 1904 թվականի նոյեմբերի 24-ին Սթոքտոնին հարող դաշտերում նա ցուցադրել է աշխարհում առաջին թրթուրավոր տրակտորը։ Որոշ ժամանակ անց Հոլթը գրանցել է «Caterpillar» ապրանքանիշը, որը թողարկվում էր սեփական արտադրության «Holt Manufacturing Company»-ի կողմից[5]։ Ընկերության տրակտորների օգտագործման համար բեկումնային էր 1909 թվականին շոգեշարժիչների փոխարեն բենզինային շարժիչների օգտագործումը։
Առաջին համաշխարհային պատերազմի ժամանակ հրետանին և բեռները քարշ տալու համար ձիերի փոխարեն օգտագործվել են Հոլթի տրակտորները։ Նրա տրակտորները ոգեշնչել են անգլիացի և ֆրանսիացի ինժեներներին տանկեր ստեղծելու համար, որոնք սկզբունքորեն փոխել են մարտական գործողությունների վարումը[6][7]։ Մինչև 1916 թվականը բրիտանացիները պատերազմում օգտագործում էին Հոլթի տրակտորները։ Առաջին համաշխարհային պատերազմի ավարտին Անտանտի ուժերը օգտագործել էին շուրջ 10000 թրթուրավոր մեքենա։ 1918 թվականի ապրիլի 22-ին բրիտանական բանակի սպա, գնդապետ Էռնեստ Սուինտոնը ԱՄՆ շրջագայության ժամանակ այցելել է Սթոքտոն։ Նա շնորհակալություն է հայտնել Բենջամին Հոլթին և նրա ընկերության աշխատակիցներին Առաջին համաշխարհային պատերազմի ընթացքում Գերմանիայի և նրա դաշնակիցների դեմ ռազմական գործողությունների մեջ իրենց ներդրման համար։
Պատերազմի ավարտից հետո Հոլթի ընկերությունը, բացի գյուղատնտեսական տրակտորներից, ձեռնամուխ է եղել նաև ճանապարհաշինական տեխնիկայի արտադրության մեջ։
Մահացել է 1920 թվականի դեկտեմբերի 5-ին Կալիֆորնիայի Սթոքտոն քաղաքում և թաղվել քաղաքային «Stockton Rural Cemetery» գերեզմանատանը գտնվող ընտանեկան դամբարանում[8]։
Բենջամին Հոլթի մահից հինգ տարի անց նրա «Holt Caterpillar Company» ընկերությունը միացվել է «C. L. Best Tractor Company» ընկերությանը, որպեսզի ստեղծվի նոր ձեռնարկություն, որը ներկայումս հայտնի է որպես «Caterpillar»[9]։
Ընտանիք[խմբագրել | խմբագրել կոդը]
1890 թվականին Բենջամինն ամուսնացել է Սթոքտոն քաղաքի պիոներների դուստր Աննա Բրաունի (անգլ.՝ Anna W. Brown Holt, 1868-1952) հետ[10]։ Նրանք ունեցել են 5 երեխա՝ Ալֆրեդը, Վիլյամ Կնոքսը, Աննեն, Էդիսոն Էյմսը և Բենջամին Դեանը։ Հետագայում Վիլյամը ժառանգել է հոր բիզնեսը։
Ծանոթագրություններ[խմբագրել | խմբագրել կոդը]
- ↑ 1,0 1,1 1,2 1,3 1,4 SNAC — 2010.
- ↑ 2,0 2,1 2,2 2,3 2,4 Find A Grave — 1996.
- ↑ https://www.invent.org/inductees/benjamin-holt
- ↑ Фирма Бенджамина Холта — первый в мире изготовитель полугусеничных тракторов
- ↑ «История бренда Challenger». Արխիվացված է օրիգինալից 2020 թ․ հունիսի 18-ին. Վերցված է 2021 թ․ ապրիլի 13-ին.
- ↑ Pernie, Gwenyth Laird (2009 թ․ մարտի 3). «Benjamin Holt (1849-1920): The Father of the Caterpillar tractor». Արխիվացված է օրիգինալից 2012 թ․ օգոստոսի 3-ին. (անգլ.)
- ↑ «HOLT CAT - Texas Caterpillar Dealer Equipment Sales and Service». 2007. Արխիվացված է օրիգինալից 2007 թ․ ապրիլի 19-ին. Վերցված է 2010 թ․ փետրվարի 24-ին. (անգլ.)
- ↑ Benjamin Leroy Holt (անգլ.)
- ↑ What is the history of Caterpillar Inc. in manufacturing? (անգլ.)
- ↑ Anna W. Brown Holt (անգլ.)
Արտաքին հղումներ[խմբագրել | խմբագրել կոդը]
- Բենջամին Հոլթ (անգլ.)
- Բենջամին Հոլթը և Caterpillar թրթուրավոր շարժասարքը (անգլ.)
 | Վիքիպահեստն ունի նյութեր, որոնք վերաբերում են «Բենջամին Հոլթ» հոդվածին։ |
| ||||||||||
