Տաշքենդի հայկական թատրոն

Տաշքենդի հայկական թատրոն
Տեսակ	թատրոն
Երկիր	Ուզբեկստան
Գտնվելու վայրը	Տաշքենդ
Հիմնադրման ամսաթիվ	1924
Փակման ամսաթիվ	1937

Տաշքենդի հայկական թատրոն, պետական, 1934 թվականից՝ Հովհաննես Աբելյանի անվան թատրոն։

Պատմություն

Թատրոնը բացվել է 1924 թվականին։ 20-րդ դարի սկզբին Տաշքենդում հայկական ներկայացումներ տվել են տեղի թատերասերները, Բաքվի և Թիֆլիսի պրոֆեսիոնալ դերասանները։ Գերակշռել են օպերա-օպերետային ներկայացումները՝ Ա. Առստամյանի և Լ. Կամովասի բեմադրությամբ։ 1926 թվականին Բաքվի հայկական թատրոնի դերասանների (Ժասմեն, Վահրամ Փափազյան, Ա. Հովհաննիսյան և ուրիշներ) ելույթները նպաստել են Տաշքենդի հայկական թատրոնի խաղացանկի կայունացմանը։ Բեմադրվել են Շիրվանզադեի «Նամուս», «Պատվի համար», «Չար ոգի», Սունդուկյանի «Պեպո», Դեմիրճյանի «Քաջ Նազար», Շկվարկինի «Ուրիշի երեխան», Պուշկինի «Քարե հյուր» և այլն։

Թատրոնի ստեղծագործական զարգացմանը մեծապես նպաստել են ռեժիսորներ Լևոն Աբրահամյանը (նաև դերասան, թարգմանիչ), Վ. Սահակյանը, Գ. Թավրիզյանը, Հ. Գրիգորյանը, Կ. Ալվարյանը, դերասան-դերասանուհիներ Օ. Զաքարյանը, Ս. Գևորգյանը, Ե. Յուզբաշյանը, Օ. Սարգիսբեկյանը, Ժ. Թովմասյանը, Կ. Միրզոյանը, Մ. Ասրլյանը, Վ. Պետրոսյանը, Հ. Դանիելյանը և ուրրիշներ։ 1934 թվականին Տաշքենդի հայկական թատրոնում է աշխատել Հովհաննես Աբելյանը՝ բեմադրությունները ներկայացնելով նաև Միջին Ասիայի մի շարք քաղաքներում։ Տաշքենդի հայկական թատրոնում հյուրախաղերով հանդես է եկել նաև Արուս Ոսկանյանը։ Թատրոնը փակվել է 1937 թվականին։