Սմբատ Աբրահամյան

Վիքիպեդիայից՝ ազատ հանրագիտարանից
Վիքիպեդիայում կան հոդվածներ Աբրահամյան ազգանունով այլ մարդկանց մասին։
Սմբատ Միսակի Աբրահամյան
Ծնվել է1925
ԾննդավայրԵրնջատափ
ՔաղաքացիությունՀայկական Խորհրդային Սոցիալիստական Հանրապետություն Հայկական ԽՍՀ
Ազգությունհայ
Մասնագիտությունմանկավարժ
Պարգևներ և
մրցանակներ
Կարմիր աստղի շքանշան, «Աշխատանքային արիության համար» կրծքանշան

Սմբատ Միսակի Աբրահամյան (1925, Երնջատափ, Էջմիածնի գավառ, Հայկական ԽՍՀ, ԱԽՖՍՀ, ԽՍՀՄ), հայ մանկավարժ, Հայրենական մեծ պատերազմի մասնակից։

1942 թվականին ավարտել է Երնջատափի միջնակարգ դպրոցը, այնուհետև աշխատանքի է անցել նույն դպրոցում՝ դասավանդելով հայոց լեզու և թվաբանություն։ 1943 թվականին անցել է զինվորական ծառայության։ Երկու ամիս անց նա արդեն ռազմաճակատում էր։ Մարտնչել է 55-րդ դիվիզիայի 111-րդ գնդի կազմում։ Օգոստոսին գունդը դիրքեր է գրավել Կուրսկի աղեղում։

1943 թվականի աշնանը մասնակցում է Դնեպրի գետանցում։ Ցուցաբերած արիության համար արժանացել է «Խիզախության համար» մեդալի։ 1944 թվականի հուլիսի 30-ին Բելոռուսիայի Լունինենց երկաթուղային հանգույցի շրջանում տեղի ունեցած մարտերի ժամանակ ցուցաբերած խիզախության համար պարգևատրվել է Կարմիր աստղի շքանշանով։ Նրանց ստորաբաժանումը մասնակցել է Պինսկի, Մոզիրի և այլ քաղաքների ու բնակավայրերի ազատագրմանը։

Յոթ անգամ արժանացել է Գերագույն գլխավոր հրամանատարության շնորհակալագրերին և մի շարք մեդալների և ընտրվել է գումարտակի կուսկազմակերպության քարտուղար։

1948 թվականին վերադարձել է հայրենի գյուղ և անցել մանկավարժական աշխատանքի։ Ավարտել է հեռակա մանկավարժական ինստիտուտի պատմության ֆակուլտետը։ Երկար տարիներ ղեկավարել է գյուղի միջնակարգ դպրոցը, բեղմնավոր աշխատանքի համար արժանացել է «Աշխատանքային արիության համար» մեդալի։ Մի քանի տարի ղեկավարել է Ապարանի շրջանային ժողկրթության բաժինը։

Բազմաթիվ հոդվածներով հանդես է եկել հանրապետության մանկավարժական մամուլում[1]։

Պարգևներ[խմբագրել | խմբագրել կոդը]

  • «Խիզախության համար» մեդալ
  • Կարմիր աստղի շքանշան
  • «Աշխատանքային արիության համար» մեդալ

Ծանոթագրություններ[խմբագրել | խմբագրել կոդը]

  1. Ա. Հ. Հարությունյան, Հ. Ս. Մելքումյան, Ա. Ղ. Սուքիասյան, Հայաստանի ուսուցիչները մեծ Հայրենականում, գիրք 2, Ե., «Լույս», 1982, էջ 10-11։