Սերիական արտադրություն

Վիքիպեդիայից՝ ազատ հանրագիտարանից
Jump to navigation Jump to search

Սերիական արտադրություն, արտադրության կազմակերպման ձև․ բնորոշվում է ձեռնարկությունում լայն անվանացանկի համասեռ արտադրանքի թողարկմամբ, որը կրկնվում է երկար ժամանակի ընթացքում։ Տարբերում են խոշոր, միջին և փոքր սերիական արտադրություններ։ Խոշոր սերիական արտադրության դեպքում արտադրանքը պատրաստվում է անընդհատ մեծ ծավալով, որպես կանոն, երկար (տարուց ավել) ժամանակահատվածում։ Ձեռնարկությունը մասնագիտանում է լրիվ մշակված արտադրատեսակների կամ հանգույցների ու դետալների թողարկման մեջ, արտադրամասերը՝ ըստ առարկայական հատկանիշի, իսկ աշխատատեղերը՝ ըստ համասեռ օպերացիաների։ Միջին սերիական արտադրության ժամանակ մասնագիտացումը սահմանափակվում է առավել նեղ անվանացանկով, իսկ արտադրական գծերն ու արտադրամասերն ունեն առարկայական և տեխնոլոգիական լայն մասնագիտացում։ Փոքր սերիական արտադրության պայմաններում իրերի կամ առանձին դետալների պատրաստումը, որպես կանոն, չի կրկնվում, սերիայի չափն անկայուն Է, իսկ իրացումը սահմանափակվում է ունեցած պատվերներով կամ պայմանագրերով։ Սերիական արտադրության շնորհիվ կրճատվում է արտադրական ցիկլը, բարելավվում արտադրանքի որակը, աճում աշխատանքի արտադրողականությունը և իջնում ինքնարժեքը։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։ CC-BY-SA-icon-80x15.png