Ջուդեկկա (կղզի)

Ջուդեկկա;
	Ջուդեկկա կղզին Սուրբ Մարկոսի զանգակատնից
Տեսակ	կղզի
Երկիր	Իտալիա
Վարչատարածքային միավոր	Վենետիկ
Մակերես	0,59 կմ²
Բնակչություն	4792 մարդ (2011)

Ջուդեկկա (իտալ.՝ Giudecca), խոշոր կղզի Վենետիկի ծովածոցում, Վենետիկի Դորսոդուրո պատմական շրջանից բաժանված է Ջուդեկկա ջրանցքով (իտալ.՝ Canale della Giudecca), որը նախկինում կոչվել է Վիգանո ջրանցք (իտալ.՝ Canale Vigano)։ Ջուդեկկան վարչականորեն Վենետիկի կազմում է և Դորսոդուրո պատմական շրջանի շրջանի մի մասն է։

Ստուգաբանություն

Կղզու նախկին «Spinalonga» (թարգմ.՝ «ձկան երկար ոսկոր») անվանումը, ամենայն հավանականությամբ, առաջացել է իր յուրահատուկ ձևի պատճառով։ Ժամանակակից անվան ծագման մեկնաբանության մեջ համաձայնություն չկա։ Ըստ տարածված վարկածի՝ անունը ծագել է «Giudei»-ից (հրեաներ), քանի որ այստեղ, իբրև թե, վենետիկյան գետտոյի հիմնադրումից առաջ հրեաներ են ապրել^[2]։ Այս վարկածի օգտին են խոսում Իտալիայի հարավի բազմաթիվ նմանատիպ տեղանուններ, որոնք, անկասկած, կապված են հրեաների հետ։ Մեկ այլ վարկածում ասվում է, որ անունը գալիս է «Zudega» (թարգմ.՝ «դատել») բայից, քանի որ 9-րդ դարում կղզու հողերը բաժանված էին ապստամբ ազնվականների միջև։

Նկարագրություն

Ջուդեկկան բաղկացած է 8 կղզիներից, որոնք ջրանցքի կողմից ունեն ընդհանուր առափնյա։ Մյուս կողմը զբաղեցնում են այգիներն ու բանջարանոցները։ Ջուդեկկայից դեպի արևմուտք, Լավրաների ջրանցքից այն կողմ, գտնվում են Սակկա Ֆիզոլա (Ջուդեկկան միացված է կամրջով) և Սակկա Սան Բիաջո արհեստական կղզիները։

Կղզու հիմնական տեսարժան վայրերից են.

Իլ Ռեդենտորե եկեղեցի, 16-րդ դար, ճարտարապետ Անդրեա Պալլադիո,
Դելլե Ցիտելլե եկեղեցի (Սանտա Մարիա դելլա Պրեզենտացիոնե դելլե Ցիտելլե), 16-րդ դար, ենթադրաբար ճարտարապետը նույնպես Անդրեա Պալլադիոն է,
Սանտ Էֆեմիայի եկեղեցի, 9-րդ դար,
Մոլինո Ստուկի, 19-րդ դարի հսկայական նեոգոթական կառույց, սկզբում մակարոնեղենի գործարան, այժմ՝ հյուրանոց։
Կազա դե Տրե Օչի, մոդեռն ոճի պալացցո, 20-րդ դարի սկիզբ։