Շիկակարմիր իրիկնաթռչնակ (լատին․՝ Nyctalus noctula), շեկ իրիկնաչղջիկ, չղջիկների ենթակարգի հարթաքիթ չղջիկների ընտանիքի կաթնասուն կենդանի։ Հայաստանում հանդիպում է հաստաբուն, լայնատերև ծառերով առատ վայրերում։ Ամռանը թաքնվում է, իսկ ձմռանը քուն է մտնում փչակներում։
Խոշոր չղջիկ է։
Մարմնի երկարությունը 64-81 մմ է, պոչինը՝ 46-54 մմ, նախաբազկինը՝ 51-57 մմ։ Կարճ ու հարթ մազերը մեջքի մասում մուգ շիկակարմիր են, դեպի փորը աստիճանաբար դառնում են բաց գույնի։
Սնվում է տարբեր միջատներով (թրթուրներ, բզեզներ, ուղղաթևեր, երկթևանիներ և այլն)։ Որսի է դուրս գալիս մթնշաղին։ Ծնում է 1 ձագ։ Հղիության և ձագերին կերակրելու ընթացքում էգերն առանձնանում են արուներից, կազմում ինքնուրույն խմբեր (երբեք չեն առաջացնում մեծ կուտակումներ)։
Այս հոդվածի կամ նրա բաժնի որոշակի հատվածի սկզբնական տարբերակը վերցված էՀայաստանի բնաշխարհ հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։
