Միքայել Կոտոյան
Միքայել Կոտոյան (հունիսի 24, 1951, Կիրովական, այժմ` Վանաձոր), հայ ռեժիսոր, դերասան։
Կենսագրություն[խմբագրել | խմբագրել կոդը]
Միքայել Կոտոյանը ծնվել է 1951 թվականին Վանաձորում՝ ՀՀ վաստակավոր արտիստ, ռեժիսոր Գրիգորի Կոտովի և ՀՀ ժողովրդական արտիստ, դերասանուհի Լենա Փաշինյանի ընտանիքում։ Նախնական կրթությունը ստացել է Գրիբոյեդովի անվան 11 միջնակարգ դպրոցում։
Ստեղծագործական կյանք[խմբագրել | խմբագրել կոդը]
1970 թվականին Միքայել Կոտոյանը ընդունվել է Երևանի Գեղարվեստա-թատերական ինստիտուտ, ռեժիսորական ֆակուլտետ։ 1975-ին ավարտելով՝ գործուղվել է Վանաձորի Հ. Աբելյանի անվան պետթատրոն որպես ռեժիսոր և դերասան։ Ռոզովի «Երջանկություն որոնելիս» պիեսի բեմադրությունը Վանաձորի թատրոնում եղել է Միքայել Կոտոյանի դիպլոմային աշխատանքը։
1989-1990 թվականներին Հայկական հեռուստատեսության պատվերով իրականացրել է «Այս աշխարհի խելոքները» և «Փաստաբանի մոտ կամ երջանիկ ամուսիններ» հեռուստաներկայացումները։
1990-1993 և 2001-2004 թվականներին նշանակվել է Գավառի Քալանթարի անվան պետթատրոնի՝ գլխավոր ռեժիսոր և գեղարվեստական ղեկավար։ Այս թատրոնում բեմադրել է «Խնայեցեք ձեր նյարդերը», «Ակամա բժիշկ», «Աշնան արև», «Բրավո» և այլ գործեր։
2004 թվականին նշանակվել է Վանաձորի Հ. Աբելյանի անվան պետթատրոնի գեղարվեստական ղեկավար։ Վանաձորի թատրոնի բեմում Միքայել Կոտոյանը ներկայացրել է «Ռոմեո և Ջուլիետ» ողբերգությունը, Հրանտ Մաթևոսյանի «Ալխո»՝ ըստ «Բեռնաձիեր» պատմվածաշարի բեմականացումը, Ռոբեր Լամուրեի «Ախ՜, փարիզուհիներ, փարիզուհիներ» ներկայացումը։
2003 թվականին «Պատվի համար» և «Չաո» ներկայացումների համար Միքայել Կոտոյանը արժանացել է Հայաստանի թատերական գործիչների միության «Արտավազդ» ամենամյա մրցանակին։ Իր ստեղծագործական աշխատանքների համար նա բազմիցս է արժանացել բարձր գնահատանքի, այդ թվում՝ լավագույն ներկայացումների մրցույթում 1983-ին՝ «Սուրբ Սուսաննան կամ վարպետների դպրոցը», և 1991-ին՝ «Աշնան արև» և «Ակամա բժիշկ» ներկայացումները արժանացել են «լավագույն բեմադրություն» մրցանակների։
1998-ից մինչև 2006 թվականը դասավանդել է «Հեռուստառեժիսուրա և դերասանի վարպետություն» առարկաները Երևանի Խ. Աբովյանի անվան պետական մանկավարժական համալսարանի՝ կուլտուրայի ֆակուլտետում։ Իսկ 2004-ից նաև Երևանի թատրոնի և կինոյի պետական ինստիտուտի Վանաձորի մասնաճյուղում։
Միքայել Կոտոյանը 30-ից ավել բեմադրությունների հեղինակ է։
Այժմ ապրում է ԱՄՆ-ում։
Բեմադրություններ և Դերեր[խմբագրել | խմբագրել կոդը]
Բեմադրություններ
- «Մոխրոտը», Շվարց
- «Երկնագույն եղջերուներ», Կոլոմիեց
- «Սուրբ Սուսաննան կամ վարպետների դպրոցը», Վետեմաա
- «Մորթե բաճկոն», Ստրատիև
- «Զվարճալի դեպք», Գոլդոնի
- «Ակամա բժիշկ», Մոլիեր
- «Ռոմեո և Ջուլիետ», Շեքսպիր
- «Ծառերը կանգնած մահանում» Կասոնա (Արտաշատի Ամո Խարազյանի անվան թատրոնում),
- «Արքայազն ու աղքատը» Մարկ Տվեն (Գ. Սունդուկյանի անվան ազգային ակադեմիական թատրոնում)
Դերեր
- «Քաոս» - Արշակ
- «Վերջինները» - Պյոտր
- «Մոխրոտ» - Արքայազն
- «Կապուտ թռչուն»- Տիլտիլ