Միջկրոնական հարաբերությունների ներդաշնակության համաշխարհային շաբաթ
| Միջկրոնական հարաբերությունների ներդաշնակության համաշխարհային շաբաթ World Interfaith Harmony Week | |
|---|---|
| Տեսակ | համաշխարհային |
| Ենթադաս | United Nations observance? և international week? |
| Ամսաթիվ | փետրվարի առաջին շաբաթ |
| Տոնվում է | աշխարհում |
| Հիմնադիր | ՄԱԿ |
| Կայք | un.org/ar/observances/interfaith-harmony-week(արաբ.) |
Միջկրոնական հարաբերությունների ներդաշնակության համաշխարհային շաբաթ, ամենամյա տոն, որը նշվում է յուրաքանչյուր տարվա փետրվարի առաջին շաբաթվա ընթացքում և բոլոր հավատացյալներին կոչ է անում հաստատել ներդաշնակ հարաբերություններ։ ՄԱԿ-ի Գլխավոր ասամբլեան կոչ է արել բոլոր պետություններին կամավոր հիմունքներով աջակցել այդ շաբաթվա ընթացքում միջկրոնական ներդաշնակության և բարի կամքի գաղափարների տարածմանն ամբողջ աշխարհի եկեղեցիներում, մզկիթներում, սինագոգներում, տաճարներում և այլ աղոթատներում` հիմնված Բարձրյալի և մերձավորի հանդեպ սիրո և բարության վրա՝ կախված սեփական կրոնական ավանդույթներից կամ համոզմունքներից[1]։
Ընդհանուր տեղեկություններ[խմբագրել | խմբագրել կոդը]
2010 թվականի սեպտեմբերի 23-ին՝ ՄԱԿ-ի Գլխավոր ասամբլեայի 65-րդ նստաշրջանի ընթացքում, Հորդանանի թագավոր Աբդալլահ II-ն առաջարկել է փետրվարի առաջին շաբաթը հռչակել Ներդաշնակ միջկրոնական հարաբերություների շաբաթ[2]։ Իր ելույթի ժամանակ նա ասել է․
|
Անհրաժեշտ է նաև հակազդել պառակտման ուժերին, որոնք ձգտում են թյուրիմացություն և անվստահություն սերմանել, հատկապես տարբեր կրոններ դավանող ժողովուրդների միջև։ Իրականում մարդիկ ամբողջ աշխարհում սերտորեն կապված են միմյանց հետ, ընդ որում՝ ոչ միայն փոխադարձ շահերի, այլ նաև Աստծո և մերձավորի հանդեպ սիրո և բարության շնորհիվ։ Այդ շաբաթ մեր պատվիրակությունը բոլոր մայրցամաքներում մեր աջակիցների օգնությամբ կներկայացնի Ներդաշնակ միջկրոնական հարաբերությունների ամենամյա համաշխարհային շաբաթ նախագծի անցկացման բանաձևը։ Մենք առաջարկում ենք, որ մեկ շաբաթվա ընթացքում ողջ աշխարհի մարդիկ, հավաքվելով իրենց կրոնական պաշտամունքի վայրերում, պատմեն իրենց կրոնական ուսմունքների մեջ ամրագրված հանդուրժողականության, հարգանքի և խաղաղության պատվիրանների մասին։ Ես հույս ունեմ, որ Վեհաժողովը կաջակցի բանաձևի այս նախագծին[3]։ | 
|
2010 հոկտեմբերի 20-ին, Հորդանանի արքայազն Գազի բին Մուհամմադը՝ Աբդալլահ II թագավորի հատուկ խորհրդականը և անձնական բանագնացը, ինչպես նաև բանաձևի հեղինակը, Նյու Յորքում ՄԱԿ-ի Գլխավոր ասամբլեային ներկայացրել է Ներդաշնակ միջկրոնական համաշխարհային շաբաթվա անցկացման առաջարկը։ Բանաձևն ընդունվել է միաձայն։
Բանաձևը շարունակում է «Ընդհանուր խոսք» նախաձեռնությունը, որը ստեղծվել է 2007 թվականին արքայազն Գազի բին Մուհամմադի կողմից։ Այս նախաձեռնությունը, ինչպես նաև բանաձևը, հիմնված է Բարձրյալի և մերձավորի հանդեպ սիրո գաղափարը տարածելու վրա։
Բանաձևի տեքստ[խմբագրել | խմբագրել կոդը]
ՄԱԿ-ի 65/5 բանաձևում ասվում է[4]․
- Գլխավոր ասամբլեան,
- հիմնվելով 1999 թվականի սեպտեմբերի 13-ի 53/243 Ա և Բ՝ Աշխարհի մշակույթների ոլորտում գործողությունների ծրագրի և հռչակագրի մասին, 2002 թվականի նոյեմբերի 4-ի 57/6՝ աշխարհի մշակույթների և ոչբռնության խրախուսման մասին, 2003 թվականի դեկտեմբերի 19-ի 58/128՝ միջկրոնական և մշակութային փոխըմբռնման, ներդաշնակության և համագործակցության խրախուսման մասին, 2005 թվականի հոկտեմբերի 20-ի 60/4՝ Քաղաքակրթությունների միջև երկխոսության համար օրվա համաշխարհային ծանուցման մասին, 2009 թվականի նոյեմբերի 10-ի 64/14՝ Քաղաքակրթությունների դաշնակցության մասին, 2009 թվականի դեկտեմբերի 7-ի 64/81՝ ի նպաստ աշխարհի միջկրոնական և միջմշակույթային երկխոսության, փոխըմբռման և համագրոծակցության խրախուսման մասին և 2009 դեկտեմբերի 18-ի 64/164՝ կրոնների և համոզմունքների հիման վրա անհանդուրժողականության և խտրականության բոլոր տեսակների մասին իր բանաձևերի վրա, ինչպես նաև ճանաչելով տարբեր կրոնների և դավանանքների միջև երկխոսության հրատապ անհրաժեշտությունը և ընդունելով, որ բոլոր կրոնների, համոզմունքների և դավանանքների բարոյական պարտքն է ձգտել խաղաղության, հանդուրժողականության և փոխըմբռնման,
- կրկին հաստատում է, որ փոխըմբռնումը և միջկրոնական երկխոսությունը համարվում են աշխարհի մշակույթների կարևոր մասը,
- յուրաքանչյուր տարվա փետրվարի առաջին շաբաթը հայտարարում է Միջկրոնական հարաբերությունների ներդաշնակության համաշխարհային շաբաթ բոլոր կրոնների և դավանանքների շրջանակներում,
- հրավիրում է բոլոր կառավարություններին այդ շաբաթվա ընթացքում կամավորական հիմունքներով օժանդակել միջկրոնական ներդաշնակության և բարի կամքի գաղափարների տարածմանն ամբողջ աշխարհի եկեղեցիներում, մզկիթներում, սինագոգներում, տաճարներում և այլ աղոթավայրերում՝ հիմնված Բարձրյալի և մերձավորի հանդեպ սիրո և բարության վրա՝ կախված սեփական կրոնական ավանդույթներից և համոզմունքներից,
- խնդրում է Գլխավոր քարտուղարին շարունակել տեղեկացնել Գլխավոր ասամբլեային իրական հռչակագրի իրականացման մասին։
Ծանոթագրություններ[խմբագրել | խմբագրել կոդը]
- ↑ Официальный сайт ООН, Всемирная неделя гармоничных межконфессиональных отношений, 1-7 февраля
- ↑ РИА Новости, Всемирная неделя гармоничных межконфессиональных отношений.
- ↑ H.M. King Abdullah proposes World Interfaith Harmony Week at the UN
- ↑ Резолюция, принятая Генеральной Ассамблеей 20 октября 2010 года, 65/5. Всемирная неделя гармоничных межконфессиональных отношений.