Հովհաննես Մուրադյան (լեզվաբան)

Հովհաննես Մուրադյան
Ծնվել է	դեկտեմբերի 2, 1920; Մեղրի
Մահացել է	1986; Երևան, Հայկական ԽՍՀ, ԽՍՀՄ
Քաղաքացիություն	ԽՍՀՄ
Ազգություն	հայ
Մասնագիտություն	լեզվաբան
Հաստատություն(ներ)	ՀՀ ԳԱԱ Հրաչյա Աճառյանի անվան լեզվի ինստիտուտ
Ալմա մատեր	Երևանի պետական համալսարան
Գիտական աստիճան	բանասիրական գիտությունների դոկտոր (1974)
Կուսակցություն	ԽՄԿԿ

Անվան այլ կիրառումների համար տե՛ս՝ Հովհաննես Մուրադյան (այլ կիրառումներ)

Հովհաննես Դավթի Մուրադյան (դեկտեմբերի 2, 1920(1920-12-02)^[1], Մեղրի^[1] - 1986, Երևան, Հայկական ԽՍՀ, ԽՍՀՄ), խորհրդահայ լեզվաբան։ Բանասիրական գիտությունների դոկտոր (1974)։

Յոթնամյա կրթությունը ստացել է Մեղրու միջնակարգ դպրոցում, ապա տեղափոխվելով Երևան` միջնակարգ կրթությունը շարունակել է Խանջյանի, այնուհետև Ձերժինսկու անվան դպրոցում։ 1939 թ. ընդունվել է Երևանի պետական համալսարան, որտեղից էլ նույն թվականին զորակոչվել է բանակ։ 1941 թ. մինչև Հայրենական պատերազմի վերջը մասնակցել է հայրենիքի պաշտպանության և ազատագրության համար մղված մարտերին տարբեր ռազմաճակատներում։ Սովետական բանակի շարքերից զորացրվել է 1946 թ.: 1947թ. վերսկսել է ուսումը և 1952 թ. ավարտել բանասիրական ֆակուլտետի արևելագիտության բաժինը։ Նույն տարում ընդունվել է ՀՍՍՀ ԳԱ լեզվի ինստիտուտի ասպիրանտուրա։ 1957 թ. աշխատել է ՀՍՍՀ ԳԱ լեզվի ինստիտուտում. 1957-1959 թթ.` լաբորանտ, 1959-1963 թթ.` կրտսեր գիտաշխատակից, 1963-1965 թթ.` ավագ գիտաշխատակից։ 1958 թ. ստացել է բանասիրական գիտությունների թեկնածուի, 1974-ին՝ բանասիրական գիտությունների դոկտորի գիտական աստիճան։ 1965-1972 թթ. վարել է ինստիտուտի՝ գիտության գծով փոխտնօրենի պաշտոնը, 1972 թ. մինչև կյանքի վերջը եղել է բարբառագիտության բաժնի վարիչ։

Զբաղվում էր բարբառագիտության («Կարճևանի բարբառը», 1960, «Կաքավաբերդի բարբառը», 1967), լեզվաբանական աշխարհագրության և հայոց լեզվի պատմության հարցերով։ «Ակնարկներ միջին գրական հայերենի պատմության» (1972) կոլեկտիվ աշխատության «Ներածություն» և «Հնչյունաբանություն» բաժիններում Մուրադյանը քննում է հարցի պատմությունը, տերմինի («միջին գրական հայերեն») ըմբռնումը, միջին հայերենի բարբառային բաժանվածությունը, անդրադառնում ժամանակահատվածի գրավոր աղբյուրներին, միջին հայերենի ժամանակաշրջանում արձանագրված հնչյունական օրինաչափությունների առաջացման ժամանակագրությանը և տարածական բաշխման հարցերին։

Ծանոթագրություններ[խմբագրել | խմբագրել կոդը]

↑ ^1,0 ^1,1 ^1,2 ^1,3 ^1,4 ^1,5 ^1,6 ^1,7 Հայկական սովետական հանրագիտարան, հատոր 8 (հայ.) — հատոր 8. — էջ 94.

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 8, էջ 94)։

[_e42a8a4882d007ec-1] 1,0 ^1,1 ^1,2 ^1,3 ^1,4 ^1,5 ^1,6 ^1,7 Հայկական սովետական հանրագիտարան, հատոր 8 (հայ.) — հատոր 8. — էջ 94.

[1]