Հիդրոֆոն

Հիդրոֆոն տատանումների հանգույց

Հիդրոֆոն ( հիդրո... և ...ֆոն), էլեկտրաձայնային փոխակերպիչ, որը կիրառվում է հիդրոձայնագիտության մեջ՝ ստորջրյա աղմուկներն ու ազդանշանները լսելու, չափումներ կատարելու համար։ Հիդրոֆոնը նաև հիդրոձայնային ուղղորդված ընդունիչ անտենաների բաղկացուցիչ տարրն է։ Առավել տարածված են էլեկտրադինամիկական, պիեզոէլեկտրական և մագնիսաստրիկցիոն երևույթների վրա հիմնված հիդրոֆոնները։ Էլեկտրադինամիկական հիդրոֆոնը սկզբունքորեն չի տարբերվում օդային էլեկտրադինամիկական միկրոֆոնից։ Պիեզոէլեկտրականում օգտագործվում է որոշ բյուրեղների, ինչպես նաև պիեզոէլեկտրական խեցեղեն նյութերի ուղիղ պիեզոէֆեկտը։ Մագնիսաստրիկցիոն հիդրոֆոնի աշխատանքը հիմնված է ֆեռոմագնիսական որոշ մետաղների հակադարձ մագնիսաստրիկցիոն երևույթի վրա։ Չափումների համար նախատեսված հիդրոֆոնը պետք է լինի ոչ ուղղորդ և հետազոտվող հաճախականությունների ամբողջ տիրույթում ունենա հավասար հաճախային բնութագիր։ Այդ նպատակով հարմար է օգտվել ալիքի երկարության համեմատությամբ փոքր շառավիղ ունեցող և պիեզոխեցեղենից պատրաստված գնդաձև սնամեջ ընդունիչներից, որոնք կատարում են գնդային սիմետրիկ տատանումներ։ Հիդրոֆոնի հիմնական բնութագրերից մեկը զգայնությունն է, որը որոշվում է էլեկտրական լարման և ձայնի ճնշման հարաբերությամբ և չափվում է մկվ/բար-ով։

Տես նաև

• Պիեզոէլեկտրականություն

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 6, էջ 402)։