Խորեն Գասպարյան

Խորեն Գասպարյան
Ծնվել է	նոյեմբերի 8, 1961 (63 տարեկան)
Ծննդավայր	Կիրովական, Հայկական ԽՍՀ, ԽՍՀՄ
Մասնագիտություն	բանաստեղծ և թարգմանիչ
Քաղաքացիություն	Հայաստան
Կրթություն	ՎՊՀ
Ուշագրավ աշխատանքներ	Վիճակված է այսպես (համաշխարհային պոեզիայի ծաղկաքաղ-անթոլոգիա)
Անդամակցություն	ՀԳՄ և Հայաստանի ժուռնալիստների միություն
Աշխատավայր	ՎՊՀ
Պարգևներ	ՀՀ լեզվի պետական տեսչության կողմից արժանացել է պատվոգրի; Արժանացել է Դեյվիս քաղաքի պատվավոր քաղաքացու վկայագրի։

Վիքիպեդիայում կան հոդվածներ Գասպարյան ազգանունով այլ մարդկանց մասին։

Խորեն Մահարիկի Գասպարյան (նոյեմբերի 8, 1961(1961-11-08), Կիրովական, Հայկական ԽՍՀ, ԽՍՀՄ), հայ գրող, թարգմանիչ, 2002 թվականից Հայաստանի գրողների միության անդամ։

Կենսագրություն

Ծնվել է 1961 թվականի նոյեմբերի 8-ին, Կիրովական քաղաքում (այժմ՝ Վանաձոր)։

Ավարտել է Վանաձորի մանկավարժական ինստիտուտի (այժմ՝ Վանաձորի Հովհաննես Թումանյանի անվան պետական համալսարան) լեզվագրական ֆակուլտետը, միաժամանակ՝ Մոսկվայի օտար լեզուների հեռակա դասընթացի թարգմանական բաժինը։ Եղել է «Լոռու մարզ» թերթի գլխավոր խմբագրի տեղակալ (1996-2005)։ ԱՄՆ-ում ստացել է Կալիֆոռնիայի պետական համալսարանի Սակրամենտոյի մասնաճյուղի՝ ժուռնալիստիկայի և հաղորդակցության դասընթացների մասնակցի վկայական (2003)։

Եղել է Վանաձորի քաղաքապետի օգնականը՝ լրատվության գծով (2005-2012)։ Թարգմանական արվեստ, ժուռնալիստիկա և մշակութաբանություն է դասավանդել Վանաձորի պետական մանկավարժական ինստիտուտի բանասիրական ֆակուլտետում։ 2012 թ. դեկտեմբերից Վանաձորի գրադարանների կենտրոնացված համակարգի տնօրենն է։

Գրական գործունեություն

Նրա բանաստեղծությունները, պատմվածքները և թարգմանությունները տպագրվել են գրական տարբեր ժողովածուներում, գրական մամուլում՝ «Երկունք» «Գարուն», «Նոր դար», «Գրական թերթ», «Հորիզոն», «Սատիրիկոն», «Նարցիս», ԱրտԳրականություն և այլն։ Նրա բանաստեղծություններից տպագրվել են ուկրաիներեն՝ Միրոն Նեստերչուկի թարգմանությամբ, պատմվածքներից՝ անգլերեն։

Թարգմանում է անգլերենից և ռուսերենից։

ՀՀ ժուռնալիստների միության և Հայաստանի գրողների միության անդամ է։

Երկեր

Վիճակված է այսպես (համաշխարհային պոեզիայի ծաղկաքաղ-անթոլոգիա), Երևան, 2000։
Իմաստության ուսուցիչը (Օսկար Ուայլդի արձակ բանաստեղծությունների թարգմանություն), Երևան, 2012
«Ռուս այլախոհական պոեզիա» (անթոլոգիա, թարգմանություն ռուսերենից), Ստեփանակերտ, 2015
Սյուն Շի-Ի, «Երկնային կամուրջը» (վեպ, թարգմանություն անգլերենից), Ստեփանակերտ, 2016
Դոնգ Քիանգ «Կացարաններ. չինական բանահյուսություն» (թարգմանություն անգլերենից), Ստեփանակերտ, 2017
Սյաո Ցյան, «Վիշապի մորուքներն ընդդեմ նախագծերի» (էսսեներ, դասախոսություններ,վիպակ, թարգմանություն անգլերենից), Ստեփանակերտ, 2017
«Աղի ձայնը» (20-րդ դարի հետութսունական թվականների սերնդի չին գրողների պատմվածքների ժողովածու, թարգմանություն անգլերենից), Ստեփանակերտ, 2018
Չժան Յավեն, «Դարերի կանչը։ Մտորումներ Հոնկոնգի մասին. իրական պատմություն» (թարգմանություն անգլերենից), Ստեփանակերտ, 2020
«Վալերի Բրյուսով. Բանաստեղծություններ և արձակ» (գրքի 35 բանաստեղծություն ռուսերենից թարգմանել է Խ. Գասպարյանը), Երևան, 2021
Սլավենկա Դրակուլիչ, «Ֆրիդա կամ՝ ցավի մասին» (թարգմանություն անգլերենից), Ստեփանակերտ, 2022
Ռուսերենից թարգմանել է նաև «Մեր երկնային պաշտպանները. Կարելիայի սրբերը» գրքի առանձին գլուխներ և գրքի բանաստեղծությունները, Իվանովո, 2017

Պարգևներ և մրցանակներ

2003 թվականին արժանացել է Դեյվիս քաղաքի պատվավոր քաղաքացու վկայագրի։
2010 թվականին հայոց լեզվի զարգացման, գրքի տարածման և քարոզչության գործում ունեցած մեծ ավանդի և Մայրենիի միջազգային օրվա առթիվ ՀՀ լեզվի պետական տեսչության կողմից արժանացել է պատվոգրի։
2011 թվականինարժանացել է Հայաստանի գրողների միության պատվոգրին՝ անգլոամերիկյան և ռուսական գրականության թարգմանության ասպարեզում նշանակալի ներդրման համար։
2018 թվականին նրան շնորհվել է Հայաստանի գրողների միության «Կանթեղ» թարգմանական մրցանակ։
2021 թ.-ին, ծննդյան 60-ամյակի և հայ գրականությանը մատուցած ծառայությունների համար, պարգևատրվել է ՀԳՄ նախագահության «Գրական վաստակի համար» մեդալով։

Տես նաև

Հայաստանի գրողների միության անդամների ցանկ

Աղբյուրներ

Հայկ Խաչատրյան (1986). Գրական տեղեկատու. Երևան: «Սովետական գրող».