Տերևաթափ թոսի է մինչև 3, երբեմն՝ 5 մ բարձրությամբ։ Տերևների ձևը տարբեր է, սկսած էլիպսաձևից մինչև երկարավուն ձվաձև, 3—6 սմ երկարությամբ, սրածայր,
գագաթին կռճիկանման, սուր հավելվածով, հիմքում սեպաձև սեղմված, ամբողջաեզր կամ միջին մասից վերև ատամնաեզր, ներքին կողմից սպիտակավուն։ Տերևակոթունը ունի 8 — 15 մմ երկարություն։ Ծաղիկները սպիտակ են, մինչև4 սմ տրամագծով, 6 — 10-ական հավաքված ողկույզանման ծաղկաբույլերում։ Պսակաթերթիկները համարյա կլորավուն են, շատ կարճ եղնգիկով։ Պտուղը տարբեր ձևեր է ունենում, լայն տանձաձևից մինչև համարյա գնդաձև, 8 — 10 մմ տրամագծով։ Ծաղկում է ապրիլ-մայիս ամիսներին, պտուղները հասունանում են օգոստոսին։
Բնական պայմաններում տարածված է արևմտյան Չինաստանում։ Հայաստանում մշակվում է միայն Երևանի բուսաբանական այգում և նրա Վանաձորի բաժանմունքում։ Հեռանկարային է միջին և ստորին գոտիների բնակավայրերի կանաչապատման համար[1]։
