Զբոսանք (նկար)
Զբոսանք | |
---|---|
տեսակ | գծանկար |
նկարիչ | Էդգար Շահին |
տարի | 1902 թվական |
բարձրություն | 72,5, 66,5 |
լայնություն | 52,2, 46,3 |
ժանր | գծանկար |
նյութ | օֆորտ, թուղթ, չոր ասեղ, ակվանտիտ |
գտնվում է | Հայաստանի պետական պատկերասրահ |
հավաքածու | Հայաստանի ազգային պատկերասրահ |
հիմնական թեմա | ունևոր դասի զբոսանքի պատկեր |
Ծանոթագրություններ |
Զբոսանք[1], Էդգար Շահինի նկարներից, որը ներկայացնում է այգում կառքերով զբոսանքի դուրս եկած հարուստ դասի ներկայացուցիչներին։
Նկարագրություն[խմբագրել | խմբագրել կոդը]
Այգում զբոսնող կառքերի ֆոնի վրա մեծ մասշտաբով առանձնացված է կառքերից մեկը, որի մեջ տիրաբար բազմել է շքեղ, սպիտակ զգեստով ոմն երիտասարդ ազնվական կին։ Շահինը օբյեկտիվորեն է պատկերել իրադրությունը` տիպար ընտրելով վայելչատես արտաքինով, փափկասուն կյանքով ապրած անձնավորության՝ շքեղ կառքում բազմած։ Կառքին լծված են ընտիր, գեղեցիկ ձիեր, որոնց վարում է մոդայիկ համազգեստով կառապանը։
Շահինը ստեղծել է գեղեցիկ պատկեր։ Մեծ ճաշակով, գրեթե աննկատելի նուրբ գծերով է պատկերված կնոջ սպիտակ զգեստը, որն ուժեղ հակադրումով ընդգծվում է սև կառքի ֆոնին՝ շքեղություն տալով պատկերին։ Կնոջ դեմքը մշակված է մանրամասնորեն.այն թեպետ գեղեցիկ է, բայց թվում է անբովանդակալի, անհոգ, անաշխատ կյանքով ապրող սեթևեթ կնոջ էությանը բնորոշ նկարագրով։
Պատկերը միտումնավոր կերպով բացահայտում է հասարակության ունևոր և չքավոր խավի մեջ գոյություն ունեցող հսկայական անջրպետը։ Շահինը հետաքրքրություն է ցուցաբերել Փարիզի ունևոր դասի կյանքի նկատմամբ՝ պատկերելով առանձին դրվագ, որը ներկայացնում է առավելապես զբոսանքի, ժամանցի տեսարան։
Քննադատների արձագանքները[խմբագրել | խմբագրել կոդը]
Շահինը հնարամտություն ունի հայտնաբերելու օֆորտի հնարավորությունները։ Սևի ու սպիտակի ներդաշնակումը հասցված է վիրտուոզության։ Նշանավոր քննադատ Գյուստավ Ժեֆռուան նշում է.«Ինքնատիպ փորագրություններու մեջ Շահինի օֆորտները չոր ասեղով բոլորովին ինքնուրույն տեղ կը գրավեն գծվածքի որոշակիությամբ, ձևի ամփոփումով, սևի ու սպիտակի ճիշտ բաշխումով։ Արվեստագետը ոչ միայն ճարտար է պղինձը փորելու և ուզածի պես գործածելու, այլև գիտե տեսնել ու տեսածը ցույց տալ։ Կարող է հանդիսանում դեմքերն ու տեսարանները խուզարկել և մեր հայեցողությանը ընծայել այն նուրբ և ուշագրավ պատկերները, որոնք հաջողված են եղել»։ Գյուստավ Քանը ասում է․ «Շահինը մեկն է այն մեծ վարպետներից, որոնք գույն են ստեղծում գծանկարի ուժով , սև ու սպիտակի պարզ խաղերով։ Նա կատարելագործության հասցրեց չոր ասեղի տեխնիկան, և ոչ մի գույն չի հասնի վիբրացիայի այն կատարելությանը, որին Շահինը հասել է գծանկարի միջոցով»[2]։
Ծանոթագրություններ[խմբագրել | խմբագրել կոդը]
- ↑ «Շահին Էդգար Պետրոսի | Զբոսանք (ինվենտար համար` 15660) - Database - Collection - National Gallery of Armenia». www.gallery.am. Վերցված է 2019 թ․ ապրիլի 24-ին.
- ↑ Եղիշե Մարտկյան, Հայկական կերպարվեստի պատմություն, Երևան, 1987