Գրիգոր Առաքելյան (դիվանագետ)

Գրիգոր Առաքելյան;
Ծնվել է	մարտի 14, 1948 (76 տարեկան)
Ծննդավայր	Թավրիզ, Իրան
Քաղաքացիություն	Հայաստան
Կրթություն	Հայկազյան-Թամարյան ազգային դպրոց և Երևանի պետական համալսարան (1975)
Մասնագիտություն	դիվանագետ
Աշխատավայր	ՀՀ ԳԱԱ և ՀՀ ԱԳՆ

Անվան այլ կիրառումների համար տե՛ս՝ Գրիգոր Առաքելյան (այլ կիրառումներ)

Գրիգոր Առաքելյան (մարտի 14, 1948(1948-03-14), Թավրիզ, Իրան), հայ դիվանագետ, արտակարգ և լիազոր դեսպան։ 2009-2015 թվականներին Իրանում զբաղեցրել է Հայաստանի արտակարգ և լիազոր դեսպանի պաշտոնը^[1]։ Ունի պատմական գիտությունների թեկնածուի գիտական աստիճան։

Կենսագրություն

Գրիգոր Առաքելյանը ծնվել է 1948 թվականի մարտի 14-ին Իրանի Թավրիզ քաղաքում։ Սովորել է Թավրիզի Հայկազյան-Թամարյան ազգային դպրոցում։ 1975 թվականին ավարտել է Երևանի պետական համալսարանի արևելագիտության ֆակուլտետի իրանագիտության բաժինը։ 1975 թվականին, որպես թարգմանիչ, գործուղվել է Աֆղանստան, որտեղ մնացել է մինչև 1979 թվականը։

1980-1991 թվականներին, որպես գիտաշխատող, աշխատել է Հայաստանի գիտությունների ազգային ակադեմիայում։ 1992 թվականին աշխատանքի է անցել Հայաստանի Արտաքին գործերի նախարարությունում։ 1992-1996 թվականներին զբաղեցրել է ԱԳՆ Մերձավոր և Միջին Արևելքի վարչության Իրանի բաժնի վարիչի պաշտոնը։ 1996-1999 թվականներին աշխատել է Իրանում Հայաստանի դեսպանատանը՝ որպես խորհրդական։

1999-2001 թվականներին զբաղեցրել է Հայաստանի ԱԳՆ Մերձավոր և Միջին Արևելքի երկրների վարչության պետի պաշտոնը։ 2004 թվականին եղել է Արտաքին գործերի նախարարության աշխատակազմի ղեկավարի խորհրդականի պաշտոնը։

2007-2009 թվականներին եղել է Իրանում Հայաստանի դեսպանության արտակարգ դեսպանորդ և լիազոր նախարար՝ շարունակելով այդ ընթացքում զբաղեցնել նաև Արտաքին գործերի նախարարի խորհրդականի պաշտոնը։

2009-2015 թվականներին Իրանում զբաղեցրել է Հայաստանի արտակարգ և լիազոր դեսպանի պաշտոնը։

2015 թվականից Արտաքին գործերի նախարարի խորհրդական է և զբաղեցնում է ԱԳՆ Սահմանակից երկրների վարչության պետի պաշտոնը^[2]։

Ընտանիք

Ամուսնացած է, ունի երկու զավակ։

Ծանոթագրություններ

↑ «Դեսպան Գրիգոր Առաքելյանը իր հավատարմագրերն է հանձնել Իրանի նախագահին». «Ազատ Եվրոպա/Ազատություն» ռադիոկայան. Վերցված է 2018 թ․ օգոստոսի 18-ին.
↑ Kutaisyan, Tigran. «Հայաստանի Հանրապետության դիվանագիտական ներկայացուցիչներ». despan.am. Վերցված է 2018 թ․ օգոստոսի 18-ին.

[1] «Դեսպան Գրիգոր Առաքելյանը իր հավատարմագրերն է հանձնել Իրանի նախագահին». «Ազատ Եվրոպա/Ազատություն» ռադիոկայան. Վերցված է 2018 թ․ օգոստոսի 18-ին.

[2] Kutaisyan, Tigran. «Հայաստանի Հանրապետության դիվանագիտական ներկայացուցիչներ». despan.am. Վերցված է 2018 թ․ օգոստոսի 18-ին.

[1]

[2]